2020 ވަނަ އަހަރު އެމެރިކާގައި ބޭއްވި ރިޔާސީ އިންތިޚާބުގެ ނަތީޖާ އޮޅުވައިލަން މަސައްކަތް ކުރެއްވި މައްސަލަ ބެލުމަށް ކޮންގްރެސްގައި ކުރިއަށްދާ ތަހުޤީޤަށް އެމެރިކާގެ ކުރީގެ ރައީސް ޑޮނަލްޑް ޓްރަމްޕް ހުރަސްއަޅުއްވަން މަސައްކަތް ކުރައްވައިފިއެވެ. އެމެރިކާގެ ޤާނޫނު ހަދާ މަޖިލީސް ކަމުގައިވާ ކޮންގްރެސްގައި މި މައްސަލަ ބަލާ ކޮމިޓީން ބުނީ ތަހުޤީޤަށް ހުރަސްއެޅުމުގެ ގޮތުން ހެއްކަށް ނުފޫޒު ފޯރުވަން ޓްރަމްޕް މަސައްކަތް ކުރައްވާފައިވާ ކަމުގައެވެ.
ނުވަ މެންބަރުންގެ މައްޗަށް އެކުވެލިގެންވާ ކޮމިޓީގައި ހިމެނިވަޑައިގަންނަވާ ޓްރަމްޕްގެ ރިޕަބްލިކަން ޕާޓީގެ ދެ މެންބަރުންގެ ތެރެއިން ލިޒް ޗޭނީ ވިދާޅުވީ، ތަހުޤީޤަށް ހެއްކެއްގެ ގޮތުގައި ހުށަހަޅާފައިވާ ފަރާތަކާ ޓްރަމްޕް ފޯނުން ގުޅުއްވާފައިވާ ކަމުގައެވެ. އަދި، މި މައްސަލަ އެމެރިކާގެ ޑިޕާޓްމަންޓް އޮފް ޖަސްޓިސްއަށް ހުށަހަޅައި، މިއީ ވަރަށް ސީރިޔަސް މައްސަލައެއްގެ ގޮތުގައި ބެލުމަށް އަންގާނެ ކަމުގައި އޭނާ ވިދާޅުވިއެވެ.
މި ފޯނު ކޯލުގެ އިތުރުން ވެސް ޓްރަމްޕް އެހެން ގޮތްގޮތުން ހެއްކަށް ނުފޫޒު ފޯރުވަން މަސައްކަތް ކުރަމުންދާ ކަމުގައި ޗޭނީ ވިދާޅުވިއެވެ. މި ގޮތުން، ޓްރަމްޕާ ދެކޮޅަށް ހެކިބަސް ދިނުމަށް ހަމަޖެހިފައިވާ މީހުންނަށް އެކި ގޮތްގޮތުން ބިރު ދައްކަމުންދާ ކަމުގައި ވެސް ޗޭނީ ތުހުމަތު ކުރެއްވިއެވެ.
ކޮމިޓީގައި ހިމެނިވަޑައިގަންނަވާ ޑިމޮކްރެޓިކް ޕާޓީގެ މެންބަރު ޖޭމީ ރެސްކިން ވިދާޅުވީ ހެއްކަން ނުފޫޒު ފޯރުވުމަކީ އެންމެ މަތީ ދަރަޖައިގެ ކުށެއް ކަމަށާއި، ޓްރަމްޕްގެ އަމަލުތަކަކީ އިންސާފަށް ހުރަސްއެޅުމުގެ ގޮތުގައި ކޮމިޓީން ދެކޭ ކަމުގައެވެ. އަދި، ޓްރަމްޕްގެ މައްސަލައިގައި ކުރިއަށްދާނެ ގޮތަކާ މެދު ޖަސްޓިސް ޑިޕާޓްމަންޓުން ވަރަށް އަވަހަށް ގޮތެއް ނިންމާނެ ކަމުގައި ވެސް އޭނާ ވިދާޅުވިއެވެ.
ޓްރަމްޕާ ދެކޮޅަށް ކުރަމުންދާ ތަހުޤީޤުގެ މައިގަނޑު އަމާޒަކީ ރިޔާސީ އިންތިޚާބުގެ ދާއިމީ ނަތީޖާ ކަނޑައެޅުމަށް ޤާނޫނު ހަދާ މަޖިލީހުގެ އިދާރާގައި 2021 ޖަނަވަރީ 6 ގައި ބޭއްވި ޖަލްސާއަށް ހުރަސްއެޅުމަށް އޭނާގެ ސަޕޯޓަރުން ފޮނުވައިގެން ހިންގި އަމަލުތައް ތަހުޤީޤު ކުރުމެވެ. އަދި އެ ދުވަހު ހިންގާފައިވާ ހަމަނުޖެހުންތަކުގެ މޭސްތިރިއަކީ ޓްރަމްޕް ކަން ކަށަވަރުކޮށް ކަނޑައެޅުމެވެ.