ކުންފުނީގެ މިސްރާބު ހުރީ ރަނގަޅަށް ކަމަށާއި، މާލީ ހާލަތުވެސް އަންނަނީ ރަނގަޅުވަމުންކަމަށް އައިލެންޑު އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ ޢާޢިޝަތު ޖެނިފާ ވިދާޅުވެއްޖެއެވެ.
ކޯވިޑާއެކު އެންމެ ބޮޑު އަސަރެއްކުރި އެއް ދާއިރާއަކީ ދުނިޔޭގެ އޭވިއޭޝަންގެ ދާއިރާއެވެ. ދަތުރުފަތުރުކުރުން ހުއްޓި އެއަރލައިންތަކަށް މާލީގޮތުން ބޮޑެތި ގެއްލުންތަކެއް ކުރިމަތިވިއެވެ.
ރާއްޖޭގެ ޤައުމީ އެއަރލައިން މޯލްޑިވިއަންއަށްވެސް ކޯވިޑާއެކު ބޮޑު ގެއްލުމަކާ ކުރިމަތިލާން ޖެހުނެވެ. އެގޮތުން މިދިޔަ އަހަރު އެކުންފުންޏަށް 159 މިލިއަން ރުފިޔާގެ ގެއްލުމެއްވަނީ ވެފައެވެ.
ޕީއެސްއެމް ނިއުސްއަށް ދެއްވި އިންޓަރވިއުއެއްގައި ކުންފުނީގެ މާލީ ހާލަތާ ގުޅޭގޮތުން
ވާހަކަދައްކަވަމުން، ޤައުމީ އެއަރލައިން މޯލްޑިވިއަން ހިންގާ އައިލެންޑު އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު ޖެނިފާ ވިދާޅުވީ ކޯވިޑާއެކު އައިލެންޑު އޭވިއޭޝަންގެ މާލީ ޙާލަތަށް ގިނަ އަސަރުތަކެއް ކުރިކަމަށެވެ. އެހެންނަމަވެސް ކުންފުނިން މަސައްކަތްކުރީ އެއްވެސް މުވައްޒަފެއް ވަޒީފާއިން ވަކިނުކޮށް ކުންފުނި ހިނގުމަށް ކަމަށެވެ.
"އެއްވެސް ނޫހަކުންވެސް ނުފެނޭ ކޯވިޑުގެތެރޭގައި ފައިދާވި އެއްވެސް އެއަރލައިނެއް، އެހެން އެއަރލައިންތަކެކެކޭ އެއްފަދައިން އަޅުގަނޑުމެންނަށްވެސް އެ ގޮންޖެހުން ކުރިމަތިވި.، ހުރިހާ މުވައްޒަފުންވެސް ގޮވައިގެން، އެންމެ މުވައްޒަފެއްވެސް ވަކި ނުކުރަން.، ކުންފުންޏަށް އެއީ ވަރަށް ބޮޑު ބުރައެއް.، މުސާރައިގެ އިތުރަށްވެސް ކުރަންޖެހޭ ބައިވަރު ޙަރަދުތައް ހުންނާނެ." ޖެނިފާ ވިދާޅުވިއެވެ.
ޖެނިފާ ފާހަގަކުރެއްވި ގޮތުގައި ސަރުކާރުގެ ވަރަށް ބޮޑު އެހީތެރިކަމެއް އެކުންފުންޏަށް ލިބުނެވެ. އަދި އެކުންފުނިން މިހާރު މަސައްކަތްކުރަމުންދަނީ ސަރުކާރަށް ބަރޯސާނުވެ އަމިއްލަ ފައިމައްޗަށް ތެދުވުމަށް ކަމަށާ، މިހާރު ރާއްޖެއަށް ފަތުރުވެރިން އަންނަ މިންވަރަށް ބަލާއިރު، ކުންފުނި ފައިދާވާ ކުންފުންޏަކަށް ހެދޭނެ ކަމުގެ އުންމީދު ވަރަށްބޮޑުކަމަށް ޖެނިފާ ވިދާޅުވިއެވެ.
"ހީކުރިވަރާ އެއްވަރަށް މާލީ ހާލަތު އަދި ރަނގަޅެއް ނުވޭ.، މިއަހަރު ނިމޭއިރު، ގެއްލުން ފޫބެއްދޭވަރަށް އާމްދަނީ އިތުރުވެގެންދާނެ ކަމަށް ބެލެވެނީ،." ޖެނިފާ ވިދާޅުވިއެވެ.
އައިލެންޑު އޭވިއޭޝަނަކީ ކޯވިޑުގެ ކުރިން ފައިދާވަމުން އައި ކުންފުންޏެކެވެ. އެގޮތުން 2019ވަނަ އަހަރުވެސް އެކުންފުންޏަށް ރަނގަޅު އާމްދަނީއެއް ލިބުނެވެ. އައިލެންޑު އޭވިއޭޝަންގެ މާލީ ހާލަތާއި ގުޅޭގޮތުން ދާދިފަހުން، ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ކުރެއްވި ޓުވީޓެއްގައި ވިދާޅުވެފައިވަނީ ދުނިޔޭގެ ވަރަށް ގިނަ އެއަރލައިންތައް ކޯވިޑާއެކު ހުއްޓި ބަނގުރޫޓުވި ކަމަށާއި، ކޯވިޑްގެ އެންމެ ދަތި ދުވަސްވަރުވެސް މީހުން އުފުލުމާބޭހާ އެހެނިހެން މުހިންމު ތަކެތި ރާއްޖެއަށް އުފުލައިދިނީ ޤައުމީ އެއަރލައިނުން ކަމަށެވެ. އަދި މިހާރު އައިލެންޑު އޭވިއޭޝަން ކަޑައްތުކުރަނީ ރިކަވަރީ ފޭސްކަމަށްވެސް ހަމްދާން ވިދާޅުވެފައިވެއެވެ.
ކޮވިޑްގެ ކުރިން ހަމަ މި ސަރުކާރުގައި ކުންފުންޏަށް ފައިދާވި. ދުނިޔޭގެ އެހެން ގިނަ އެއަރލައިންތައް ގޮތަށް ކޮވިޑްގެ މި ދެ އަހަރު ބޮޑެތި ގެއްލުންތައް ކުރިމަތިވި. މުވައްޒަފުންގެ ވަޒީފާ ދެމެހެއްޓުމަށާ ޤައުމީ އެއަރލައިންއަށް ވި ގެއްލުން ކުޑަކުރަން ސަރުކާރުން އެހީތެރިކަން ފޯރުކޮށްދިން. https://t.co/o5r1IIVv76
— Hamdhan (@Ahmed_hamdhan) June 18, 2022
އައިލެންޑު އޭވިއޭޝަންގެ މޯލްޑިވިއަންއިން، ކޯވިޑުގެ ކުރިން އައީ ބައިނަލްއަޤްވާމީ ގިނަ މަންޒިލްތަކަކަށް ދަތުރުތައް ބާއްވަމުންނެވެ. އެގޮތުން ޗައިނާގެ 6 މަންޒިލަކަށް މޯލްޑިވިއަންގެ ދަތުރުތައް ބާއްވަމުން އައެވެ. ޗައިނާގެ ބޯޑަރު އަދިވެސް ހުޅުވާލާފައި ނުވުމުން މި ދަތުރުތައް އަދިވެސް އޮތީ މެދުކެނޑިފައެވެ. މޯލްޑިވިއަންއިން އަންނަނީ ބައިނަލްއަޤްވާމީ އިތުރު މަންޒިލަތަކަށް ދަތުރުތައް ފެށުމަށް ދިރާސާތައް ހަދަމުންނެވެ.
މޯލްޑިވިއަންގެ ފްލީޓުގައި 22 މަތިންދާބޯޓު އޮވެއެވެ. މީގެތެރޭގައި ހިމެނެނީ 11، ސީ ޕްލޭން، އެއާބަސް 321، އެއާބަސް 320 އަދި ޑޭޝް8 ގެ 9 ބޯޓެވެ.