އެމެރިކާގައި މިހާރު ކޮވިޑް-19 ޖެހިފައިވާ މީހުންގެ ތެރެއިން 81.9 އިންސައްތަ މީހުންނަށް ބަލި ޖެހިފައި ވަނީ ބީއޭ.5 ސަބްވޭރިއެންޓްގެ ސަބަބުން ކަމުގައި އެ ޤައުމުގެ ސެންޓަރސް ފޯރ ޑިޒީޒް ކޮންޓްރޯލް އެންޑް ޕްރިވެންޝަން (ސީ.ޑީ.ސީ) އިން ބުނެފިއެވެ. ބީއޭ.4 އަދި ބީއޭ.5އަކީ ހަލުވިކަމާ އެކު ފެތުރުމުގެ ކުޅަދާނަ ކަން ލިބިފައިވާ އޮމިކްރޯން ވޭރިއެންޓްއަށް ނިސްބަތްވާ ދެ ސަބްވޭރިއެންޓްއެވެ.
ދުނިޔޭގެ އެކި ކަންކޮޅުތަކުގައި މިހާރު އެންމެ ހަލުވިކަމާ އެކު ފެތުރެމުން ދަނީ ވެސް އޮމިކްރޯންގެ ބީއޭ.5 ސަބްވޭރިއެންޓްއެވެ. މި ސަބްވޭރިއެންޓްގެ ސަބަބުން، ވެކްސިންގެ ޑޯޒްތައް ފުރިހަމަ ކޮށްފައިވާ މީހުންނާއި، ބަލިން ފަސޭހަވެފައިވާ މީހުންނަށް ވެސް ބަލި އަލުން ޖެހުމުގެ ފުރުޞަތު އޮވެއެވެ. ނަމަވެސް، މި ސަބްވޭރިއެންޓްތަކުގެ ސަބަބުން ފުރާނައަށް ނުރައްކާވާ މިންވަރު ދަށް ކަމުގައި ޞިއްޙަތާ ބެހޭ މާހިރުން ބުނެއެވެ.
ސީ.ޑީ.ސީ.އިން ކޮންމެ ހަފުތާއަކު ނެރޭ ތަފާސްހިސާބުތަކުން ދައްކާ ގޮތުގައި، ހުސްވި ހަފުތާގައި ކޮވިޑް ޖެހުނު މީހުންގެ ތެރެއިން 81.9 އިންސައްތަ މީހުންނަށް ބަލި ޖެހިފައި ވަނީ ބީއޭ.5 ސަބްވޭރިއެންޓްގެ ސަބަބުން ކަމަށް ދެއްކި ނަމަވެސް، އެ އަދަދު އޭގެ ކުރީ ހަފުތާގައި ހުރީ 75.9 އިންސައްތައިގައެވެ. އަދި، ހުސްވި ހަފުތާގައި ބީއޭ.4 ސަބްވޭރިއެންޓްގެ ސަބަބުން ކޮވިޑް ޖެހިފައިވާ މީހުންގެ ނިސްބަތަކީ 12.9 އިންސައްތައެވެ.
އޮމިކްރޯންގެ ސަބްވޭރިއެންޓްތައް ހަލުވިކަމާ އެކު ފެތުރެން ފެށުމާ ގުޅިގެން، އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފް.ޑީ.އޭ) އިން ވަނީ، މި ވޭރިއެންޓްތަކަށް ޚާއްޞަ ވެކްސިންތަކެއް އުފެއްދުމަށް ވެކްސިން އުފައްދާ ކުންފުނިތަކަށް ގޮވައިލާފައެވެ. އަދި، އުމުރުން 50 އަހަރުން މަތީގެ މީހުން ވެކްސިންގެ ބޫސްޓަރ ޑޯޒު ފުރިހަމަ ކުރުމަށް ވެސް އެ ޤައުމުގެ ޞިއްޙަތާ ބެހޭ އިދާރާތަކުން ވަނީ ގޮވައިލާފައެވެ.