ޔޫތު މިނިސްޓްރީން ގަލޮޅު ރަސްމީ ދަނޑުގައި އިއްޔެ ހެނދުނު ކުރިއަށް ގެންދިޔަ ހަރަކާތަށް ބަޔަކު ހުރަސްއަޅައި ހަމަނުޖެހުން ހިންގުމާގުޅިގެން ރާއްޖޭގެ ބައެއް ސިޔާސީ ޕާޓީތަކާއި މުއައްސަސާތަކުން ކަންބޮޑުވުން ފާޅުކޮށްފިއެވެ.
މިގޮތުން ދިވެހި ރައްޔިތުންގެ ޕާޓީ (ޑީއާރްޕީީ)އާއި މޯލްޑިވްސް ތާރޑްވޭ ޑިމޮކްރެޓްސް (އެމްޓީޑީ)އަދި ދިވެހިރައްޔިތުންގެ ޑިމޮކްރެޓިކް ޕާޓީ(އެމްޑީޕީ)އިން ވަނީ ކަންބޮޑުވުން ފާޅުކޮށް ބަޔާނެއް ނެރެފައެވެ.
ދުނިޔޭގެ ޔޯގާ ދުވަސް ފާހަގަކުރުމަށް ޤައުމީ ސްޓޭޑިއަމްގައި އިއްޔެ ހެނދުނު ހިންގި ހަރަކާތަށް ހުރަސްއަޅާ، ބައިވެރިންނަށް ހަމާލާދިން ބިރުވެރި ޢަމަލު، އެމް.ޑީ.ޕީން ކުށްވެރިކޮށް ނެރުނު ބަޔާނުގައި ވަނީ މިބާވަތުގެ ނުބައި އަދި އަނިޔާވެރި ޢަމަލުތަކަކީ، ޞުލްޙަވެރި ޑިމޮކްރެޓިކް މުޖުތަމަޢެއްގައި އެއްވެސް ޖާގައެއް އޮތް ކަމެއްކަމަކަށް އެ ޕާޓިން ނުދެކޭކަމަށެވެ. މި މައްސަލައިގެ ސީރިއަސް ތަޙުޤީޤެއް ފެށުމަށް ސަރުކާރުން ނިންމެވި ނިންމެވުމަށް މަރުޙަބާ ދަންނަވައި، މިހާތަނަށް ހައްޔަރުކުރެވުނު މީހުން ވެސް ހިމެނޭގޮތަށް، މިކަމަށް ޒިންމާވާ ފަރާތްތަކާމެދު އަވަސް ފިޔަވަޅުތަކެއް އަޅުއްވާނެކަމަށް އުންމީދުކުރާކަމަށް އެ ޕާޓީން ބުނެއެވެ.
ދުނިޔޭގެ ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ދިން ހަމަލާ ދިވެހި ރައްޔިތުންގެ ޑިމޮކްރެޓިކް ޕާޓީން ކުށްވެރިކުރުން – https://t.co/Ue5qRznqoK
— MDP Secretariat (@MDPSecretariat) June 21, 2022
ދިވެހި ރައްޔިތުންގެ ޕާޓީ (ޑީއާރްޕީ)އިން ނެރުނު ބަޔާނުގައިވެސް ވަނީ ހަމަނުޖެހުން ހިންގި މައްސަލަ ތަޙްޤީގު ކުރުމަށްގޮވާލާކަމަށާ، ރާއްޖޭގައި ތިބި ޑިޕްލޮމެޓުންނަށް މިހާރަށްވުރެބޮޑަށް ރައްކާތެރިކަން ކަށަވރުކޮށްދިނުމަށް ގޮވާލާކަމަށެވެ. އަދި ރާއްޖެއަކީ އަބަދުވެސް ސުލްހަވެރިކަން އޮތް ޤައުމެއްކަމަށާ ބޭރުގެ ފަރާތްތަކަށް ޚިދުމަތްކުރުމުގައިވެސް ނަމޫނާ ޤައުމެއްކަން ފާހަގަކޮށް އިއްޔެގެ ހާދިސާ ޑީއާރުޕީން ވަނީ ކުށްވެރިކޮށްފައެވެ.
މޯލްޑިވްސް ތާރޑްވޭ ޑިމޮކްރެޓްސް (އެމްޓީޑީ)އިން ނެރުނު ބަޔާނުގައި ވަނީ ބައިނަލްއަޤްވާމީ ޔޯގާ ދުވަހުގެ ގޮތުގައި ޖޫން މަހުގެ 21ވަނަ ދުވަސް ހަމަޖައްސަން 2014ވަނަ އަހަރު އިންޑިއާއިން އދ.އަށް ހުށައެޅި ޤަރާރު ފާސްކުރީ ރައީސް ޔާމީނުގެ އިރުޝާދުގެ ދަށުން އޭރުގެ ސަރުކާރުން ކޯ ސްޕޮންސަރ ކުރައްވައިގެން ވޯޓުލައިގެންކަމަށެވެ.
Maldives Third-Way Democrats MTD condemns violent attack planned and master minded by President Yameen and PPM on International Yoga Day event targeting Maldives Youth Minister, Indian High Commissioner to Maldives & UN representative to Maldives & Diplomats and participants. pic.twitter.com/hAFsrk9Hl0
— Maldives Third-Way Democrats (@MTDSecretariat) June 21, 2022
އަދި 2015ވަނަ އހަރުން ފެށިގެން ކޮންމެ އަހަރަކުވެސް އިންޑިއަން ހައިކޮމިޝަންއާއި އދ.ގުޅިގެން ރާއްޖޭގައި މިދުވަސް ފާހަގަކުރަމުން ދިޔަކަމަށެވެ. ނަމަަވެސް މިއަދު ރައީސް ޔާމީން އިންޑިއާއާ މެދު ހިންގާ ޒާތީ ކޭމްޕޭނުގައި އިންޑިއާއާ ދެކޮޅަށް ދިވެހިންގެ ހިތްތަކުގައި ނަފްރަތު އުފައްދައި ދީނީ އެކި ޖަމާއަތްތަކަށް ހިތްވަރުދެއްވައި ހައްދު ފަހަނައަޅާފައިވާ ދަރަޖައަށް ޕީޕީއެމް މެދުވެރިކޮށް މިކަންކަން ގެންގޮސްފައިވަނީ ރައީސް ޔާމީންގެ "އިންޑީއާ އައުޓް" ކެމްޕޭން އެއްވަރެއްގައި ހިފަހައްޓާނުލެވި އަދި ރައްޔިތުންގެ ތާޢިީދު ނެތި ނާކާމިޔާބުވުމުންކަމަށެވެ.
މި ބަޔާނުގައި ވަނީ މި ހަމަނުޖެހުމުގެ ސަބަބުން ރާއްޖޭގެ ނަން ކިލަނބުކޮށްލައި ފަތުރުވެރިކަމަށް ބަރޯސާވާ އަދި ސުލްހަވެރި ޤައުމެއްގެ ގޮތުގައި އޮތް ރާއްޖެއަށް މިކަމުގެ ސަބަބުން ގެއްލުން ވާނެކަމަށް ބުނެފައެވެ. އެމްޓީޑީން ވަނީ އިއްޔެ ހިންގި ހަމަނުޖެހުން ސީރިއަސް މައްސަލައެއްގެ ގޮތުގައި ތަޙޤީގުކުރުމަށް ރައީސް ނިންމެވުމާ ގުޅިގެންއެކަމަށް މަރުޙާބާ ވިދާޅުވެފައެވެ.
ބައިނަލްއަޤްވާމީ ޔޯގާ ދުވަސް ފާހަގަކުރުމަށް އިއްޔެ ބޭއްވި ހަރަކާތް ހުއްޓުވައި ހިންގި ހަމަނުޖެހުން ސަރުކާރުން އަންނަނީ ތަޙްޤިގުކުރުމުންނެވެ. މިގޮތުން މިކަމުގައި ޝާމިލްވާ މީހުން ކޯޓު އަމުރުގެދަށުން މިހާރު އަންނަނީ ހައްޔަރުކުރަމުންނެވެ.