ހުޅުމާލޭގައި ޤާއިމްކުރާ ޕްރައިވެޓް ސްކޫލެއް ކަމަށްވާ "އަޖިއަލް ބައިލިންގުއަލް ސްކޫލް"ގެ ބިންގާ ރަސްމީކޮށް އަޅައިފިއެވެ.
މިސްކޫލް އިމާރާތުގެ ބިންގާ ރަސްމީކޮށް އަޅުއްވާދެއްވީ ދިވެހިރާއްޖޭގެ ރައީސުލްޖުމްހޫރިއްޔާގެ ނާއިބު ފައިސަލް ނަސީމް އާއި އެޑިއުކޭޝަން މިނިސްޓަރ ޑރ، އާއިޝަތު އަލީ އާއި އަލްޖެރީ ގްރޫޕްގެ ޗެއާމަން ތޮލާލް އަލްޖެރީއެވެ.
"އަޖިއަލް ބައިލިންގުއަލް ސްކޫލް" އަކީ ކުވެއިތުގެ އަލްޖެރީ ހޯލްޑިންގްސް ގްރޫޕާއި ރާއްޖެއާއި ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި ޤާއިމްކުރާ ޕްރައިވެޓް ސްކޫލެކެވެ. ހުޅުމާލޭގައި ބިންގާ އެޅި މިސްކޫލަކީ ލޯކަލް އަދި އިންޓަރނޭޝަނަލް ޕާޓްނަރުންގެ އެހީތެރިކަމާއިއެކު ކުރިއަށް ގެންދާ ޕްރޮޖެކްޓެކެވެ. މި ޕްރޮޖެކްޓްގެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާއެވެ.
މި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ނާއިބުރައީސް ފައިސަލް ނަސީމް ވިދާޅުވީ މި ޕްރޮޖްކްޓަކީ ކުރިއަށް އޮތް ތަނުގައި ދަރިވަރުންގެ ކިޔެވުމުގެ ތަޖުރިބާތައް އިތުރު ހަރުފަތަކަށް ގެންދިޔުމަށް ކޮށިގެންދާ މަގެއްކަމަށެވެ. އަދި މިއީ ހުޅުމާލޭގައި ކިޔަވާ ކުދިންގެ އާބާދީ އިތުރުވަމުންދާ މި ދަނޑިވަޅުގައި ޕްރައިވެޓް ސްކޫލްތަކުގައި ޒަމާނީ ތަޢުލީމާއިއެކު ދަރިވަރުންގެ ކިޔެވުން ބިނާކުރުމަށް ލިބިގެންދާ ފުރުސަތެއްގެ ގޮތުގައި އެމަނިކުފާނު ފާހަގަކުރެއްވިއެވެ. ދަރިންނަށް ތަޢުލީމު ދިނުމުގައި، ނުރަނގަޅުކަންކަމުގެ ތެރެއަށް ކުދިން ހުށައެޅިގެން ދިޔަ ނުދިމާއި، ދިރިއުޅުމުގެ ޙައްޤުތައް ކަށަވަރުކޮށްދިނުމާއި ހުރިހާ ބާވަތެއްގެ އަނިޔާއިން ކުދިން ސަލާމަތްކުރުމުގެ މުހިންމު ކަމުގެ މައްޗަށްވެސް ނައިބު ރައީސްގެ ވާހަކަފުޅުގައި އަލިއަޅުއްވާލެއްވިއެވެ.
"މިއަދު އަޅުގަނޑުމެންގެ ދަރިވަރުންގެ ތައުލީމާ ގުޅޭގޮތުން ވާހަކަދައްކަމުން އަންނައިރު ޔަގީން ކުރަން ޖެހޭ އެއްކަމަކީ އެކުދިން ބޮޑެތިވަމުން އަންނަނީ މާރާމާރީއާއި ކުއްކުރުން މަދު އަދި އަޚްލާގް ރަނގަޅު ވެއްޓެއްގައިކަން. އެދަރިންނަކީ މާދަމާގެ މުސްތަގުބަލް ކަމަށް ވާއިރު އެއީ އަހަރެމެން އެންމެންގެ މަސްއޫލިއްޔަތެއް ރައްކާތެރި މާހައުލެއް ޤާއިމްކޮށް ރިވެތި އަޚްލާގުގަ އެދަރިން ބިނާކުރުން" ރައީސުލްޖުމްހޫރިއްޔާގެ ނާއިބު ފައިސަލް ނަސީމް ވިދާޅުވިއެވެ.
ކުވައިތުގެ އަލްޖެރީ ހޯލްޑިންގ ގުރޫޕުން ހުޅުމާލޭގައި އަޅާ، އަޖިއަލް ބައިލިންގުއަލް ސްކޫލަކީ، އެންމެ ފަހުގެ ޒަމާނީ ވަޞީލަތްތަކާއި އެކު ކިޔަވައިދެވޭނެ ވަޞީލަތްތައް ޤާއިމްކޮށްގެން، އިނގިރޭސި މީޑިއަމް އާއި ޢަރަބި މީޑިއަމްއަށް ކިޔަވައިދޭނެ ސްކޫލެކެވެ. އަދި މިސްކޫލަކީ ޕްރީސްކޫލް އިން ފެށިގެން ގްރޭޑް 12 އާއި ހަމައަށް ކިޔަވައިދޭ ގޮތަށް ހަމަޖައްސާފައިވާ އިންޓަރނޭޝަނަލް ސްކޫލެކެވެ.
އަލްޖެރީ ހޯލްޑިންގ ގުރޫޕުން މި ސްކޫލު ތަރައްޤީ ކުރާނީ ދެފިޔަވައްސަކަށް ބަހާލައިގެންނެވެ. މިގޮތުން ފުރަތަމަ ފިޔަވަހީގެ ދަށުން ސްކޫލު ހުޅުވާއިރު، ފުރަތަމަ ކިޔައިވައިދޭން ފެށުމަށް ހަމަޖައްސާފައި ވަނީ ޕްރީ ސްކޫލާއި އަދި ޕްރައިމަރީ ގްރޭޑްތަކަށެވެ.
ހުޅުމާލޭގައި އިތުރު 5 ސްކޫލެއް އެޅުމުގެ މަސައްކަތް މިހާރުވެސް އެކި މަރުހަލާތަކުގައި ކުރިޔަށްދެއެވެ. އޭގެ ތެރޭގައި ދެޕްރީސްކޫލުވެސް ހިމެނެއެވެ.