ހުޅަނގުގެ ޤައުމުތަކުގެ އަސްކަރީ ގުޅުން ކަމުގައިވާ (ނޭޓޯ)ގެ ތައްޔާރީ ހާލަތުގައި ތިބޭ ފައުޖުގެ ސިފައިންގެ އަދަދު 300,000 އަށް އިތުރުކުރަން ނިންމައިފިއެވެ. ނޭޓޯގެ ސެކްރެޓަރީ ޖެނެރަލް ޖެންސް ސްޓޮލްޓެންބަރގް މި ކަން ހާމަކުރައްވާފައި މި ވަނީ، ސްޕެއިންގެ މެޑްރިޑްގައި ފެށުމަށް ތައްޔާރުވަމުންދާ ނޭޓޯގެ އިސް ލީޑަރުންގެ ސަމިޓަކާ ގުޅުވައިގެންނެވެ.
ނޭޓޯގެ "ކުއިކް ރިއެކްޝަން ފޯސް" ނުވަތަ ތައްޔާރީ ހާލަތުގައި ތިބި ސިފައިންގެ އަދަދަކީ 40,000 އެވެ. އެ އަދަދު އިތުރު ކުރަން ނިންމާފައި މި ވަނީ، ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެންނެވެ. ރަޝިޔާގެ އަމަލުތަކަކީ، ނޭޓޯގެ ޤައުމުތަކުގެ ސަލާމަތާއި ރައްކާތެރި ކަމަށް އޮތް ނުރައްކަލެއްގެ ގޮތުގައި ސްޓޮލްޓެންބަރގް ސިފަކުރެއެވެ.
ތައްޔާރީ ހާލަތެއްގައި ބައިތިއްބާ ނޭޓޯގެ ފައުޖުގެ އަދަދު 300,000 އަށް އިތުރުކުރުމާ އެކު، އެ ފައުޖުތަކުގެ ތައްޔާރީ ހާލަތަށް ވެސް ބަދަލުތަކެއް ގެންނާނެ ކަމަށް ސްޓޮލްޓެންބަރގ ވިދާޅުވިއެވެ. ނަމަވެސް، އެ ކަމުގެ ތަފުސީލެއް އޭނާ އަދި ހާމައެއް ނުކުރައްވައެވެ.
މީގެ އިތުރުން، ނޭޓޯގެ ސަމިޓުގައި އެ އިއްތިހާދުން ރަޝިޔާއާ މެދު ދެކޭ ގޮތް ވެސް ބަދަލުކުރާނެ ކަމަށް ސްޓޮލްޓެންބަރގް ވިދާޅުވިއެވެ.
2010 ވަނަ އަހަރުން ނޭޓޯއިން އަމަލު ކުރަމުންދާ ސިޔާސަތުގެ ދަށުން ރަޝިޔާއަކީ ސަލާމަތާއި ރައްކާތެރިކަމާ ގުޅޭ ކަންކަމުގައި ބައިވެރިވެއްގެ ގޮތުގައި ދެކުނު ނަމަވެސް، މި ވިސްނުން ނޭޓޯގެ ސަމިޓުގައި ބަދަލު ކުރާނެއެވެ. ސްޓޮލްޓެންބަރގް ވިދާޅުވީ، މިހާރު ރަޝިޔާއަކީ ނޭޓޯގެ ޤައުމުތަކުގެ ސަލާމަތާއި ރައްކާތެރިކަމަށް އޮތް ނުރައްކަލެއް ކަމަށް ޤަބޫލުފުޅު ކުރައްވާ ކަމަށާއި، ބައިނަލްއަޤްވާމީ ޤާނޫނުތައް ރަޝިޔާއިން މުގުރަމުންދާ ކަމުގައެވެ.