ޔޫކްރެއިންގެ ދޮނެޓްސްކް ސަރަޙައްދުގެ ރަށެއް ކަމުގައިވާ ޗެސިވް ޔާރުގައި ހުރި ޢާންމުން ދިރިއުޅޭ އެޕާޓްމަންޓް ޢިމާރާތަކަށް ރަޝިޔާ ސިފައިން ދިން ރޮކެޓް ހަމަލާއެއްގައި ޢިމާރާތް ވެއްޓި މަރުވި މީހުންގެ އަދަދު 43 އަށް އަރައިފިއެވެ. މީގެ ހަތަރު ދުވަސް ކުރިން ރަޝިޔާ ސިފައިން ދިން ހަމަލާގައި ޢިމާރާތަށް ބޮޑެތި ގެއްލުންތަކެއް ލިބިފައި ވާއިރު، ވެއްޓިފައިވާ ބައިތަކުގެ ދަށުގައި ބަންދުވެފައިވާ މީހުން ސަލާމަތް ކުރުމަށް އަދިވެސް ދަނީ މަސައްކަތް ކުރަމުންނެވެ.
ޢިމާރާތް ހުރި ސަރަޙައްދުން މިހާރުވެސް 420 ޓަނުގެ ގައުކުނޑި އެއްފަރާތް ކޮށްފައި ވާއިރު، ވެއްޓިފައިވާ ބައިތަކުގެ ދަށުން ނުވަ މީހަކު ވަނީ ސަލާމަތް ކޮށްފައެވެ. ރަޝިޔާގެ މި ހަމަލާއަކީ ޓެރެރިސްޓް ހަމަލާއެއްގެ ގޮތުގައި ޔޫކްރެއިނުން ސިފަ ކުރެއެވެ. މި ހަމަލާއާ ގުޅިގެން އެ ޤައުމުގެ ރައީސްގެ ޗީފް އޮފް ސްޓާފް އަންދްރޭ ޔަރްމެކް ވިދާޅުވީ، ރަޝިޔާއަކީ ޓެރެރިޒަމަށް ހިތްވަރުދޭ ޤައުމެއް ކަން މި ހަމަލާއިން ސާބިތުވާ ކަމުގައެވެ.
ޗެސިވް ޔާރުގެ ޢިމާރާތަކަށް ދިން ހަމަލާއާ ގުޅޭ ގޮތުން ރަޝިޔާއިން ބުނީ، އެ ޤައުމުގެ ސިފައިން ހަމަލާދީފައި ވަނީ ޔޫކްރެއިން ސިފައިންގެ އަމާޒުތަކަށް ކަމުގައެވެ. އަދި، ޔޫކްރެއިންގެ ޢާންމު ރައްޔިތުން ދިރިއުޅޭ ޢިމާރާތްތަކަށް ހަމަލާދޭ ކަމަށް ކުރާ ތުހުމަތުތައް ރަޝިޔާއިން އަނެއްކާ ވެސް މި ވަނީ ދޮގުކޮށްފައެވެ.
ރަޝިޔާގެ ފައުޖުތަކުން ޔޫކްރެއިނުގެ އެހެން ސަރަޙައްދުތަކަށް ވެސް ދަނީ ވަރުގަދައަށް ހަމަލާތައް އަމާޒު ކުރަމުންނެވެ. ދެކުނުގައިވާ ރަށެއް ކަމުގައިވާ މިކޮލިއެފަށް ދިން ހަމަލާތަކެއްގައި 12 މީހުން ވަނީ ޒަޚަމްވެފައެވެ. އެ ޤައުމުގެ އިރުއުތުރުގައިވާ ޚާކީވަށް ވެސް ރަޝިޔާ ސިފައިން ދަނީ ހުއްޓުމެއް ނެތި ރޮކެޓް އަދި މިސައިލް ހަމަލާތައް ދެމުންނެވެ.
ރަޝިޔާގެ ފައުޖުތަކުން ފެބުރުއަރީ މަހުގެ 24 ވަނަ ދުވަހު ޔޫކްރެއިނަށް އެރި ފަހުން އެ ޤައުމުގެ އިރުމަތީގެ ދޮންބެސް ސަރަޙައްދުގެ ގިނަ ރަށްތަކަކަށް ވަނީ އަތްގަދަ ކޮށްފައެވެ. އަދި، އިތުރު ސަރަޙައްދުތައް ހިފުމަށް ދަނީ މަސައްކަތް ކުރަމުންނެވެ. މި މަސައްކަތުގެ ދަށުން ރަޝިޔާ ސިފައިން އެންމެ ފަހުން ވަށައިލާ، ހިފުމަށް މަސައްކަތް ކުރަމުން ދަނީ ދޮނެޓްސްކްގެ ސިއެވެރްސްކް ކިޔާ ރަށެކެވެ.
ޔޫކްރެއިންގެ ސިފައިން ވެސް ދަނީ ރަޝިޔާގެ ފައުޖުތަކަށް ދޫދިނުމެއް ނެތި ރައްދު ހަމަލާ ދެމުންނެވެ. މި ގޮތުން ދެކުނުގައިވާ ޚާސަންގައި ރަޝިޔާ ސިފައިން އަތްގަދަ ކޮށްފައިވާ ރަށެއް ކަމުގައިވާ ނޮވާ ކަޚޮވްކާއަށް ޔޫކްރެއިން ސިފައިން ދިން ހަމަލާއެއްގައި ހަތް މީހުން މަރުވެ، އިތުރު 70 މީހަކު ވަނީ ޒަޚަމްވެފައެވެ. ޔޫކްރެއިން ސިފައިން ބުނީ އެ ހަމަލާ އަމާޒުކޮށްފައި ވަނީ ރަޝިޔާ ސިފައިންގެ ހަތިޔާރު ގުދަނަކަށް ކަމުގައެވެ.
މި ހަނގުރާމައަށް ފަސް މަސް ވުމާ ގާތްވެފައި ވާއިރު، ހަނގުރާމައިގެ އިންސާނީ އަގު ދަނީ ދުވަހެއް ދުވަހަކަށް އުފުލެމުންނެވެ. މި ހަނގުރާމައިގައި މިހާތަނަށް ޔޫކްރެއިންގެ 5,000 އަށްވުރެ ގިނަ ޢާންމުން މަރުވެފައިވާ ކަމަށް އ.ދ.ގެ އިންސާނީ ހައްޤުތަކާ ބެހޭ އިދާރާއިން އަންދާޒާ ކުރެއެވެ. ނަމަވެސް، މިއީ އަންދާޒާއެއް ކަމުގައި ވާތީ، މި ހަނގުރާމައިގައި ގެއްލިފައިވާ ފުރާނަތަކުގެ ފުރިހަމަ އަދަދު މިއަށްވުރެ ވެސް އިތުރުވާނެ ކަމަށް ބެލެވެއެވެ.
ރަޝިޔާގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި އެހެނިހެން ތަކެތީގެ އަގުތައް މި ވަނީ އުފުލެން ފަށާފައެވެ. އަދި، ޔޫކްރެއިނުގައި ހައްދާ ގޮވާމުގެ ބާވަތްތައް ބޭރު ކުރެވޭނެ މަގުތައް ބަންދުވުމާ ގުޅިގެން ބައެއް ޤައުމުތަކުގައި ކާބޯތަކެތީގެ ރައްކާތެރި ކަން ކަށަވަރު ކުރުމަށް މި ވަނީ ހުރަސްތަކެއް މެދުވެރިވެފައެވެ. މި ކަން ހައްލު ކުރުމަށް އެކި ޤައުމުތަކުން ގުޅިގެން ދަނީ މަސައްކަތް ކުރަމުންނެވެ.
މި ކަމާމެދު މަޝްވަރާ ކުރުމަށް ޔޫކްރެއިނާއި ރަޝިޔާގެ އިތުރުން ތުރުކީ ވިލާތުގެ އަސްކަރިއްޔާގެ އިސްވެރިންގެ މެދުގައި ޚާއްޞަ ބައްދަލުވުމެއް ބޭއްވުމަށް އެ ޤައުމުތަކުން ދަނީ ތައްޔާރު ވަމުންނެވެ. އ.ދ.އިން އިސްނަގައިގެން އިންތަންބޫލުގައި ބާއްވާ މި ބައްދަލުވުމުގައި، ޔޫކްރެއިނުގެ ގޮވާމުގެ ޝިޕްމަންޓުތައް ބޭރު ކުރެވޭނެ ގޮތްތަކެއް ހޯދުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރާނެއެވެ.