މުޖުތަމަޢުގެ ބައިބައިވުމާއި ދެބަސްވުމާއި ހަމަނުޖެހުމާއި ހައިޖާނަކީ ޤައުމެއް މިނިވަންކަން ރަމްޒުކޮށްދޭ އެއްޗެއް ނޫންކަމަށާއި، މިނިވަންކަމަކީ އަޑުއެހުމާއި މަޝްވަރާއާއި އިޙުތިރާމުން މެނުވީ ގެނެވޭނެ އެއްޗެއް ނޫންކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު މިހެން ވިދާޅުވީ ދިވެހިރާއްޖޭގެ މިނިވަން ދުވަހުގެ މުނާސަބަތުގައި ދިވެހި ޤައުމާއި މުހާތަބްކުރައްވާ ދެއްކެވި ވާހަކަފުޅުގައެވެ.
މިނިވަން ދުވަހުގެ މުނާސަބަތުގައި ދިވެހި ޤައުމާއި މުހާތަބްކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ ޤައުމަށް ދިމާވާ ކޮންމެ ގޮންޖެހުމަކުން އަރައިގަތުމަށް މުޅި މުޖުތަމަޢު އެކަތިގަނޑެއްގެ ގޮތުގައި މަސައްކަތްކޮށް އެކަންކަމުން އަރައިގަތުމަށް މަސައްކަތްކުރަންޖެހޭކަމަށެވެ. އަދި މިއީ ދިވެހިން އަޅުވެތިކަމަށް ދިޔަ ކޮންމެ ޙާދިސާއަކުންވެސް ލިބިގަންނަންޖެހޭ ފިލާވަޅުކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ޕޯޗިގީޒުންގެ އަޅުވެތިކަމުން ދިވެހިން ސަލާމަތްކުރުމަށް ޤާޒީ ބަންޑަރައިން ވެވަޑައިގެންނެވި ޤުރުބާނީއާ، ހަސަން އިއްޒުއްދީން ޤައުމީ ޖިހާދަށް ނިކުންނަވާ ޤައުމުގެ މިނިވަންކަން ހޯއްދަވައިދެއްވުމަށް ވެވަޑައިގެންނެވި ޤުރުބާނީއާއި އިސްތިއުމާރީ ގަދަ ބަރުތަކުން ރާއްޖެ ސަލާމަންތްކުރެއްވުމަށް ބޮޑުވަޒީރު އިބްރާޙމް ނާޞިރު ކުރެއްވި މަސައްކަތްޕުޅަކީ އެތައް އިބުރަތަކާއި ފިލާވަޅެއް މިއަދުގެ ޖީލަށް ލިބިގެންދާ ޙާދިސާތަކެއްކަމަށެވެ.
ރައީސް ވިދާޅުވީ ދިވެހިރާއްޖެ މިގޮތުގައި އޮތުމަށް ލިބިގެންދިޔަ އެންމެ އަގުބޮޑު ޙިދާޔާތަކީ އިސްލާމްދީނުގެ ޙިދާޔަތްކަމަށާއި މިއީ ރާއްޖޭގެ މިނިވަންކަމުގެ ސިޔާދަތާ އިސްތިޤުލާލް ބަނދެވިފައިވާ އެންމެ މުހިންމު އަސާސްކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ ދިވެހިންނަކީ ފެށުނީއްސުރެވެސް މިިނިވަކަމަށް ލޯބިކުރާ އެކަމަށް ވާންޖެހުނު ކޮންްމެ ޤުރުބާނީއެއްވި ބައެއްކަން، ދިވެހި ގަދީމީ ތާރީޚުން ފުރިހަމައަށް ފެންނަން އޮތްކަމަށެވެ.
"އެދޭގޮތާ ދެކޭގޮތާ ޤައުމޫލުތާގޮތާ އެކީގައި ކަންކަމުގައި ޚިޔާލު ތަފާތުވުމަކީ އިންސާނީ ތަބީއަތް. ކޮންމެ ބައެއް ވިއަސް އެއީ އެކަން އޮންނަ ގޮތް. މިނިވަންކަމުގެ ރާއްސާ އަމާންކަމާ އޮމާކަމުގައި ގަރާރުވެ ދެމި އޮތުމަށް މިދެންނެވި ހުރިހާ ތަފާތެއް އެއްފަރާތް ކުރަންޖެހޭ. ސަބަބަކީ މިނިވަންކަމުގެެ އުފަލާ އޭގެ އަސަރާ ރަހަ، އެހެން ހުރިހާ އިހުސާސުތަކަކާ ތަފާތު." ރައީސްގެ ޚިތާބުގައި ވިދާޅުވިއެވެ.
ރައީސް ވިދާޅުވީ ދާޚިލީ ހަމަޖެހުމާއި އެއްގޮތަށް ޚާރިޖީ ހަމަޖެހުމަކީވެސް އެހާމެ މުހިންމު އެއްޗެއްކަމަށެވެ. އަދި މި ސަރުކާރުގެ ކޮންމެ ސިޔާސަތަކީ ރާއްޖޭނެ މިނިވަންކަމާއި ތަރައްޤީއާއި ކުރިއެރުމަށް ލާބަހުރި ފަހި ސިޔާސަތެއްކަމަށާއި ޤައުމެއްގެ ސިޔާދަތީ މިނިވަންކަމަކީ ބައިނަލްއަޤްވާމީ ގޮތުން ދުނިޔޭގެ އާއިލާއާއެކު ގުޅިގެން އުޅުމަށް ލިބޭނެ އެންމެ ބޮޑު ފަހިކަންކަމަށް ރައީސް ވިދާޅުވިއެވެ.
"މި ސަރުޚާރު ޚާރިޖީ ސިޔާސަތު ދިނުިގެ ބަލައިގެންފައިވާ ތިލަފަތް ހަމަ ޚާރިޖީ ސިޔާސަތެއް. ގައުމުތަކާއެކު އޮންނަ ގުޅުން މިހާރު ބަދަލުވެއްޖެ. ބައިނަލްއަޤްވާމީ މަސްރަހުގައި ރާއްޖެ އަދާކުރާ ދައުމު މިކަންކަމަށް ހެކިވެދޭނެ" ރައީސް ވިދާޅުވިއެވެ.
ރައީސް ވިދާޅުވީ ޚާރިޖީ ތަރުތީބު ހިންގަންޖެހޭނީ ދިވެހިރާއްޖޭގެ ސަލާމަތާ ރައްކާތެރިކަމަށް އެންމެ މަންފާ ބޮޑު ގޮތަށްކަމަށެވެ. އަދި ރާއްޖޭގެ ޤައުމުގެ ހިމާޔަތުގައި ސަލާމަތީ ބާރުތަކުން ކުރައްވަމުންދާ ބުރަ މަސައްކަތް ފާހަގަކުރަވައި، ރައީސް ވިދާޅުވީ މިނިވަން ނަގާލުމަށް ހިމަ ނަރެއްގެ މިންވަރުވެސް ރާއްޖޭގެ ދިފާޢީ ބާރުތަކުން ދޫނުކުރައްވާނެކަމަށެވެ.