ޑިމޮކްރެޓިކް ރިޕަބްލިކް އޮފް ކޮންގޯގައި ހަރަކާތްތެރިވާ އ.ދ.ގެ ޞުލްޙަ ބަލަހައްޓާ ފައުޖާ ދެކޮޅަށް މުޒާހަރާ ކުރަމުންދާ މީހުންގެ ތެރެއިން ފަސް މީހުން މަރައިލައިފިއެވެ. ކޮންގޯގެ އިރުމަތީގެ ރަށެއް ކަމުގައިވާ ގޮމާގައި ހިނގި މި ހާދިސާގައި ޢާންމުންގެ 50 އަށްވުރެ ގިނަ މީހުން ޒަޚަމްވިއެވެ.
ކޮންގޯގެ ޢާންމުން އ.ދ.ގެ ޞުލްޙަ ބަލަހައްޓާ ފައުޖާ ދެކޮޅަށް މުޒާހަރާ ކުރަން ފަށާފައި ވަނީ، އެ ޤައުމުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުންގެ ހަމަލާތަކުން އެ ޤައުމުގެ ޢާންމު ރައްޔިތުން ސަލާމަތް ކުރުމަށް އެ ފައުޖުތަކުން ނުކުޅެދިފައިވާ ކަމަށް ބުނެއެވެ. އަދި، މުޒާހަރާ ކުރާ މީހުން ވަނީ އ.ދ.ގެ ފައުޖުތަކުގެ ޢިމާރާތްތަކަށް ގެއްލުންދީ، ބައެއް ޢިމާރާތްތަކުގައި ހުޅު ޖަހައިފައެވެ.
ގޮމާގައި ހަރަކާތްތެރިވަމުން ދިޔަ ރޮއިޓަރސްގެ ނޫސްވެރިޔަކު ވަނީ، މުޒާހަރާ ކުރަމުންދިޔަ މީހުންގެ ތެރެއިން ދެ މީހެއްގެ ގަޔަށް އ.ދ.ގެ ޞުލްޙަ ބަލަހައްޓާ ފައުޖުގެ ސިފައިން ބަޑިޖަހައި މަރައިލި މަންޒަރު ފެނުނު ކަމަށް ރިޕޯޓު ކޮށްފައެވެ. އަދި، މުޒާހަރާ ކުރާ މީހުންނާ ދެކޮޅަށް ކަރުނަ ގޭސް ބޭނުންކޮށްފައިވާ ކަމުގައި ވެސް ރޮއިޓަރސްގެ ނޫސްވެރިޔާ ރިޕޯޓު ކުރިއެވެ.
މި ހާދިސާތަކުގައި ފަސް މީހަކު މަރުވެފައިވާ ކަން ކޮންގޯ ސަރުކާރުގެ ތަރުޖަމާނު ޕެޓްރިކް މުޔާޔާ ވަނީ ކަށަވަރު ކޮށްދެއްވާފައެވެ. ނަމަވެސް، އެ ފަސް މީހުންގެ މަރުވީ ކޮން ބަޔަކު ދިން ހަމަލާއެއްގައި ކަން އޭނާ ސާފުކޮށްދީފައެއް ނުވެއެވެ. މި ހާދިސާތަކާ ގުޅިގެން ކޮންގޯގައި ހަރަކާތްތެރިވާ އ.ދ.ގެ ޞުލްޙަ ބަލަހައްޓާ ފައުޖުން އަދި ވަކި އެއްޗެއް ހާމަކޮށްފައެއް ނުވެއެވެ. އެ ފައުޖުގައި 12,000 ސިފައިންނާއި 1,600 ފުލުހުން ހަރަކާތްތެރިވެއެވެ.