އިންޓަރނޭޝަނަލް ޔޯގާ ދުވަސް ފާހަގަކުރުމަށް ގަލޮޅު ދަނޑުގައި މިދިޔަމަހުގެ 21 ވަނަ ދުވަހު ކުރިއަށްގެންދިޔަ ހަރަކާތަށް ހުރަސް އަޅައި، ހަމަނުޖެހުން ހިންގި މައްސަލައިގައި ހައްޔަރުކުރި މީހުންގެ ތެރެއިން 6 މީހަކު ދޫކޮށްލައިފިއެވެ.
ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ހުރަސް އަޅައި، ހިންގި ހަމަނުޖެހުމާއި ގުޅިގެން ޖުމްލަ 21 މީހަކު ހައްޔަރުކުރިއެވެ. އޭގެތެރޭގައި ބައެއް ދީނީ އިލްމުވެރިންނާއި ސިޔާސީ ޕާޓީތަކުގެ އިސް ބޭފުޅުންވެސް ހިމެނެއެވެ.
ފުލުހުން ވިދާޅުވީ ހަމަނުޖެހުމާއި ގުޅިގެން ހައްޔަރުކުރި ބައެއް މީހުން ދޫކޮށްލީ ބަލަންޖެހޭ ކަންކަން ބެލުމަށް ފަހުކަމަށެވެ. އަދި އެ މީހުން ދޫކޮށްލިޔަސް ޖިނާއީ ތަހުގީގު ކުރިއަށްދާނެކަމަށް ފުލުހުން ވިދާޅުވިއެވެ. ނަމަވެސް ހައްޔަރުކުރި މީހުންގެ ތެރެއިން ދޫކޮށްލި މީހުންގެ އެއްވެސް މައުލޫމާތެއް ފުލުހުން ހާމައެއް ނުކުރައްވައެވެ.
ޔޯގާ ހަރަކާތަށް ހުރަސް އެޅުމަށް ހިންގި ހަމަނުޖެހުމުގެ މައްސަލަ ސީރިއަސް މައްސަލައެއްގެ ގޮތުގައި ބަލަމުންދާއިރު، އެކަން ހިނގައިދިޔަ ގޮތް ބެއްލެވުމަށް ވަޒީރުންގެ މަޖިލީހުގެ ހާއްސަ ކޮމިޓީއެއްވެސް ވަނީ އެކުލަވާލާފައެވެ. މީގެއިތުރުން ހަމަނުޖެހުން ކޮންޓްރޯލްކުރުމުގައި ފުލުހުން އިހުމާލުވެފައިވާއިރު އެކަމުގައި ފުލުހުން އަމަލުކުރި ގޮތް ބެލުމަށްވެސް ހާއްސަ ތަހުޤީޤެއް ކުރިއަށްދާކަމަށް ފުލުހުން ވިދާޅުވެއެވެ.