މިއަހަރުގެ ހައްޖުގެ އަޅުކަމަށް ސައުދީ އަރަބިއްޔާއަށް ގޮސް ތިބި ދިވެހި ހައްޖުވެރިންނާއި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ބައްދަލުކުރައްވާ، ޙާލު އޮޅުންފިލުއްވައިފިއެވެ.
މިނާގެ ފޭލިގެތަކުގައި ތިބި ދިވެހި ޙައްޖުވެރިންގެ ޙާލު ބައްލަވައިލެއްވުމަށް ރައީސުލްޖުމްހޫރިއްޔާ ކުރެއްވި ޒިޔާރަތުގައި އަރިހުގައި އަނބިކަނބަލުން ފަޒްނާ އަޙްމަދުވެސް ވަޑައިގެންނެވިއެވެ.
ޙައްޖުގެ އަޅުކަން ފުރިހަމަކުރުމުގެ ފުރުޞަތު މިއަހަރު 453 ދިވެހިންނަށް ލިބިފައިވެއެވެ. މިއީ މިއަހަރު ރާއްޖެއިން މީހުން ޙައްޖަށް ގެންދިއުމަށް ލިބުނު ކޯޓާގެ އަދަދެވެ. މި ހުރިހާ ކޯޓާއެއްވެސް ދޫކޮށްފައިވަނީ، ޙައްޖު ކޯޕަރޭޝަނަށް އެކަންޏެވެ.
ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއާއި އަނބިކަނބަލުން ފަޒްނާ އަޙުމަދު ޙައްޖުގެ އަޅުކަން އަދާކުރެއްވުމަށް މައްކާއަށް ވަޑައިގެންނެވީ ޖުލައި 4 ވަނަ ދުވަހުގައެވެ.
ދިވެހި ޙައްޖުވެރިންގެ ކަންކަން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހު ގެންދަވަނީ ޙައްޖުވެރިންގެ ކަންކަން ވަރަށް ގާތުން ބައްލަވަމުންނެވެ. އެގޮތުން ޙައްޖުވެރިންގެ ޙާލަތު ބެއްލުވުމާއި، އެމީހުންގެ ދަތުރުފަތުރާއި ތިބުމުގެ އިންތިޒާމްތައް ހަމަޖެހިފައިވާގޮތް ދިޔައީ ބައްލަވަމުންނެވެ.
ދިވެހި ހައްޖުވެރިންގެ ހާލު ރައީސުލްޖުމްހޫރިއްޔާ ބައްލަވާލައްވާފައިވާއިރު، މިއީ ފަހުގެ ތާރީހެއްގައި ރައީސުލްޖުމްހޫރިއްޔާގެ މަޤާމުގައި ހުންނެވި ބޭފުޅަކު ހައްޖަށް ވަޑައިގެން، ދިވެހި ހައްޖުވެރިންގެ ހާލު ބެއްލެވި ފުރަތަމަ ފަހަރުކަން ފާހަގަކޮށްލެވެއެވެ.
ރައީސް ހައްޖުވެރިންނާއި ބައްދަލުކުރެއްވުމަށް ކުރެއްވި ޒިޔާރަތުގައި ފޮރިން މިނިސްޓަރ އަބްދުﷲ ޝާހިދުއާއި އިސްލާމިކް މިނިސްޓަރ ޑރ.އަހްމަދު ޒާހިރު ޢަލީއާއި ޗީފް އޮފް ސްޓާފް އަލް އުސްތާޛް ޢަލީ ޒާހިރު އާއި ކޮމިޝަނަރ އޮފް ޕޮލިސް މުޙައްމަދު ޙާމީދާއި އަލިފުށީ ދާއިރާގެ މެންބަރު މުޙައްމަދު ރަޝީދު ހުސައިން ބައިވެރިވެ ވަޑައިގެންނެވިއެވެ.