ރާއްޖޭގައި މިހާތަނަށް ހުޅުވި އެންމެ ބޮޑު ކަނޑު އަޑީގެ ރެސްޓޯރެންޓް ހުޅުވައިފިއެވެ. "އޮންލީ ބްލޫ"ގެ ނަމުގައި ހުޅުވި ރެސްޓޯރެންޓަކީ އެޓްމޯސްފިއާ ހޮޓެލްސް އެންޑް ރިސޯޓްސްގެ "ކަލާސް އޮފް ބްލޫ" ބްރޭންޑްގެ ދަށުން ތަރައްގީ ކޮށްފައިވާ ރެސްޓޯރެންޓެކެވެ.
އެޓްމޮސްފިއަރ ހޮޓެލްސް އެންޑް ރިސޯޓްސްގެ ދަށުން ރާއްޖޭގައި 2 ރިސޯޓެއް އަންނަނީ ހިންގަމުންނެވެ. އެއީ އޮބްލޫ ސިލެކްޓް ލޯބިގިލި އަދި އޮބްލޫ އެކްސްޕީރިއަންސް އާއިލާފުށި ރިސޯޓެވެ.
ރާއްޖޭގައި މިހާތަނަށް ހުޅުވި ކަނޑުއަޑީގެ އެންމެ ބޮޑު ރެސްޓޯރަންޓް "އޮންލީ ބްލޫ" ހުޅުވާފައިވާއިރު މިތަން ހުންނަނީ އެ ކުންފުނީގެ 2 ރިސޯޓް ދެމެދުގައެވެ. ލޯބިގިލި ރިސޯޓާއި އާއިލާފުށި ރިސޯޓް ވަނީ ބްރިޖަކުން ގުޅާލާފައެވެ. އެހެންކަމުން މި ރެސްޓޯރަންޓަށްދާ ފަތުރުވެރިން ދާންޖެހޭނީ މި ބްރިޖުންލާފައެވެ.
މި ރެސްޓޯރެންޓް ހުންނަނީ ކަނޑުގެ 6.8 މީޓަރު އަޑީގައެވެ. މި ރެސްޓޯރެންޓްގައި ތިބޭއިރު ކަނޑުއަޑީގެ ރީތި މަންޒަރުތައް ފެންނަން ހުރެއެވެ. އެގޮތުން މަސްމަހާމެއްސާއި ކަނޑުގެ އެހެނިހެން ދިރުންތައް ވަރަށް ރީތިކޮށް ފެނެއެވެ. އަދި މި ރެސްޓޯރެންޓްގައި ތިބޭއިރު ކައްކާއިން ކައްކާ މަންޒަރުވެސް ވަރަށް ރީތިކޮށް ފެންނަން ހުރެއެވެ.
މި ރެސްޓޯރެންޓް ފަރުމާކޮށްފައިވާ ގޮތުން ކޮންމެ މޭޒެއްވެސް ބަހައްޓާފައިވަނީ ކަނޑުއަޑީގެ މަންޒަރުފެންނަ ކުޑަދޮރަކާއި ކައިރީގައެވެ. ރެސްޓޯރެންޓުގެ ޑައިނިން ރޫމުގެ ބޮޑުމިނުގައި 190 އަކަ މީޓަރު ހުރެއެވެ. އަދި މިތަނުގައި އެއްފަހަރާ 46 މީހުންނަށް ތިބެވޭނެއެވެ.
ރާއްޖޭގައި މިނޫނަސް ކަނޑުއަޑީގެ ގިނަ ރެސްޓޯރެންޓްތައް އެކި ރިސޯޓްތަކުގައި ވަނީ ހުޅުވާފައެވެ. އަދި ކަނޑުއަޑީގެ ކޮޓަރިތައްވެސް މިހާރު ރާއްޖޭގައި އެބަހުއްޓެވެ.