އެމެރިކާއިން ސޮމާލިޔާގައި ދިން ވައިގެ ހަމަލާއެއްގައި އަލްޝަބާބް ޖަމާޢަތަށް ނިސްބަތްވާ ދެ މީހުން މަރައިލައިފިއެވެ. މި ހަމަލާ ދީފައި ވަނީ ސޮމާލިޔާގެ ދެކުނުގައިވާ ޖުބުލަންޑް ސްޓޭޓްގައެވެ. މި ހަމަލާގައި ޢާންމުންގެ އެއްވެސް މީހަކަށް އަނިޔާވެފައި ނުވާ ކަމަށް ޔޫ.އެސް.-އެފްރިކާ ކޮމާންޑްއިން ބުނެއެވެ.
އަލްޝަބާބަކީ އަލްޤައިދާއާ ގުޅުން އޮންނަ ހަތިޔާރު އެޅި ޖަމާޢަތެކެވެ. އެމެރިކާގެ އެއްބާރުލުން އޮތް ސޮމާލިޔާގެ ސަރުކާރާ ދެކޮޅަށް އެ ޖަމާޢަތުން ދަނީ ހަނގުރާމަ ކުރަމުންނެވެ. ހަނގުރާމަވެރިންގެ އަމަލުތައް ހުއްޓުވުމަށް އެމެރިކާއިން ދަނީ ސޮމާލިޔާގައި ހަރަކާތްތެރިވަމުންނެވެ. އަދި، އަލްޝަބާބުގެ އަމާޒުތަކަށް ވައިގެ ހަމަލާތައް އަމާޒު ކުރަމުންނެވެ.
ނަމަވެސް، އެމެރިކާއިން ދޭ މިފަދަ ވައިގެ ހަމަލާތަކަށް އިންސާނީ ޙައްޤުތައް ހިމާޔަތް ކުރަން މަސައްކަތް ކުރާ ޖަމުޢިއްޔާތަކުގެ ނުރުހުން ވަނީ އަމާޒުވެފައެވެ. އެ ޖަމުޢިއްޔާތަކުން ތުހުމަތު ކުރާ ގޮތުގައި، އެމެރިކާގެ މިފަދަ ހަމަލާތަކުގައި ޢާންމުންނަށް ގެއްލުން ނުވާކަން ކަށަވަރު ކުރާނެ އެއްވެސް ނިޒާމެއް ޤާއިމުވެފައެއް ނެތެވެ.
އަދި، ސޮމާލިޔާގައި އެމެރިކާއިން މިފަދަ އޮޕަރޭޝަންތައް ހިންގަމުން ދަނީ ސިއްރިޔާތުގައި ކަމަށާއި، އެމެރިކާގެ ވައިގެ ސިފައިންގެ ހަމަލާތަކަށް އެ ޤައުމު ޖަވާބުދާރީ ކުރެވޭނެ އެއްވެސް ނިޒާމެއް ވެސް ނެތް ކަމުގައި އެ ޖަމުޢިއްޔާތަކުން ބުނެއެވެ.