އިސްރާޢީލުގެ ޔަހޫދީ ސިފައިން ފަލަސްތީނުގެ މަސްދޯންޏަކަށް ހަމަލާދީފިއެވެ. ޔަހޫދީ ސިފައިން ހަމަލާދީފައި ވަނީ ޣައްޒާގެ އައްސޭރިފަށުގައި މަސްވެރިކަމުގައި ހަރަކާތްތެރިވަމުން ދިޔަ އުޅަނދަކަށެވެ. މި ހަމަލާގައި އެ އުޅަނދުގައި ތިބި ދެ މަސްވެރިންނަށް އަނިޔާވެފައެއް ނުވެއެވެ.
ފަލަސްތީނުގެ މަސްވެރިން ތަމްސީލު ކުރާ ޖަމުޢިއްޔާއިން ބުނީ މަސްދޯންޏަށް އިސްރާޢީލުގެ ކަނޑުގެ ސިފައިން ހަމަލާ ދިނުމުގެ ކުރިން އެ މީހުން އުޅަނދު ދޫކޮށް، ކަނޑަށް ފުންމައިލާ، ފަތާފައި އެއްގަމަށް އަރާފައިވާ ކަމުގައެވެ. ހަމަލާތަކުގައި އުޅަނދުގައި ރޯވެ، އެއްކޮށް ހަލާކުވެފައިވާ ކަމުގައި ވެސް އެ ޖަމުޢިއްޔާއިން ބުންޏެވެ.
ޔަހޫދީންގެ ކަނޑުގެ ސިފައިން ބުނީ، މަސްދޯންޏަށް ހަމަލާދީފައި ވަނީ އެ މީހުންގެ އެންގުންތަކަށް އިހުތިރާމު ނުކުރުމުގެ ސަބަބުން ކަމަށެވެ. އަދި، އެ އުޅަނދަކީ މިޞްރު މަގުން ޣައްޒާއަށް ހަތިޔާރު އެތެރެ ކުރަން މަސައްކަތް ކުރަމުން ދިޔަ އުޅަނދެއް ކަމަށް އިސްރާޢީލުން ތުހުމަތު ކުރެއެވެ. މިއީ އިސްރާޢީލުން މި ފަދަ ތުހުމަތުތަކެއް ކޮށް، ފަލަސްތީނުގެ މަސްދޯންޏަކަށް ހަމަލާ ދީފައިވާ ފުރަތަމަ ފަހަރެއް ނޫނެވެ.
އުޅަނދުގައި ތިބި ދެ މަސްވެރިންގެ ފުރާނަ ސަލާމަތްވެފައި ވީ ނަމަވެސް، ޔަހޫދީ ސިފައިން އާދީއްތަ ދުވަހު ހުޅަނގުގެ އައްސޭރީގެ ނާބުލުސްގެ ގެޔަކަށް ވަދެ ދިން ވަރުގަދަ ހަމަލާތަކެއްގައި ފަލަސްތީނުގެ ދެ މީހުން ވަނީ ޝަހީދު ކޮށްލާފައެވެ. މި ހަމަލާގައި މުސްލިމުންގެ އިތުރު ހަ މީހަކު ޒަޚަމްވި ކަމުގައި ފަލަސްތީނުގެ ޞިއްޙަތާ ބެހޭ ވުޒާރާއިން ބުންޏެވެ.