އީރާނުގެ ނިއުކްލިޔަރ ހަކަތަ އުފެއްދުމުގެ ޕުރޮގުރާމާ ގުޅޭ ގޮތުން ދެމެހެއްޓެނިވި ގޮތެއްގައި ތަންފީޒު ކުރެވޭނެ، ހުރިހާ ފަރާތަކަށް ވެސް ފައިދާހުރި އެއްބަސްވުމެއް އެކުލަވައިލަން ބޭނުން ކަމުގައި އެ ޤައުމުން ބުނެފިއެވެ. އެ ޤައުމުން މި ކަން ހާމަކޮށްފައިވަނީ، 2015 ވަނަ އަހަރު އެކުލަވައިލި ނިއުކްލިޔަރ އެއްބަސްވުން ތަންފީޒު ކުރަން އަލުން ފެށުމާ ގުޅޭ ގޮތުން މަޝްވަރާ ކުރުމަށް ޤަޠަރުގެ އިސްވެރިންނާ އެކު ބޭއްވި ބައްދަލުވުމަކަށް ފަހުއެވެ.
އީރާނުގެ ނިއުކްލިޔަރ ޕުރޮގުރާމާ ގުޅޭ ގޮތުން އެމެރިކާއާ އެކު ކުރަމުންދާ ނުރަސްމީ މަޝްވަރާތަކުގައި ޤަޠަރުން ދަނީ މެދުވެރިއެއްގެ ދައުރު އަދާ ކުރަމުންނެވެ. ޤަޠަރުގެ ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލްޘާނީ ބައިވެރިވެ ވަޑައިގެންނެވި މި މަޝްވަރާތައް ކުރިއަށް ގެންގޮސްފައި ވަނީ އީރާނުގެ ވެރިރަށް ތެހެރާނުގައެވެ.
ވިލާތުގެ އިއްތިހާދު (އީ.ޔޫ)އިން މެދުވެރިވެގެން އީރާނާއި އެމެރިކާއާ ދެމެދު އެންމެ ފަހުން ބޭއްވި މަޝްވަރާތަކުގައި ކުރިއެރުންތަކެއް ހޯދިފައެއް ނުވެއެވެ. އެމެރިކާއިން ބުނީ، އެއްބަސްވުމުގެ ބޭރުން އީރާނުން އައު ޝަރުޘުތަކެއް ހުށަހަޅާފައިވާ ކަމުގައެވެ. ނަމަވެސް، އީރާނުގެ ޚާރިޖީ ވަޒީރު ޙުސައިން އާމިރުޢްބްދުاللهހިއަން އެ ކަން ދޮގު ކުރައްވައެވެ.
ޝައިޚް މުޙައްމަދާ އެކުގައި ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން އާމިރުޢަބްދުاللهހިއަން ވިދާޅުވީ، އީރާނުން ވެސް ބޭނުންވަނީ ގިނަ އަހަރުތަކަކަށް ދެމިގެންދާނެ، ހުރިހާ ފަރާތަކަށް ވެސް ފައިދާހުރި އެއްބަސްވުމެއް އެކުލަވައިލުމަށް ކަމުގައެވެ. އޭނާ ވަނީ އެއްބަސްވުން އަލުން އިޔާދަކުރުމާ ގުޅޭ ގޮތުން އެމެރިކާއިން ގެންގުޅޭ ނިޔަތާ މެދު ވެސް ސުވާލު އުފައްދަވާފައެވެ.
2015 ވަނަ އަހަރު އެކުލަވައިލި އެއްބަސްވުމުގެ ދަށުން އީރާނުން ވަނީ ޔޫރޭނިއަމް މުއްސަނދި ކުރުމުގެ މަސައްކަތްތައް މަޑު ޖައްސައިލާފައެވެ. އަދި އޭގެ ބަދަލުގައި އެމެރިކާއާއި ހުޅަނގުގެ އެހެން ބާރުތަކުން ވަނީ އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިތަކެއް ދީ، އެ ޤައުމަށް އެހީތެރިކަން ފޯރުކޮށްދޭން ފަށާފައެވެ.
އީރާނުން ބުނަނީ އެ ޤައުމުގެ ނިއުކްލިޔަރ ޕުރޮގުރާމަކީ މަދަނީ ބޭނުންތަކަށް ނިއުކްލިޔަރ ހަކަތަ އުފެއްދުމަށް ހިންގާ ޕުރޮގުރާމެއް ކަމުގައެވެ. ނަމަވެސް، އެމެރިކާއާއި ހުޅަނގުން އެ ކަން ޤަބޫލެއް ނުކުރެއެވެ. އަދި، އީރާނުން ނިއުކްލިޔަރ ހަތިޔާރު އުފައްދަން މަސައްކަތް ކުރަމުންދާ ކަމަށް ތުހުމަތު ކުރެއެވެ.
2015 ވަނަ އަހަރުން ފެށިގެން އަމަލު ކުރަމުން ދިޔަ އެއްބަސްވުމުން 2018 ވަނަ އަހަރު ނިމުމަކަށް ގެނައީ އެމެރިކާއިންނެވެ. އެއީ، އެ ޤައުމުގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައެވެ. އެއްބަސްވުމުން ވަކިވުމަށް ފަހު، އޭނާ ވަނީ އީރާނާ ދެކޮޅަށް ދަތި ކުރުމުގެ އިތުރު ފިޔަވަޅުތަކެއް ވެސް އަޅާފައެވެ.
މި ކަމާ ގުޅިގެން އީރާނާއި ހުޅަނގުގެ ބާރުތަކާ ދެމެދު އުފެދިފައިވާ ނުތަނަވަސް ކަމަށް ނިމުމެއް ގެންނަން އެކި ފޯރަމްތަކުގައި އެކި ސިފަސިފައިގައި ބާއްވަމުން ދިޔަ މަޝްވަރާތަކަށް ފަހު، އެއްބަސްވުމަށް އަލުން ރުޖޫޢަވުމާ ގުޅޭ ގޮތުން އެއްބަސްވުމަކަށް އާދެވުނީ އޭގެ އަހަރެއްހާ ދުވަސް ފަހުންނެވެ. ނަމަވެސް، މި އަހަރުގެ މާރިޗު މަހު މަޝްވަރާތަކަށް އަލުން ހުރަސް އެޅުނެވެ. ސަބަބަކީ، އެމެރިކާއިން އެކުލަވައިލާފައިވާ ޓެރެރިސްޓު ޖަމާޢަތްތަކުގެ ލިސްޓުން އީރާނުގެ ރިވޮލޫޝަނަރީ ގާޑްސް އުނިކުރަން އެމެރިކާއިން ދެކޮޅު ހެދުމެވެ.