ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، ޓިކެޓުގައި ހިމެނޭ ފިއުލް ސާޗަރޖުގެ އަދަދަށް ބަދަލު ގެނެސްފައިވާ ކަމަށް އައިލެންޑު އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ އައިޝަތު ޖެނިފާ ވިދާޅުވެއްޖެއެވެ.
ޖެނިފަރ މިހެން ވިދާޅުވެފައިމިވަނީ މޯލްޑިވިއަންގެ ޓިކެޓުގެ އަގު ބޮޑުކޮށްފައިވާ ކަމަށް ދެކެވޭ ވާހަކަތަކާއި ގުޅިގެންނެވެ.
ޕީއެސްއެމްނިއުސްއަށް ދެއްވި އިންޓަރވިއުއެއްގައި އައިލެންޑު އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ އައިޝަތު ޖެނިފާ ވިދާޅުވީ ޓިކެޓުގެ އަގު ބޮޑުކޮށްފައި ނުވާ ކަމަށެވެ. އެހެން ނަމަވެސް ތެލުގެ އަގު އުފުލެމުންދާތީ ޓިކެޓުގައި ހިމެނޭ ފިއުލް ސާޗަރޖަށް ބަދަލުގެނެސްފައިވާ ކަމަށެވެ.
" އަސްލު ޓިކެޓުގެ އަގަކަށް ނޫން ބަދަލުގެނައީ، ފާއިތުވި 5 އަހަރުވެސް ފިއުލް ސާޗަރޖަށް ބަދަލެއް ނުގެންނަން، ހަނގުރާމަ އާއި ހެދި، ތެލުގެ އަގު މިވަނީ އުފުލިފައި، އަޅުގަނޑުމެންނަށް ފިއުލް ގަންނަން ލިބޭ އަގު މިދިޔަ އޮކްޓޯބަރުމަހާ، ޖޫން 1 އަޅާ ބަލާއިރު މިހާރު މިވަނީ %48 އިތުރުވެފައި،" ޖެނިފާ ވިދާޅުވިއެވެ.
ޖެނިފާ ފާހަގަކުރެއްވިގޮތުގައި ކުންފުނި ދެމެހެއްޓެނިވިގޮތެއްގައި ހިންގުމަށް ފިއުލް ސާޗަރޖަށް ބަދަލު ގެންނަން ޖެހޭ ކަމަށެވެ. އެގޮތުން 170 ރުފިޔާ ފިއުލް ސާޗަރޖުން ބޮޑުކޮށްފައިވާ ކަމަށް ޖެނިފާ ވިދާޅުވިއެވެ.
ދުނިޔޭގެ ބާޒާރުގައި ތެލުގެ އަގު އުފުލިފައިވަނީ ރަޝިއާ - ޔޫކްރެއިން ހަނގުރާމައާ ގުޅިގެންނެވެ. އޭގެ އަސަރު އެންމެ ބޮޑަށް ކޮށްފައިވަނީ ތެލުގެ ވިޔަފާރިއަށެވެ. މޯލްޑިވިންގެ އިތުރުން ދުނިޔޭގެ އެހެން އެއަރލައިންތަކުވެސް ދަނީ ޖެޓު ފިއުލްއަށް ކުރަން ޖެހޭ ހޭދަ އިތުރުވަމުންދާތީ ޓިކެޓުގެ އަގުތަކަށް ބަދަލުގެންނަމުންނެވެ.