ހުޅުމާލޭ ދެވަނަ ފިޔަވަހީގައި 2 ހޮސްޕިޓަލަކާއި 3 ކްލިނިކެއް ތަރައްޤީކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ފަށައިފިއެވެ.
ހުޅުމާލޭގައި އަޅަން ނިންމާފައިވާ ދެ ހޮސްޕިޓަލް ތަރައްޤީކުރަނީ 71،127.92 (ހަތްދިހަ އެއްހާސް އެއްސަތޭކަ ހަތްދިހަ ދޭއް ޕޮއިންޓް ނުވެއް ދޭއް) އަކަފޫޓްގެ ބިމަކާއި 67،522.01 ( ފަސްދޮޅަސް ހަތް ހާސް ފަސްސަތޭކަ ބާވީސް ޕޮއިންޓް ސުމެއް އެކެއް) އަކަ ފޫޓުގެ ބިމެކެވެ.
މީގެތެރެއިން އެއް ހޮސްޕިޓަލް އިމާރާތްކޮށްދޭނެ ބަޔަކު ހޯދަން މިދިޔަ ޖެނުއަރީ މަހު އިޢުލާން ކުރުމަށްފަހު، ކުރިމަތިލި ފަރާތްތަކުގެ ފޯމުތައް އިވެލުއޭޓްކުރުމުގެ މަސައްކަތް މިހާރު ކުރިއަށްދާކަމަށް ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީން ބުނެއެވެ.
މީގެއިތުރުން ހިޔާ ފްލެޓުތަކުގެ އެންމެ ތިރީގައި ކޮމާޝަލް ޔުނިޓްތަކުގެ ގޮތުގައި ކަނޑާއަޅައިފައިވާ ޔުނިޓުތަކުގައި 3 ކްލިނިކަކާއި 4 ބޭސްފިހާރައެއްވެސް ޤާއިމްކުރުމަށް ހަމަޖެހިފައިވާކަމަށް އެޗްޑީސީން ބުނެއެވެ. މިއާއިއެކު ސިއްހީ ޙިދުމަތްދޭ 7 ތަނެއް ހިޔާ ސަރަހައްދުގައި ޤާއިމް ވެގެންދާނެއެވެ.
މީގެތެރެއިން ހިޔާ ފްލެޓްގެ 12 ވަނަ ޓަވަރުގެ އެންމެ ތިރީ ފަންގިފިލާގައި ފުރަތަމަ ކްލިނިކް މިމަހުގެ 15 ވަނަ ދުވަހު ވަނީ ހުޅުވައިފައެވެ.
ހިޔާ ސަރަހައްދުގައި މީހުން ދިރިއުޅެން ފެށިތާ ގިނަ ދުވަސްތަކެއްވެފައިވާއިރު، އެތަނުގައި އުޅޭ މީހުންނަށް ބޭނުންވާ ޒަރޫރީ ހިދުމަތްތައް އެތަނުން ލިބޭނެ މަގުފަހިކުރުމަށް އެޗްޑީސީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސްކޫލުތަކާއި، މިސްކިތްތަކާއި ފިހާރަތައް މިހާރު ދަނީ އެސަރަހައްދުގައި ޤާއިމްކުރަމުންނެވެ.