އަނިޔާ ލިބެމުންދާ މީހަކަށް ރައްކާތެރިކަން ފޯރުކޮށްދިނުމުގައި ހަރަކާތްތެރިވި ފުލުހުންގެ ތެރެއިން ފުލުހަކު، ފުލުހުންގެ ދައުރު އަދާކުރުމުގައި އިހުމާލުވީކަމަށް ތުހުމަތުކުރާތީ އެމައްސަލަ ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑްއިން ބަލަމުންދާކަމަށް ފުލުހުން ވިދާޅުވެއްޖެއެވެ.
ފުލުހުން މިހެން ވިދާޅުވީ މާލެއަތޮޅު ރަށެއްގައި ހިނގި ހަމަނުޖެހުމެއްގައި ފުލުހަކު އަޚްލާގީ މިންގަނޑުން ބޭރުން އަމަލުތައް ބަހައްޓާފައިވާކަމަށް އެހަމަނުޖެހުމުގައި އަނިޔާ ލިބުނު މީހާ ތުހުމަތު ކޮށްފައިވާތީއެވެ.
މިހާދިސާއަކީ މާލެ އަތޮޅު ރަށެއްގައި ޢުމުރުން 14 އަހަރުގެ އަންހެން ކުއްޖަކަށް ޖިންސީ ގޯނާކުރިކަމަށް ތުހުމަތުކޮށް މީހަކު ހިފަހައްޓައި ބަޔަކު އެމީހާއަށް ހަމަލާދީ އަނިޔާ ކުރާތީ އެކަން ހުއްޓުވުމަށްޓަކައި ފުލުހުން ހަރަކާތްތެރިވި ހާދިސާއެކެވެ. މި މައްސަލަ ފުލުހުންނަށް ރިޕޯޓުކޮށްފައިވަނީ މިދިޔަ ބުރާސްފަތި ދުވަހުގެ 18:30 ހާއިރުއެވެ.
މި ހަމަނުޖެހުމުގައި ފުލުހުންނަށް ހަމަލާދިން މައްސަލާގައި ޢުމުރުން 22 އަހަރުގެ ދިވެހި ފިރިހެނަކު ވަނީ ހައްޔަރުކޮށްފައެވެ. އަދި ހައްޔަރުކުރި މީހާގެ ބަންދަށް ކޯޓުންވަނީ 10 ދުވަސް ދީފައެވެ.
ކުޑަ ކުއްޖަކަށް ޖިންސީ ގޯނާ ކުރިކަމަށް ތުހުމަތުކުރާ މައްސަލައާއި، ފުލުހުންނަށާއި ތުހުމަތު ކުރެވުނު މީހާއަށް އަނިޔާކޮށް ހަމަލާދީފައިވާ މައްސަލަވެސް ފުލުހުން މިހާރު އަންނަނީ ތަހުގީގުކުރަމުންނެވެ. މިއީ ކުޑަކުއްޖަކު ހިމެނޭ މައްސަލައެއް ކަމަށްވާތީ މިމައްސަލައިގެ އިތުރު ތަފްސީލެއް ފުލުހުން ހާމައެއް ނުކުރައްވައެވެ.