ޤަޠަރުގެ އަމީރު ޝައިޚް ތަމީމް ބިން ޙަމަދް އަލްޘާނީ ރަސްމީ ދަތުރުފުޅެއްގައި މިޞްރަށް ވަޑައިގަންނަވައިފިއެވެ. މިޞްރުގެ ވެރިރަށް ޤާހިރާއިން އޭނާއަށް މަރުޙަބާ ވިދާޅުވީ އެ ޤައުމުގެ ރައީސް ޢަބްދުލްފައްތާޙް އަލްސީސީއެވެ. މި ދަތުރުފުޅުގައި ސީސީއާ އެކު ބާއްވަވާ ބައްދަލުކުރެއްވުންތަކުގައި، ދެ ޤައުމުގެ ދެމެދުގައި ހީނަރުވެފައިވާ ގުޅުންތައް ބަދަހިކުރުމާ ގުޅޭގޮތުން އޭނާ މަޝްވަރާ ކުރައްވާނެއެވެ.
ޤަޠަރުގެ އަމީރު މިޞްރަށް ކުރައްވާ މި ދަތުރުފުޅަކީ، 2017 ވަނަ އަހަރު ސަޢޫދީ ޢަރަބިއްޔާއާއި އެކުވެރި ޢަރަބި ޢިމާރާތާއި ބަޙުރެއިނާއި މިޞްރުން ޤަޠަރާ އެކު އޮތް ގުޅުންތައް ކަނޑައިލި ފަހުން އޭނާ އެ ޤައުމަށް ކުރައްވާ ފުރަތަމަ ދަތުރުފުޅެވެ. އެ ޤައުމުތަކުން ޤަޠަރާ އެކު އޮތް ގުޅުންތައް ކަނޑައިލާފައި ވަނީ އެ ޤައުމުން ޓެރަރިސްޓް ޖަމާޢަތްތަކަށް ވާގިވެރިވެދޭ ކަމަށް ތުހުމަތުކޮށެވެ. އަދި، ޤަޠަރާ ދެކޮޅަށް އެ ޤައުމުތަކުން ވަނީ ދަތިކުރުމުގެ ފިޔަވަޅުތަކެއް އަޅާފައެވެ. ޤަޠަރުން ވަނީ އެ ތުހުމަތުތައް ދޮގު ކޮށްފައެވެ.
މިދިޔަ އަހަރުގެ ޖަނަވަރީ މަހު އެ ޤައުމުތަކުން ވަނީ އަލުން ޤަޠަރާ އެކު ގުޅުން ޤާއިމު ކުރަން ނިންމައި، އެއްބަސްވުމެއްގައި ސޮއި ކޮށްފައެވެ. އަދި، އެއަށްފަހު ޤަޠަރާއި މިޞްރާ ދެމެދު އޮތް ގުޅުންތައް ވަނީ ބަދަހިކުރަން ފަށާފައެވެ. މި ގޮތުން، ޤަޠަރުގެ ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލްޘާނީ މާރިޗު މަހު މިޞްރަށް ކުރެއްވި ދަތުރުފުޅެއްގައި 5 ބިލިޔަން ޑޮލަރުގެ އަގުހުރި އިންވެސްޓްމެންޓް އެއްބަސްވުމެއްގައި ސޮއި ކުރައްވާފައިވެއެވެ.