ސިންގަޕޫރުގައި މިހާރު ހުންނެވި ސްރީލަންކާގެ ކުރީގެ ރައީސް ގޮތަބަޔަ ރާޖަޕަކްސައަށް އޮގަސްޓު މަހުގެ 11 ވަނަ ދުވަހާ ހަމައަށް އެ ޤައުމުގައި ހުރެވޭ ގޮތަށް މުއްދަތު އިތުރު ކޮށްދީފިއެވެ. ރާޖަޕަކްސަ ސިންގަޕޫރަށް ވަޑައިގެންނެވީ، އޭނާގެ ސަރުކާރާ ދެކޮޅަށް ސްރީލަންކާގެ ޢާންމު ރައްޔިތުން ފެށި މުޒާހަރާތަކާ ގުޅިގެންނެވެ. އަދި، ސިންގަޕޫރަށް ގޮސް އޭނާ ވަނީ، މުޒާހަރާ ކުރަމުންދިޔަ މީހުން އެދެމުން ދިޔަ ގޮތަށް، އިސްތިޢުފާ ދެއްވާފައެވެ.
ސިންގަޕޫރުގައި އޭނާ މިހާރު ހުންނެވީ ޚާއްޞަ ހުއްދައެއްގެ ދަށުންނެވެ. ޖުލައި 14 ވަނަ ދުވަހު އޭނާ ސިންގަޕޫރަށް ވަޑައިގެންނެވުމުން، އެ ޤައުމުން އޭނާއަށް ހިމާޔަތް ދީފައިވާ ކަމަށް ދެކުނު ވާހަކަތައް އެ ޤައުމުން ވަނީ ދޮގުކޮށްފައެވެ. އޭނާއަށް އޮގަސްޓު މަހުގެ 11 އާ ހަމައަށް އެ ޤައުމުގައި ހުރުމުގެ ހުއްދަ އިތުރު ކޮށްދީފައިވާ ކަމަށް ރިޕޯޓުކޮށްފައި ވީ ނަމަވެސް، އެ ޤައުމުގެ އިމިގްރޭޝަނުން މި ކަން އަދި ކަށަވަރު ކޮށްދީފައެއް ނުވެއެވެ.
”ރާޖަޕަކްސަ ކޮންމެ ވެސް ހިސާބަކުން އެނބުރި ޤައުމަށް ވަޑައިގަންނަވާނެ ކަމަށް ޤަބޫލު ކުރެވެނީ،“ ސްރީލަންކާ ސަރުކާރުގެ ތަރުޖަމާނު ބަންޑުލަ ގުންވަރުދެނަ ވިދާޅުވިއެވެ.
ރާޖަޕަކްސް އިސްތިޢުފާ ދެއްވުމާ ގުޅިގެން އޭނާގެ ދަށުން ބޮޑުވަޒީރުގެ މަޤާމު ފުރުއްވަމުން ގެންދެވި ރަނިލް ވިކްރަމަސިންހަ ވަނީ ރައީސް ކަމުގެ މަޤާމަށް އިންތިޚާބު ކޮށްފައެވެ. ރާޖަޕަކްސަގެ ސަރުކާރަށް ސްރީލަންކާގެ މާލީ ކަންކަން ބެލެހެއްޓުމުގައި ނުކުޅެދުމުގެ ސަބަބުން އެ ޤައުމުގެ އިޤްތިޞާދު ވަނީ ފުން ވަޅުގަނޑަކަށް ވެއްޓިފައެވެ.