އިންސާނީ ވަސީލަތް ތަރައްޤީކުރުމުގެ ދާއިރާއިން ތަޢުލީމު ޙާސިލްކުރުމަށް ޖަޕާނު ސަރުކާރުން އެހީދީފިއެވެ.
މި އެހީއަކީ 2020ވަނަ އަހަރު ޖަޕާނާއި ރާއްޖެއާއި ދެމެދު ވެވުނު އެއްބަސްވުމެއްގެ ދަށުން ދީފައިވާ އެހީއެވެ. އެހީގެ ގޮތުގައި 865000 ޑޮލަރު ވަނީ ކަނޑައަޅާފައެވެ.
މިކަމުގެ އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ހަލީލެވެ. އަދި ޖަޕާނު ސަރުކާރުގެ ފަރާތުން ސޮއިކުރެއްވީ އެ ގައުުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރިއެވެ.
މިއީ ޖަޕާނާއި ރާއްޖެއާއި ދެމެދު އެއްބަސްވެފައިވާ "ހިއުމަން ރިސޯސް ޑިވެލޮޕްމަންޓް ސްކޮލަރޝިޕް"ގެ ދަށުން ރާއްޖެއަށް އެހީ ދިން ތިން ވަނަ އަހަރެވެ. މި އެއްބަސްވުމުގެ ދަށުން ސޯޝަލް ސައިންސަސްގެ ދާއިރާތަކުން 6 މީހަކަށް މާސްޓަރސް ޑިގްރީ ޙާސިލް ކުރުމުގެ ފުރުޞަތު ދެވޭނެއެވެ. ހުރިހާ ޚަރަދެއް ޖަޕާނު ސަރުކާރުގެ އެހީގައި ބަލަހައްޓާ، މި ސްކޮލަޝިޕްގައި ޖަޕާނުގެ އެންމެ ފެންވަރު ރަނގަޅު ޔުނިވަރސިޓީތަކުން ގްރޭޖުއޭޓްވުމުގެ ފުރުޞަތު ލިބޭނެއެވެ.
ޖަޕާނު ސަރުކާރުން ފާހަގަކުރާ ގޮތުގައި މި އެހީގެ އެންމެ ބޮޑު ބޭނުމަކީ، އިޤްތިޞާދާއި ސިޔާސަތާ ގުޅޭ ކަންކަން ނިންމުމުގައި ތަޢުލީމީ ޤާބިލު އަދި ޒުވާން މަސައްކަތްތެރިންތަކެއް އުފެއްދުމެވެ. އަދި ޖަޕާނާއި ރާއްޖެއާއި ދެމެދު އޮތް ޒަމާންވީ ގުޅުން އިތުރަށް ވަރުގަދަކުރުމެވެ. ޖަޕާނު ސަރުކާރުންވަނީ ކުރިމަގުގައިވެސް މިފަދަ ފުރުޞަތުތައް ރާއްޖެއަށް ފަހިކޮށްދެއްވާނެކަމުގެ ޔަގީންކަން ދެއްވާފައެވެ.
ޖަޕާނަކީ ތަޢުލީމީ ދާއިރާއާއި މީހުން ބިނާކުރުމުގެ ދާއިރާގައި ރާއްޖެއަށް އަބަދުވެސް އެހީތެރިކަން ދެމުން އަންނަ ޤައުމެކެވެ.