ވިލާތުގެ ޤައުމުތަކަށް ތެލާއި ގޭސް ފޯރުކޮށްދިނުން ހުއްޓައިލާން ނިންމާފައިވާ ކަމަށް ރަޝިޔާއިން ހާމަކޮށްފިއެވެ. އެ ޤައުމުގެ ތެލާއި ގޭސް އުފައްދާ މައި ކުންފުނި ކަމުގައިވާ ގޭޒްޕްރޮމްއިން ބުނީ، އެ ޤައުމުން ވިލާތުގެ ޤައުމުތަކަށް ތެލާއި ގޭސް ފޯރުކޮށްދޭން ބޭނުން ކުރާ ނޯޑްސްޓްރީމް 1 ހޮޅިތައް މެދުވެރިކޮށް ފޯރުކޮށްދޭ ގޭހުގެ މިންވަރު ދުވާލެއްގެ މައްޗަށް 33 މިލިޔަން ކިޔުބިކް މީޓަރަށް ދަށްކުރަން ނިންމާފައިވާ ކަމުގައެވެ.
މި ނިންމުމަށް އަމަލުކުރަން ފަށާނީ ޖުލައި 27 އިން ފެށިގެންނެވެ. ނޯޑްސްޓްރީމް 1 މެދުވެރިކޮށް ރަޝިޔާއިން ވިލާތަށް މިހާރު ވެސް ތެލާއި ގޭސް ފޯރުކޮށްދެނީ 40 އިންސައްތަ މަދުންނެވެ. އަދި، މި ނިންމުމާއެކު، އެ ޤައުމުން ވިލާތުގެ ޤައުމުތަކަށް ފޯރުކޮށްދޭ ތެލާއި ގޭހުގެ މިންވަރު ދެބައިކުޅަ އެއްބަޔަށް މަދުވާނެއެވެ.
ރަޝިޔާއިން ޔޫކްރެއިނަށް އަރައި ހަނގުރާމަ އިޢުލާނު ކޮށްފައި ވަނީ ފެބުރުއަރީ މަހުގެ 24 ވަނަ ދުވަހުއެވެ. އޭގެ ކުރިން، ވިލާތުގެ ޤައުމުތަކުން ބޭނުންކުރާ ގޭހުގެ 40 އިންސައްތައާއި ތެލުގެ 30 އިންސައްތަ ގަންނަނީ ރަޝިޔާއިންނެވެ. ނަމަވެސް، ހަނގުރާމައާ ގުޅިގެން ރަޝިޔާއަށް ދަތިކުރުމުގެ ފިޔަވަޅު އެޅުމުގެ ގޮތުން ވިލާތުގެ ޤައުމުތަކުން ވަނީ ރަޝިޔާގެ ތެލާއި ގޭސް ގަތުން މަދުކޮށްފައެވެ.
ނޯޑްސްޓްރީމް 1 މެދުވެރިކޮށް ދޫކުރާ ތެލާއި ގޭހުގެ މިންވަރު ދަށް ކުރަން ނިންމާފައި ވަނީ މަރާމާތުތަކެއް ކުރުމަށް ކަމުގައި ރަޝިޔާއިން ބުނެއެވެ. ނަމަވެސް، މިއީ އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ގުޅިގެން ބަދަލު ހިފުމުގެ ގޮތުން އަޅާ ފިޔަވަޅެއް ކަމުގައި ވިލާތުގެ ޤައުމުތަކުން ޤަބޫލު ކުރެއެވެ.
މި ކަމާ ގުޅިގެން ވިލާތުގެ ޤައުމުތަކަށް އިޤްތިޞާދީ ގޮތުން ބޮޑެތި ގޮންޖެހުންތަކާ ކުރިމަތިލާން ޖެހޭނެ ކަމަށް ބެލެވެއެވެ. މީގެ ތެރޭގައި ތެލާއި ގޭހުގެ އިތުރުން ކާބޯތަކެއްޗާއި އެހެނިހެން ޒަރޫރީ ތަކެތީގެ އަގުތައް އުފުލުން ހިމެނެއެވެ. ރަޝިޔާ-ޔޫކްރެއިން ހަނގުރާމައާ ގުޅިގެން މިހާރު ވެސް ތަކެތީގެ އަގުތައް ދަނީ އުފުލެމުންނެވެ. މީގެ ތެރެއިން ވެސް، އެ ދެ ޤައުމުން ގޮވާން އެކްސްޕޯޓު ކުރާ މިންވަރު ދަށްވެ، އެ ތަކެތީގެ އަގު ވަނީ ބޮޑު ތަނުން އުފުލިފައެވެ.
ތެލާއި ގޮވާމުގެ އަގުތައް އުފުލުމާ އެކު، އެތައް ޤައުމަކަށް ވަނީ ކާބޯތަކެތީގެ ރައްކާތެރި ކަން ކަށަވަރު ކުރުމަށް ގޮންޖެހުންތަކާ ކުރިމަތިލާން ޖެހިފައެވެ. އަދި، ފަގީރު ޤައުމުތަކުގައި ދިރިއުޅޭ އެތަކެއް މިލިޔަން މީހުންނަށް ވަނީ ބަނޑުހައިހޫނު ކަމުގެ ބިރާ ކުރިމަތިލާން ޖެހިފައެވެ. މިއީ، ދެވަނަ ބޮޑު ހަނގުރާމައަށް ފަހު މުޅި ދުނިޔެއަށް ކުރިމަތިވެފައިވާ އެންމެ ބޮޑު ކާރިސާގެ ގޮތުގައި ބެލެވެއެވެ.
ޔޫކްރެއިނުގެ ބަނދަރުތަކުން ގޮވާމުގެ ބާވަތްތައް އެކްސްޕޯޓު ކުރުމުގެ މަސައްކަތް އަލުން ފެށުމަށް އެ ދެ ޤައުމުން ވަނީ ހުސްވި ހަފުތާގައި އެއްބަސްވެފައެވެ. އަދި، މި އެއްބަސްވުމުގެ ދަށުން ގޮވާމުގެ ފުރަތަމަ ޝިޕްމަންޓް ޖުލައި 29 ގައި ފުރުވައިލުމަށް ޔޫކްރެއިނުން ދަނީ ތައްޔާރު ވަމުންނެވެ.
ނަމަވެސް، ޔޫކްރެއިނުގެ ބަނދަރުމަތީ ރަށެއް ކަމުގައިވާ އޮޑެސާގެ ބަނދަރަކަށް ރަޝިޔާ ސިފައިން ހުސްވި ހަފުތާ ބަންދުގައި ދިން ވަރުގަދަ މިސައިލް ހަމަލާތަކަކާ ގުޅިގެން މި އެއްބަސްވުމަށް ވަނީ ހީނަރުކަން އައިސްފައެވެ. އަދި، އ.ދ. އިން އިސްނަގައިގެން ތުރުކީ ވިލާތުގެ އެހީތެރިކަމާ އެކު ހަދާފައިވާ މި އެއްބަސްވުމަށް އިޙުތިރާމު ކުރުމަށް ރަޝިޔާއަށް ބާރު އެޅުމަށް ޔޫކްރެއިނުން ވަނީ ގޮވައިލާފައެވެ.