ސޫރިޔާގެ ސަރުކާރާ ދެކޮޅު ފަރާތްތަކުގެ އަތްދަށުގައިވާ ސަރަޙައްދުތަކުގައި ދިރިއުޅޭ އެތައް މިލިޔަން ބަޔަކަށް އިންސާނީ އެހީ ފޯރުކޮށްދިނުމަށް އ.ދ.އިން ކުރަމުންދިޔަ މަސައްކަތްތަކަށް ރަޝިޔާއިން ހުރަސް އަޅައިފިއެވެ. އެ ޤައުމުގެ ހުޅަނގުއުތުރުގައި އިދިކޮޅު ފަރާތްތަކުގެ ކޮންޓްރޯލް އޮންނަ ސަރަޙައްދުތަކުގައި ދާޚީލީ ހަނގުރާމައާ ގުޅިގެން ހާލުގައި ޖެހި އިންސާނީ އެހީއަށް ބޭނުން ޖެހިފައިވާ މީހުންގެ އަދަދު ހަތަރު މިލިޔަނަށް އަރައެވެ.
އެ މީހުންނަށް ތުރުކީ ވިލާތުގެ މަގުން ކާބޯތަކެއްޗާއި އިންސާނީ އެހީގެ އެހެނިހެން ސާމާނު ފޯރުކޮށްދިނުމަށް އ.ދ.އިން ދަނީ މަސައްކަތް ކުރަމުންނެވެ. މީގެ ތެރޭގައި ކާބޯތަކެއްޗާއި ބޭސް ފަދަ ސާމާނު ހިމެނެއެވެ. އެ މީހުންނަށް އެހީތެރިކަން ފޯރުކޮށްދިނުމަށް އ.ދ.ގެ ސަލާމަތީ މަޖިލީހުން ދީފައިވާ ހުއްދަ އަންނަ އާދީއްތަ ދުވަހު ހަމަވާނެއެވެ. އަދި، އެ ހުއްދަ އިތުރު އެއް އަހަރު ދުވަހުގެ މުއްދަތަކަށް އިތުރު ކުރުމަށް އ.ދ.ގެ ސަލާމަތީ މަޖިލީހުގައި މި ވަނީ ވޯޓަށް އަހައިފައެވެ.
ނަމަވެސް، ސޫރިޔާގެ ރައީސް ބައްޝާރުލް އަސަދަށް ވާގިވެރިވެދޭ ރަޝިޔާއިން ވަނީ އެ ޤައުމަށް ލިބިފައިވާ ވީޓޯ ކުރުމުގެ ބާރުގެ ބޭނުން ހިފައި، އެ ކަމަށް ހުރަސް އަޅާފައެވެ. އ.ދ.ގެ ސަލާމަތީ މަޖިލީހުގެ މެންބަރުންގެ ތެރެއިން މި ކަމާ ދެކޮޅު ހަދާކަން ކުރިން ވެސް އިޢުލާނު ކޮށްފައިވާ ޤައުމުތަކުގެ ތެރޭގައި ރަޝިޔާއާއި ޗައިނާ ހިމެނެއެވެ. ނަމަވެސް، ޗައިނާއިން މި ވޯޓުގައި ބައިވެރިވެފައެއް ނުވެއެވެ.
އެމެރިކާއިން އ.ދ.އަށް ކަނޑައަޅާފައި ހުންނަވާ ސަފީރު ލިންޑާ ތޯމަސް-ގްރީންފީލްޑް ރަޝިޔާގެ އަމަލު ސިފަކޮށްފައި ވަނީ ސޫރިޔާގައި ހާލުގައި ޖެހިފައިވާ އެތައް މިލިޔަން ބަޔަކަށް މަރުގެ ހުކުމް އިއްވުން ފަދަ އަމަލެއްގެ ގޮތުގައެވެ. އޭނާ ވިދާޅުވީ ރަޝިޔާގެ ވީޓޯއާ ގުޅިގެން ސޫރިޔާގެ އެތައް މިލިޔަން ޢާންމު ރައްޔިތުންނަކަށް މަރާ ކުރިމަތިލާން ޖެހިދާނެ ކަމުގައެވެ.
މި ކަމާ ގުޅޭ ގޮތުން ރަޝިޔާއިން ބުނީ، ހާލުގައި ޖެހިފައިވާ މީހުންނަށް އެހީ ފޯރުކޮށްދޭން އެއްބަސްވެވޭނީ ޝަރުޠުތަކެއްގެ މަތިން ކަމުގައެވެ. އެ ޝަރުޠުތަކުގެ ތެރޭގައި، އެހީގެ ސާމާނު އަސަދުގެ ސަރުކާރާ ހަވާލުކޮށް، އޭނާގެ ބެލުމުގެ ދަށުން ހާލުގައި ޖެހިފައިވާ އެ ތަކެތި ފޮނުވުން ހިމެނެއެވެ. ނަމަވެސް، މި ގޮތަށް އަމަލުކޮށްފި ނަމަ، އެހީގެ ސާމާނު އަސަދުގެ ސަރުކާރުގެ އަތްދަށުވާނެ ކަމަށް ހުޅަނގުން ޤަބޫލު ކުރެއެވެ.
ފާއިތުވި އަހަރެއްހާ ދުވަހުގެ ތެރޭގައި އ.ދ.އިން ވަނީ ފަސް ފަހަރެއްގެ މަތިން ސޫރިޔާގައި ހާލުގައި ޖެހިފައިވާ މީހުންނަށް އެހީގެ ތަކެތި ފޯރުކޮށްދީފައެވެ. ނަމަވެސް، އެ ސަރަޙައްދުތަކުގައި ހާލުގައި ޖެހިފައިވާ އެތައް މިލިޔަން މީހުންނަށް ބޭނުންވާ މިންވަރަށް އެހީ ފޯރުކޮށް ނުދެވޭ ކަމަށް އ.ދ.އިން ޤަބޫލު ކުރެއެވެ.
ސޫރިޔާގެ ހުޅަނގުއުތުރުގައި އިދިކޮޅުގެ ބާރުގެ ދަށުގައިވާ ސަރަޙައްދުތަކުގައި 4.1 މިލިޔަން މީހުން ހާލުގައި ޖެހިފައިވާ ކަމަށް އ.ދ.އިން އަންދާޒާ ކުރެއެވެ. މީގެ ތެރެއިން 80 އިންސައްތަ މީހުންނަކީ އަންހެނުންނާއި ކުޑަކުދިންނެވެ. އެ މީހުންނަށް އިންސާނީ އެހީ ފޯރުކޮށްދޭން އ.ދ.ގެ ސަލާމަތީ މަޖިލީހުން ހުށަހަޅާފައި ވަނީ 2014 ވަނަ އަހަރުއެވެ. އަދި، އެހީ ފޯރުކޮށްދޭން ނިންމާފައި ވަނީ ތުރުކީވިލާތުގެ އިތުރުން އިރާޤާއި ޢުރުދުން މަގުންނެވެ.