އެމެރިކާގެ ކޮންގްރެސްގެ އިސް ބޭފުޅުން ހިމެނޭ ވަފުދެއް ޔޫކްރެއިނަށް ޒިޔާރަތްކޮށް އެ ޤައުމުގެ ރައީސް ވޮލޮޑޮމީރް ޒެލެންސްކީއާ ބައްދަލު ކުރައްވައިފިއެވެ. މި ދަތުރަކީ، ޔޫކްރެއިނަށް ދެމުންދާ އެއްބާރުލުން މެދުކެނޑުމެއް ނެތި ކުރިއަށްދާނެ ކަމުގެ ޔަޤީންކަން އަރުވަން ކުރި ދަތުރެއް ކަމުގައި ވަފުދުން ބުނެއެވެ.
މި ވަފުދުގައި އެންމެ އިސްކޮށް ހުންނެވީ ކޮންގްރެސްގެ އަސްކަރިއްޔާއާ ބެހޭ ކޮމިޓީގެ މުޤައްރިރު އެޑަމް ސްމިތެވެ. ”ޔޫކްރެއިނަށް އިޤްތިޞާދީ، އަސްކަރީ، އަދި އިންސާނީ ގޮތުން އެހީތެރިކަން ފޯރުކޮށްދިނުމުގައި ހުޅަނގުން ދެމި އޮންނާނެ،“ ވަފުދުން ނެރުނު ބަޔާނެއްގައި ބުންޏެވެ.
”ރައީސް ޒެލެންސްކީއާއި ޔޫކްރެއިނުގެ ރައްޔިތުން ހިތްވަރާއެކު ކުރަމުންދާ ހަނގުރާމައިގެ ފަހަތުގައި އެހީތެރިކަން ފޯރުކޮށްދޭން ދެމި ތިބޭނަން.“ ސްމިތު ވަނީ، ޔޫކްރެއިނަށް އިތުރު އަސްކަރީ އެހީ ފޯރުކޮށްދޭން އެމެރިކާއިން ތައްޔާރު ވަމުންދާ ކަމުގައެވެ.
އެމެރިކާގެ ދިފާޢީ ވަޒީރު ލޮއިޑް އޮސްޓިން ވިދާޅުވީ، ހައިމާސް މަރުކާގެ އިތުރު ހަތަރު ރޮކެޓް ސިސްޓަމް ފޮނުވަން ތައްޔާރު ވަމުންދާ ކަމުގައެވެ. އެ ސިސްޓަމްތަކާއެކު އެމެރިކާއިން ޔޫކްރެއިނަށް ދީފައިވާ ހައިމާސް ސިސްޓަމްތަކުގެ އަދަދު 16 އަށް އަރާނެއެވެ.