ވޮޝިންގްޓަން ޕޯސްޓުގެ ނޫސްވެރިއެއް ކަމުގައިވާ ޖަމާލް ޚާޝޮގްޖީ މަރައިލުމުގައި އެއްވެސް ދައުރެއް އަދާ ކުރައްވާފައި ނުވާނެ ކަމަށާއި، އޭނާގެ މަރުގެ ޒިންމާވާ މީހުން ހޯދައި، އެ މީހުންނަށް ޙައްޤު އަދަބު ދީފައިވާނެ ކަމުގައި ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާން ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ، އެމެރިކާގެ ރައީސް ޖޯ ބައިޑަން ސަޢޫދީ ޢަރަބިއްޔާއަށް ކުރައްވަމުން ގެންދަވާ ދަތުރުފުޅުގެ ތެރެއިން ބައިޑަންއާ އެކު ބޭއްވެވި ބައްދަލުވުމެއްގައި ވާހަކަފުޅު ދައްކަވަމުންނެވެ.
މި ބައްދަލުވުމާ ގުޅޭ ގޮތުން ވާހަކަފުޅު ދައްކަވަމުން ބައިޑަން ވިދާޅުވީ، ޚާޝޮގްޖީގެ މަރުގެ ޒިންމާ އުފުލަން ޖެހޭނީ މުޙައްމަދު ބިން ސަލްމާން ކަމުގައި ދެކެވަޑައިގަންނަވާ ކަމަށް އޭނާގެ އަރިހުގައި ދެންނެވި ކަމުގައެވެ. އަދި، ޚާޝޮގްޖީ މަރައިލުމުގައި އެއްވެސް ދައުރެއް އަދާކޮށްފައި ނުވާނެ ކަމުގެ ޔަޤީންކަން މުޙައްމަދު ބިން ސަލްމާން ދެއްވި ކަމުގައި ބައިޑަން ވިދާޅުވިއެވެ. އަދި، ޚާޝޮގްޖީގެ މަރުގެ ޒިންމާވާ މީހުންނަށް އަދަބު ދީފައިވާނެ ކަމުގައި ވެސް ވަލީއަޙުދު ބައިޑަން ގާތުގައި ވިދާޅުވިއެވެ.
ނަމަވެސް، އެމެރިކާގެ ޖާސޫސީ އިދާރާތަކުން ބުނަނީ، ޚާޝޮގްޖީ މަރައިލުމަށް އަމުރު ކުރެއްވީ ވަލީއަޙުދު ކަމުގައެވެ. ޚާޝޮގްޖީ މަރައިލާފައި ވަނީ ތުރުކީ ވިލާތުގައި ހުންނަ ސަޢޫދީ ޢަރަބިއްޔާގެ ކޮންސިއުލޭޓަށް އޭނާ ގެންގޮސް، 2018 ވަނަ އަހަރުގެ ތެރޭގައެވެ.
ބައިޑަންގެ މި ދަތުރުފުޅުގައި ސަޢޫދީ ވަލީއަޙުދާ ބައްދަލު ކުރެއްވުމުން ގިނަ އަދަދެއްގެ ބަޔެއްގެ ނުރުހުން އޭނާއަށް ވަނީ އަމާޒުވެފައެވެ. މީގެ ތެރޭގައި ވޮޝިންގްޓަން ޕޯސްޓާއި ނޫސްވެރިންގެ ރައްކާތެރިކަން ކަށަވަރު ކުރުމަށް މަސައްކަތް ކުރާ ޖަމުޢިއްޔާއެއް ކަމުގައިވާ ކޮމިޓީ ޓު ޕްރޮޓެކްޓް ޖަރނަލިސްޓްސް ހިމެނެއެވެ. މީގެ އިތުރުން، ޚާޝޮގްޖީގެ ބައިވެރިޔާ ވެސް ވަނީ ސޯޝަލް މީޑިޔާގައި ބައިޑަންއަށް ވަރަށް ބޮޑަށް ފާޑުކިޔާފައެވެ.