ބޯހިމެނުމުގެ ހަރަކާތް ކުރިއަށް ގެންދިއުމަށް ތައްޔާރުވުމުގެ ގޮތުން ބާއްވާ "ޕައިލެޓް ސެންސަސް" ޕްރޮގްރާމް ފަށައިފިއެވެ.
މި ހަރަކާތް މިމަހުގެ 26 ވަނަ ދުވަހުގެ ނިޔަލަށް ކުރިއަށް ގެންދިޔުމަށް ވަނީ ހަމަޖެހިފައެވެ.
"ޕައިލެޓް ސެންސަސް" އަކީ ބޯހިމެނުމުގެ އަސްލު ހަރަކާތުގެ ކުރިން ބޯހިމެނުމުގެ ހުރިހާ މަރުހަލާތަކެއް ކުރިއަށްދާނެ ގޮތް ދެނެގަތުމަށް ހިންގާ ހަރަކާތެކެވެ.
މި ހަރަކާތް ކުރިއަށްގެންދިޔުމަށް ހަމަޖެހިފައިވަނީ މާލެ، ހުޅުމާލެ، ކުޅުދުއްފުށި ސިޓީ އަދި ހދ. ނޮޅިވަރަމް އިން ހޮވާލެވިފައިވާ ސަރަހައްދު ތަކެއްގައެވެ. އަދި މީގެ އިތުރުން މާލޭގެ ހާބަރު ސަރަހައްދާއި ތިލަފުށީގެ އިތުރުން ޕެރަޑައިސް އައިލެންޑް ރިސޯޓްގައި މި ހަރަކާތް ކުރިއަށްގެންދާނެއެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނީ މި ހަރަކާތުގެ ތެރެއިން ހޮވާލެވިފައިވާ ސަރަހައްދުތަކުގެ ގޭބީސީތަކާއި މަސައްކަތް ހިންގާ ތަންތަނުން ކޮންމެ ދުވަހެއްގެ ހެނދުނު 9:00 އިން ފެށިގެން ހަވީރު 18:00 އާއި ދެމެދު މައުލޫމާތު ނެގުމަށްޓަކައި ބިއުރޯ ޓީމްތަކުން ޒިޔާރަތްކުރަމުން ގެންދާނެ ކަމަށެވެ. އަދި މައުލޫމާތު އެއްކުރުމުގައި ހަރަކާތްތެރިވާ ފަރާތްތަކަށް ބިއުރޯއިން ހުއްދަ ދެވިފައިވާ މީހެއްކަން އަންގައިދޭ ފާހެއް ދޫކުރެވިފައިވާނެކަމަށާއި މައުލޫމާތު ދިނުމުގެ ކުރިން މިފާސް އޮތް މީހެއްތޯ ބެލުމަކީ އާއްމު ރައްޔިތުންގެ ޒިންމާއެއް ކަމަށް ސްޓެޓިސްޓިކްސް ބިއުރޯއިން ބުނެއެވެ.
ބޯހިމެނުމުގައި ގޭބީސީތަކުން އަދި އާންމު ފަރުދުންގެ ފަރާތުން ނަގާނެ މައުލޫމާތުތައް :
* ދިރިއުޅޭ ތަނާއި ބެހޭ މައުލޫމާތު
* ގޭބީސީ ދިރިއުޅޭ ތަނުގެ ބޮޑުމިން
* މީހުންގެ އުފަން ތާރީޚް
* ހާސިލްކޮށްފައިވާ އެންމެ މަތީ ތަޢުލީމް
* އާމްދަނީ ހޯދުމަށް ކުރާ މަސައްކަތް
* ފުރަތަމަ ކައިވެނި ކުރި އުމުރު
* ދަރިންގެ އަދަދު / ފުރަތަމަ ދަރިފުޅު ލިބުނު އުމުރު
މަސައްކަތް ހިންގާ ތަންތަނުން ނަގާނެ މައުލޫމާތުތައް :
* ތަނުގެ ރަޖިސްޓްރޭޝަން ނަންބަރުގެ މައުލޫމާތު
* ތަނުގައި ހިންގާ މައިގަނޑު މަސައްކަތުގެ ތަފްސީލް
* ވަޒީފާގައި ގެންގުޅޭ މުވައްޒަފުންގެ އަދަދު
* ތަނުގެ އާމްދަނީ އާއި ޚަރަދު
ސްޓެޓިސްޓިކްސް ބިއުރޯއިން ވިދާޅުވީ، "ޕައިލެޓް ސެންސަސް" ޕްރޮގްރާމެއް ކުރިއަށްގެންދިއުމުގެ އެންމެ މުހިއްމު ބޭނުމަކީ ބޯހިމެނުމުގެ މަސައްކަތަށް ތައްޔާރުވެފައިވާ މިންވަރު ވަޒަންކުރުންކަމަށެވެ.
މި ޕައިލެޓް ސެންސަސް ޕްރޮގްރާމުގައި ބޭނުންކުރާނީ އަސްލު ބޯހިމެނުމަށް ތައްޔާރުކޮށްފައިވާ ސުވާލު ކަރުދާސްތަކެވެ. އަދި ބޯހިމެނުމުގެ މަސައްކަތުގައި ބޭނުންކުރާ ޓެބްލެޓްތައްވެސް ޕައިލެޓް ސެންސަސް ޕްރޮގްރާމުގައި ޓެސްޓްކުރެވިގެންދާނެ ކަމަށް އެ ބިއުރޯއިން ވިދާޅުވެއެވެ. މި ހަރަކާތުގެ ތެރެއިން ބޯހިމެނުމުގެ މަސައްކަތަށް އެވްރެޖްކޮށް ހޭދަވާނެ ވަގުތާއި، އަތޮޅުތަކުން ބޭނުންވާ ރިޕޯޓްތައް ބޭނުންވާގޮތަށް ލިބޭތޯފަދަ ކަންކަން ޗެކްކުރެވިގެންދާނެކަމަށް އެބިއުރޯއިން ވިދާޅުވެއެވެ.
މިހަރަކާތަކީ ޤައުމީ ފެންވަރުގައި ހިންގޭ ވަރަށް ބޮޑު މަސައްކަތަކަށް ވުމާއިއެކު އާންމުންގެ ފުރިހަމަ އެއްބާރުލުން ބޭނުންވާނެކަމަށް ސްޓެޓިސްޓިކްސް ބިއުރޯއިން ބުނެއެވެ.
ރާއްޖޭގެ އާބާދީއާއި ދިރިއުޅޭ ތަންތަނުގެ ބޯހިމެނުމާއި އިޤްތިޞާދީ މަސައްކަތްތަކުގެ ބޯހިމެނުން ކުރިއަށް ގެންދިޔުމަށް ނިންމާފައިވަނީ މިއަހަރުގެ ސެޕްޓެމްބަރުމަހުގެ 13 އިން 14 އަށް އަދި 17 އިން 25 އަށެވެ. ރާއްޖޭގެ އާބާދީއާއި ބޯހިމެނުމުގެ ބައެއް މަޢުލޫމާތުތައް އޮކްޓޯބަރު 6 ވަނަ ދުވަހު ޢާއްމުކުރާނެއެވެ. އަދި މުޅި ސަރވޭގެ މަޢުލޫމާތު ހާމަކުރާނީ ޤައުމީ ތަފާސްހިސާބުތަކުގެ ދުވަސްކަމަށްވާ އޮކްޓޯބަރު 20 ގައެވެ.