އަތޮޅުގެ ޖުޑީޝަލް ދާއިރާތަކުގެ މެޖިސްޓްރޭޓުންނާއި މުވައްޒަފުންނަށް އަމާޒުކޮށް، މަދަނީ އިޖުރާއަތުގެ ޤާނޫނާ ގުޅޭ ތަމްރީން ޕްރޮގްރާމެއް ހދ. ކުޅުދުއްފުށީގައި ފަށައިފިއެވެ.
މި ޕްރޮގްރާމް އިފްތިތާޙްކޮށްދެއްވީ ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް އަޙްމަދު މުޢުތަޞިމް އަދުނާނެވެ.
މި ޕްރޮގްރާމް ކުރިއަށް ގެންދަނީ ހއ، ހދ އަދި ށ އަތޮޅަށް އަމާޒުކޮށްގެންނެވެ. މިއަދުގެ ތަމްރީން ޕްރޮގްރާމްގައި މިތިން އަތޮޅުން 8 މެޖިސްޓްރޭޓުންނާއި 38 މުވައްޒަފުން ވަނީ ބއިވެރިވެއެވެ.
މި ޕްރޮގްރާމް ފެށުމުގެ ގޮތުން ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް އަޙްމަދު މުޢުތަޞިމް ވިދާޅުވީ މި ޤާނޫނަށް ޢަމަލުކުރަން ފެށުމުން ޢާންމު ރައްޔިތުންނަށް ފަސޭހަކަމާއި އަވަސްކަމާއެކު ޢަދަލު އިންސާފަށް ވާސިލުވުމުގެ މަގު ފަހިވާގޮތަށް އިންތިޒާމްތައް ހަމަޖެއްސުމަކީ މުހިންމުކަމެއްކަމަށެވެ. އަދި އެކަމަށް މަގުފަހިވެގެންދާނެ ގޮތަށް ކޯޓުތަކުން ކަންކަން ތަރުތީބުކޮށް އިންތިޒާމްކުރުމަށްވެސް އެމަނިކުފާނު ވަނީ އެދިވަޑައިގެންފައެވެ.
16 ޑިސެންބަރު 2021 ގައި ތަސްދީޤުކުރެއްވި މަދަނީ އިޖުރާއަތުގެ ޤާނޫނަށް މިމަހުގެ 16 ވަނަ ދުވަހު ވަނީ ޢަމަލުކުރަން ފަށާފައެވެ. މި ޕްރޮގްރާމަކީ މަދަނީ އިޖުރާއަތުގެ ޤާނޫނަށް އަހުލުވެރިކުރުމުގެ ގޮތުން ޖުޑީޝަލް އެކެޑަމީން އިންތިޒާމްކޮށްގެން ބާއްވާ ހަތްވަނަ ތަމްރީން ޕްރޮގްރާމެވެ.
މަދަނީ އިޖުރާއަތުގެ ޤާނޫނު ވުޖޫދަށް އައުމާ ގުޅިގެން، ފަނޑިޔާރުންނާއި ކޯޓުތަކުގެ މުވައްޒަފުން އެ ޤާނޫނަށް އަހުލުވެރިކުރުވުމުގެ ގޮތުން ދިވެހިރާއްޖޭގެ އެކި ސަރަޙައްދުތަކުގައި ސިލްސިލާކޮށް ތަމްރީން ޕްރޮގްރާމްތައް ކުރިއަށް ގެންދިއުމަށް ޖުޑީޝަލް އެކެޑަމީއިން ވަނީ ރާވާފައެވެ. pic.twitter.com/2FWdaIHUo4
— Maldives Judiciary (@judiciarymv) June 18, 2022
މި ޕްރޮގްރާމްގައި މައިގަނޑު ގޮތެއްގައި އަލިއަޅުވާލަނީ މި ޤާނޫނުގެ ދަށުން މައްސަލަ ބަލައިގަތުމާއި ޝަރީޢަތްކުރުން އަދި ޙުކުމް ތަންފީޛުކުރުމާ ގުޅޭގޮތުން ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ބުނެއެވެ. އަދި މަދަނީ މައްސަލަތަކުގައި، މައްސަލަ ބަލައިގަތުމާ ހަމައިން ފެށިގެން ޙުކުމްކުރުމާ ހަމައަށް މައްސަލައާ ގުޅިގެން އިދާރީ ކަންކަން ކުރިއަށް ގެންދާނެގޮތްތަކާއި ޚަރަދު ނަގައިދިނުމުގައި ހިސާބުކުރާނެ ގޮތްތަކާ ގުޅޭގޮތުން މަޢުލޫމާތު ދީ، ޢަމަލީ ސިފައެއްގައި މިކަންކަން ކުރާނެ ގޮތްތައްވެސް މި ޕްރޮގްރާމްގެ ދަށުން ކިޔައިދެވޭނެކަމަށް އެ ޑިޕާޓްމަންޓުން ބުނެއެވެ.
މަދަނީ އިޖުރާއަތުގެ ޤާނޫނު ވުޖޫދަށް އައުމާ ގުޅިގެން، ފަނޑިޔާރުންނާއި ކޯޓުތަކުގެ މުވައްޒަފުން އެ ޤާނޫނަށް އަހުލުވެރިކުރުވުމުގެ ގޮތުން ދިވެހިރާއްޖޭގެ އެކި ސަރަޙައްދުތަކުގައި ސިލްސިލާކޮށް ތަމްރީން ޕްރޮގްރާމްތައް ކުރިއަށް ގެންދިއުމަށް ޖުޑީޝަލް އެކެޑަމީއިން ވަނީ ރާވާފައެވެ. މިގޮތުން، އުތުރުގެ އަތޮޅުތަކަށް ބޭއްވޭ މި ޕްރޮގްރާމަށްފަހު، ރާއްޖޭގެ ދެކުނު ގައިވެސް މި ޤާނޫނާގުޅޭ ތަމްރީން ޕްރޮގްރާމެއް ބޭއްވުމަށް ވަނީ ހަމަޖެހިފައެވެ.