މާޅޮސްމަޑުލު އުތުރުބުރީ ދުވާފަރު ކައުންސިލް އިދާރާގެ ހިންގުމުގައާއި ފައިސާގެ މުއާމަލާތްތައް ކުރުމުގައި ކޮރަޕްޝަނާ ވައްކަމުގެ މައްސަލަތައް ހުރިކަން މޮނިޓަރިން ރިޕޯޓުން ހާމަވެފައިވާތީ، އެކަމުގައި ޝާމިލުވާ ފަރާތްތަކާ މެދު ފިޔަވަޅު އެޅުމަށް އެލްޖީއޭއިން ތަޙުޤީޤީ އިދާރާތަކުގައި އެދިއްޖެއެވެ.
ލޯކަލް ގަވަމަންޓް އޮތޯރިޓީން ވިދާޅުވީ ދުވާފަރު ކައުންސިލްގައި ބޮޑެތި ޚިޔާނަތްތަކެއް ހިންގަމުންދާކަމުގެ ޝަކުވާ ލޯކަލް ގަވަމަންޓް އޮތޯރީއަށް ހުށައަޅަމުން ދިޔަކަމަށެވެ. އަދި މިކަމާއި ގުޅިގެން އެލްޖީއޭގެ ޓީމެއް ދުވާފަރަށް ދަތުރުކޮށް ކުރެވުނު ޚާއްސަ މޮނިޓަރިންގެ ތެރެއިން ފާހަކަކުރެވުނު އެންމެހާ މައްސަލަތައް ހިމެނޭ ރިޕޯޓް ތައްޔާރުކޮށް، އެލްޖީއޭގެ ބޯޑުން ފާސްކޮށް އެ ރިޕޯޓް އޮތޯރިޓީގެ ވެބްސައިޓްގައި މިހާރު ވަނީ ޝާއިޢުކޮށްފައެވެ.
މި ރިޕޯޓްގައި އެންމެ ބޮޑަށް ފާހަގަކޮށްފައިވަނީ ކައުންސިލްގެ ތެރޭގައި ނަހަމަ ގޮތުގައި ކޮށްފައިވާ ފައިސާގެ މުއާމަލާތްތަކެވެ. އެގޮތުން ޒަކާތު ފައިސާއަށް ޚިޔާނާތްތެރިވުމާއި، ބިޑް ކުރުމާއި ނުލާ ކައުންސިލްގެ މުވައްޒަފުންގެ މަސްލަހަތު އޮންނަ ގޮތަށް މަސައްކަތްތައް ހަވާލުކުރުމާއި އަދި ލިޔެކިޔުން ނެތް ފައިސާގެ އެތަށް މުޢާމާލަތްތަކެއް ކޮށްފައިވާކަން ވަނީ ފާހަގަކޮށްފައެވެ. މި މުޢާމަލާތްތަކުގައި ކައުންސިލްގެ ޑިރެކްޓަރާއި ކައުންސިލްގެ ރައީސްއާއި މެންބަރުންނާ އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ކޮންޓްރެކްޓް މުވައްޒަފުންނަށްވެސް ފައިސާ ޖަމާކޮށްފައިވާކަމަށް އެލްޖީއޭގެ ރިޕޯޓްގައިވެއެވެ. އަދި ލިޔެކިޔުންނެތި ކައުންސިލްގެ ފައިސާ އެތައް ލައްކަ ރުފިޔާއެއް ކައުންސިލްގެ މުވައްޒަފުންގެ އެކައުންޓްތަކަށް، ޖަމާކޮށްފައިވާކަމަށް އެ ރިޕޯޓްގައިވެއެވެ.
އެލްޖީއޭއިން ވިދާޅުވީ ރިޕޯޓް އާއްމުކުރުމުގެ ކުރިން، މޮނިޓަރިންގެ ތެރެއިން ފާހަގަވި މައްސަލަތަކަށް އާއްމު އުޞޫލުގެ ތެރެއިން ޖާވާބުދާރީވުމަށް، ކައުންސިލަށް ދޭންޖެހޭ އެކަށީގެންވާ މުއްދަތުވެސް ދީފައިވާކަމަށެވެ. އަދި އެލްޖީއޭއިން މިހާރު ވަނީ ރިޕޯޓްގައި ފާހަގަކުރެވުނު މައްސަލަތައް ތަޙުޤީގުކޮށް، އިޙުމާލުވެފައިވާ ފަރާތްތަކަށް ފިޔަވަޅު އެޅުމަށް އެދި ތަހުގީގީ އިދާރާތަކުގައި އެދިފައެވެ. އަދި ދުވާފަރު ކައުންސިލްގެ އިންކުއަރީއެއް ހެދުމުގެ މަސައްކަތްވެސް އެލްޖީއެން ވަނީ ފަށާފައެވެ.
މިކަމާއި ގުޅޭގޮތުން ދުވާފަރު ކައުންސިލުގެ ފަރާތުން ވާހަކަ ދައްކާފައެއް ނުވެއެވެ.