"މޯލްޑިވްސް ފްލޯޓިންގ ސިޓީ"ގެ އެއްބަސްވުމަށް ބަދަލު ގެނައީ "ރެޒިޑެންޝަލް ރިއަލް-އެސްޓޭޓް" ވިޔަފާރިކުރުމަށް ފުރުޞަތު ފަހިކޮށްދިނުމުގެ ގޮތުންކަމަށް ސަރުކާރުން ހާމަކުރައްވައިފިއެވެ.
ރާއްޖޭގެ ފަތުރުވެރިކަމުގެ ޤާނޫނަށް ގެނެވުނު ބަދަލާއެކު "މޯލްޑިވްސް ފްލޯޓިންގ ސިޓީ" އިންޓަރގްރޭޓެޑް ޓޫރިޒަމް މޮޑެލްއަށް ތަރައްޤީކުރާގޮތަށް އަލުން އެއްބަސްވުމެއް އެކުލަވާލައި އެކަމުގެ އެއްބަސްވުމުގައި ބުރާސްފަތިދުވަހު ވަނީ ސޮއިކޮށްފައެވެ.
ސަރުކާރުން ވިދާޅުވީ ޑަޗް ޑޮކްލޭންޑް ކުންފުންޏާއެކު ޤާއިމްކޮށްފައިވާ އެއްބަސްވުން އިސްލާހުކުރީ މި މަޝްރޫޢުގެ "ލީސް އެގްރީމެންޓް" ކުރިން އޮތް ގޮތުން، "ރެޒިޑެންޝަލް ރިއަލް-އެސްޓޭޓް" ވިޔަފާރި ކުރުމަށް ފުރުޞަތު ނެތުމުންކަމަށެވެ. އަދި ސަރުކާރުން އެއްބަސްވުން އިސްލާހު ކުރީ، "އިންޓެގްރޭޓެޑް ޓޫރިޒަމް ޑިވެލޮޕްމަންޓް" މޮޑެލްއެއްގެ ދަށުން، އެ ފުރުޞަތު ހުޅުވައިލުމުގެ ގޮތުންކަމަށާއި، އޭރުން މިމަޝްރޫޢުގެ ދަށުން ބޯހިޔާވަހިކަމަށް ހައުސިންގ ޔުނިޓް އިމާރާތްކުރެވިގެންދާނެކަމަށް ސަރުކާރުން ވިދާޅުވެއެވެ.
އެއްބަސްވުން އިސްލާހުކުރީ މަޝްރޫޢު ކުރިއަށް ގެންދިޔުމަށް "ޑަޗް ޑޮކްލެންޑްސް" ކުންފުންޏަށް ކުރިމަތިވި ހުރަސްތައް ނައްތައިލުމަށްކަމަށާއި އެއްބަސްވުމަށް ގެނައި ބަދަލާއެކު، "ޑަޗް ޑޮކްލޭންޑްސް" ކުންފުނިން ސަރުކާރަށް 1 މިލިޔަން ޑޮލަރު ކޮންވަރޝަން ފީގެ ގޮތުގައި ދަައްކާފައިވާކަމަށް ސަރުކާރުން ވިދާޅުވެއެވެ.
މި މަޝްރޫޢު ހިންގުމަށް ޑަޗް ޑޮކްލޭންޑްސް ކުންފުންޏަށް މާލެ ސިޓީ ކައިރިން 5 ފަޅެއް ވަނީ ދޫކޮށްފައެވެ. މީގެ ތެރެއިން 2 ފަޅެއް، ޑަޗް ޑޮކްލޭންޑްސް ކުންފުނިން ވަނީ، އެހެން ކުންފުންޏަކަށް ދޫކޮށްފައެވެ.
ސަރުކާރުން ވިދާޅުވީ އެއްބަސްވުމަށް ބަދަލު ގެނެސް "އިންޓެގްރޭޓެޑް ޓޫރިޒަމް ޑިވެލޮޕްމަންޓް" މޮޑެލްގެ ދަށުން ތަރައްޤީ ކުރެވޭނީ، "ޑަޗް ޑޮކްލެންޑްސް" ކުންފުނީގެ ދަށުގައި އޮތް 3 ފަޅުގެ ތެރެއިން 1 ފަޅުކަމަށެވެ.
ސަރުކާރުން އެއްބަސްވުމަށް ގެނައި ބަދަލާ ގުޅިގެން، ކުރިން ސޮއިކޮށްފައިވާ އެއްބަސްވުމުގައިވާ އެއްވެސް ތާރީޚަކަށް ބަދަލެއް ނާންނާނެއެވެ. މި ގޮތުން، އެ ތަން ތަރައްޤީ ކުރުމަށް އެއްބަސްވެފައިވާ މުއްދަތާއި، ފަޅުތައް ކުއްޔަށް ދޫކޮށްފައިވާ މުއްދަތަށް އެއްވެސް ބަދަލެއް ނާންނެކަމަށް ސަރުކާރުން ވިދާޅުވެއެވެ.
މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރ އޮފް ޓޫރިޒަމް ޑރ.ޢަބްދުﷲ މައުސޫމް ވިދާޅުވީ ފަތުރުވެރިކަން ސިންދަފާތުކުރުމަށް ރާއްޖެއިން ގެންގުޅޭ ސިޔާސަތުގެ ދަށުން ތަފާތު ކޮންސެޕްޓްތަކުގެ ތެރެއިން ރާއްޖެއަށް އަންނަ އިންވެސްޓަރުންނާއެކު މަސައްކަތްކުރުމަށް ރާއްޖެ ހުޅުވާލާފައިވާކަމަށެވެ. އަދި ފްލޯޓިންގ ސިޓީ މަޝްރޫޢާއެކު ދުނިޔޭގެ މީޑިއާގައި ރާއްޖެއަށް ވަރަށް ބޮޑު ސަމާލުކަމެއް ލިބިފައިވާކަމަށްވެސް މިނިސްޓަރ ވިދާޅުވިއެވެ.
"މީގެ ދަށުން ޑިވެލޮޕްކުރާ މޮޑެލްއަށް ބަދަލެއް އައީ. ލީސްއަކަށް ނާދެ ބަދަލެއް. ރާއްޖެއަށް ފައިދާ ހުރި އިންވެސްޓްކުރަން ކޮންސެޕްޓަކާއެކު އަންނަ ބަޔަކަށް އޯޕަންކޮށް ރާއްޖޭގެ ޓޫރިޒަމް އޮތީ. ރާއްޖޭގައި ފްލޯޓިންގ ގެސްޓް ހައުސްތައް އަޅަންވެސް ޝައުގުވެރިކަން ހުރި ފަރާތްތަކުން މިނިސްޓްރީއަށް އަންނަނީ ހުށައަޅަމުން." މިނިސްޓަރ މައުސޫމް ވިދާޅުވިއެވެ.
ޑަޗް ޑޮކްލޭންޑްގެ ސީއީއޯ ޕޯލް ވޭންޑިކޭމް ވިދާޅުވީ މިހާރު ތަރައްޤީކުރާ ފްލޯޓިންގ ސިޓީ ކޮންސެޕްޓަކީ 2010 ވަނަ އަހަރު، އޭރުގެ ސަރުކާރާއެކު އެއްބަސްވެވުނު ކޮންސެޕްޓާ ތަފާތު ކޮންސެޕްޓެއްކަމަށެވެ. އަދި އެއްބަސްވުމަށް ގެނައި ބަދަލާއެކު މިޕްރޮޖެކްޓް ވެގެންދާނީ ރާއްޖެއަށް ކުރިމަތިވެފައިވާ ބޯހިޔާވަހިކަމަށް ހައްލެއް ގެނައުމަށް މަގުފަހިކުރާނެ މަޝްރޫއަކަށްކަމަށް ޕޯލް ވިދާޅުވިއެވެ.
" ހުޅުމާލޭ ފޭސް ދޭއްގައި ކުރިއަށްދާ ހައުސިންގެ އަގުތަކާއި ގުޅިގެންވެސް ކަންބޮޑުވުން ހުރިކަން އެނގޭ. މީގެކުރިން 250،000 ޑޮލަރަށް މިހައުސިންގ ޔުނިޓުތައް ބެހެއްޓުމަށް މަޝްވަރާކުރެވުނު ނަމަވެސް އެއީ ރާއްޖޭގެ ހައުސިންގއަށް އެންމެ އެކަށީގެންވާ އަގުތަކެއް ނޫން. އެހެންކަމުން މިމަޝްރޫޢު ނިމިގެންދާއިރު އަގުތައް ހުންނާނީ ޢާއްމުންގެ އަތްފޯރާފަށުގައިކަމުގެ ޔަގީންކަން ދެން." ޕޯލް ވިދާޅުވިއެވެ.
ޢާއްމުންނަށް ދޫކުރާ ހައުސިންގ ޔުނިޓުތަކާއެކު ފަތުރުވެރިކަމަށް ހުޅުވާލާ ސަރަޙައްދެއްގެ ގޮތުގައި ތަރައްޤީކުރާ 1.6 ބިލިއަން ޑޮލަރުގެ ބިޔަ ފްލޯޓިންގ ސިޓީ މަޝްރޫޢަށް ސަރުކާރުން ވަނީ މާލެ އަތޮޅު އާރަށް ކައިރިން 200 ހެކްޓަރުގެ ފަޅެއް ޑަޗް ޑޮކްލޭންޑަށް ދީފައެވެ. އަދި މިސިޓީގައި 5000 ހައުސިންގ ޔުނިޓު ތަރައްޤީކުރުމަށް ވަނީ ނިންމާފައެވެ.