ރާއްޖެ ޓްރާންސްޕޯޓް ލިންކް ފެރީ ޚިދުމަތް، މިމަހުގެ 31ވަނަ ދުވަހު ށ.އަތޮޅުގައި ފަށާނެކަމަށް އެމްޓީސީސީން ވިދާޅުވެއްޖެއެވެ. ފުރަތަމަ ކުރިއަށްދާނީ 1 ހަފްތާގެ ޓްރައިލް ދަތުރުތަކެވެ.
އާރްޓީއެލްގެ ފެރީގެ ޚިދުމަތަކީ ރާއްޖެ 3 ޒޯނަށް ބަހާލައިގެން ކުރިއަށްގެންދާ ޚިދުތެކެވެ. މިހާތަނަށް މި ޚިދުމަތް ފަށާފައިވަނީ ޒޯން 1ގައި ހިމެނެނޭ ހއ، ހދ، އަދި ށ އަތޮޅުގެ ތެރެއިން ހއ، އާއި ހދ، އަތޮޅުގައެވެ. އަދި އެމްޓީސީސީން މިހާރު ދަނީ ށ.އަތޮޅުގައި ޚިދުމަތް ފެށުމުގެ އެންމެ ފަހުގެ ތައްޔާރީތައް ވަމުންނެވެ.
ށ.އަތޮޅުގައި ޚިދުމަތް ފެށުމަށް ބޭނުންވާ 4 ފެރީގެ ބަނުމުގެ މަސައްކަތް ނިމި، ފެރީތައް އަތޮޅަށް ފޮނުވާލުމުގެ ތައްޔާރީތައް މިހާރު ދަނީ ކުރިއަށެވެ. އެގޮތުން މި ފެރީތައް މިމަހުގެ 29ވަނަ ދުވަހު ފޮނުވާލުމަށް ހަމަޖެހިފައިވާކަމަށް އެމްޓީސީސީން ވިދާޅުވިއެވެ.
އަތޮޅުގައި ފެރީގެ ޓްރައިލް ދަތުރުތައް ފަށާނީ މިމަހުގެ 31ވަނަ ދުވަހުއެވެ. އަދި ހަފްތާއެއްގެ ތެރޭގައި ރަސްމީކޮށް ދަތުރުތައް ފަށާނެއެވެ. މިހާރު ކުރިއަށްދާ މަސައްކަތްތަކުގެ ތެރޭގައި ރޫޓްތައް ކަނޑައެޅުމާ ދަތުރުތަކުގެ އަގުތައް ކަނޑައެޅުމުގެ މަސައްކަތް ހިމެނެއެވެ. ސަރުކާރުން އާރްޓީއެލްގެ އަގުތައް ހަދާފައިވަނީ، ސަރުކާރުން ސަބްސިޑައިޒްކޮށް ވީހާވެސް ކުޑަ އަގެއްގައެވެ.
ށ.އަތޮޅުގައި ފެރީގެ ޚިދުމަތް ފެށުމާއެކު ޒޯން 1ގެ ހުރިހާ އަތޮޅެއްގައި ޚިދުމަތް ފެށުނީއެވެ. މި ދަތުރުތައް އަތޮޅުގެ ރަށްތަކާއި، އަދި އެއް އަތޮޅު އަނެއް އަތޮޅާ ދެމެދުވެސް އަންނަނީ ބާއްވަމުންނެވެ.
ޒޯން 1ގެ ޚިދުމަތުގައި ޖުމްލަ 13 ލޯންޗް ބޭނުންކުރާނެއެވެ. އަދި ބެކަޕް ލޯންޗުތައްވެސް ހިމެނެއެވެ.
ފެރީގެ ޚިދުމަތް ދޭއިރު، ރަށްރަށުގައި ފެރީ ސްޓޮޕްތަކާ ޓަރމިނަލްތައްވެސް ހުންނާނެއެވެ. އެއީ އަތޮޅުތަކުގެ މައި ރަށްތަކުގައި ޓަރމިނަލްއާއި، އަދި އެހެން ހުރިހާ ރަށްތަކުގެ ބަނދަރުގައި ހަދާ ފެރީ ސްޓޮޕްތަކެވެ. މި ޓަރމިނަލްތަކާ ސްޓޮޕްތަކުގައި މަޑުކޮށްލައިގެން ތިބޭ އޭރިއާއާއި ފާޚާނައާއި ކުޑަ ފިހާރައެއް ހުންނާނެއެވެ.
އާރްޓީއެލްގެ ޚިދުމަތްތައް ފަސޭހަކުރުމުގެ ގޮތުން، އޮންލައިންކޮށް ޓިކެޓް ނެގޭނެ އެޕްލިކޭޝަނެއް ވަނީ ބޭނުންކުރަން ފަށާފައެވެ. މިއާއެކު ކުރިއާލާ ޓިކެޓް ބުކް ކުރެވޭނެއެވެ. ރާއްޖެ ޓްރާންސްޕޯޓް ލިންކުގައި ހިމަނައިގެން ހައި ސްޕީޑް ފެރީ ނިޒާމަކުން މުޅި ރާއްޖެ ގުޅާލާނެއެވެ. އަތޮޅާއި ޒޯން ފެރީތައްވެސް ހިމެނެއެވެ.