ލީބިޔާގެ ވެރިރަށް ތަރާބުލުސްގައި ހަތިޔާރު އެޅި ދެ ފެކްޝަނެއްގެ މެދުގައި ހިނގި ހަމަނުޖެހުންތަކެއްގައި 13 މީހުން މަރުވެއްޖެއެވެ. މި ހަމަނުޖެހުންތައް ހިނގާފައި ވަނީ، އެ ޤައުމުގައި އެކުލަވައިލާފައިވާ ވަގުތީ ގުޅިފައިވާ ސަރުކާރަށް ތާޢީދުކުރާ ހަތިޔާރު އެޅި ގުރޫޕުތަކާއި، އެ ޤައުމުގެ ޤާނޫނު ހަދާ މަޖިލީހުން އެކުލަވައިލާފައިވާ ވަކި ސަރުކާރަކަށް ތާޢީދުކުރާ ހަތިޔާރު އެޅި ޖަމާޢަތްތަކާ ދެމެދެވެ.
އ.ދ.އިން އިސްވެ އޮވެ އެކުލަވައިލާފައިވާ ވަގުތީ ސަރުކާރުގެ ބޮޑުވަޒީރަކީ ޢަބްދުލްޙާމިދު އަލްދުބައިބާއެވެ. އަދި، ޤާނޫނު ހަދާ މަޖިލީހުން އެކުލަވައިލާފައިވާ ސަރުކާރުގެ ބޮޑުވަޒީރެއްގެ ގޮތުގައި ކަނޑައަޅާފައި ވަނީ ފާތީ ބަޝާޣާއެވެ. އަލްދުބައިބާއަށް ތާޢީދުކުރާ ޖަމާޢަތްތަކުން ދަނީ، ބަޝާޣާއަށް ތުރާބުލުސްއަށް ވަނުމަށް ހުރަސް އަޅަމުންނެވެ. ބަޝާޣާއަކީ ލީބިޔާގެ އިރުމަތީގެ ސަރަޙައްދުތަކުގައި ހަރަކާތްތެރިވާ ހަނގުރާމަވެރިންގެ ޖަމާޢަތެއް ކަމުގައިވާ ލީބިޔަން ނޭޝަނަލް އާމީ (އެލް.އެން.އޭ)ގެ އިސްވެރިޔާ ޚަލީފާ ޙަފްތާރަށް ވާގިވެރިވާ ބޭފުޅެކެވެ.
މި ދެ ފެކްޝަނުން ވެސް މަސައްކަތް ކުރަމުން ދަނީ ވަގުތީ ސަރުކާރު ހިންގުމުގެ ޒިންމާތައް މަތިކޮށްފައިވާ ޕްރެޑިޒެންސީ ކައުންސިލުގެ ބާރުވެރިކަން ހޯދުމަށެވެ. އެއީ، ތިން މީހުންގެ މައްޗަށް އެކުވެލިގެންވާ ކައުންސިލެކެވެ. އެ ހަމަނުޖެހުންތައް ހިނގާފައި ވަނީ ތަރާބުލުސްގައި ސަރުކާރާއި، ބޭރު ޤައުމުތަކާއި ބައިނަލްއަޤްވާމީ ޖަމުޢިއްޔާތަކުގެ އޮފީސްތައް ހުންނަ ސަރަޙައްދެއްގައެވެ. އަދި މިޓިގާ އެއަރޕޯޓުގައި ވެސް ވަރުގަދަ ކުރިމަތިލުންތަކެއް ހިނގާފައިވެއެވެ. މި ހަމަނުޖެހުންތަކުގައި 27 މީހަކު ޒަޚަމްވިއެވެ. އަދި، މަރުވި މީހުންގެ ތެރޭގައި ޢާންމުންގެ ތިން މީހުން ހިމެނޭ ކަމުގައި އެ ޤައުމުގެ ދާޚިލީ ވުޒާރާއިން ބުނެއެވެ.
ހަމަނުޖެހުންތަކާ ގުޅިގެން ބޮޑުވަޒީރު އަލްދުބައިބާ ވަނީ ދާޚިލީ ވަޒީރު މަޤާމުން ވަކިކޮށް، އެ މަޤާމަށް އައު ބޭފުޅަކު ޢައްޔަން ކުރައްވާފައެވެ. ހަމަނުޖެހުންތަކަށް ފަހު ތުރާބުލުސްގެ ހާލަތު މިހާރު ރަނގަޅު ވެފައި ވީ ނަމަވެސް، އަދިވެސް ދޭތެރެދޭތެރެއިން ބަޑީގެ ހަމަލާތަކުގެ އަޑު އިވެމުންދާ ކަމަށް ރިޕޯޓްތައް ބުނެއެވެ.
އަލްދުބައިބާގެ ސަރުކާރަށް މާލީ ގޮތުން ދަތި ކުރުމުގެ ގޮތުން ޙަފްތާރުގެ ހަނގުރާމަވެރިން ވަނީ އެ ޤައުމުން ތެޔޮ ބޭރު ކުރުމަށް ހުރަސް އަޅާފައެވެ. ނަމަވެސް، ދާދިފަހުން އަލްދުބައިބާ ވަނީ ސަރުކާރުގެ ތެޔޮ ކުންފުނީގެ އިސްވެރިޔާގެ މަޤާމަށް ޙަފްތާރުގެ ގާތް އެކުވެރިއެއް ޢައްޔަންކޮށް، އެ މައްސަލައަށް ހައްލެއް ހޯދާފައެވެ.
އަލްދުބައިބާ ވެރިކަމުގައި ދެމި ހުރުމަށް ޙަފްތާރާއެކު އެއްބަސްވުމެއް ހަދާފައިވާ ކަމަށް ރިޕޯޓުތައް ބުނެއެވެ. އަދި، އެލް.އެން.އޭ.ގެ އިސްވެރިޔަކު މި ހަފުތާގައި ވަނީ ތުރާބުލުސްއަށް ގޮސް، 2020 ވަނަ އަހަރު އެކުލަވައިލި ހަމަލާ ބަދަލުކުރުން ހުއްޓައިލުމާ ގުޅޭ އެއްބަސްވުން ދެމެހެއްޓުމާ ގުޅޭ ގޮތުން މަޝްވަރާ ކޮށްފައެވެ.