އިސްލާމީ ޝަރިޢާ ހުއްދަކުރާ އުސޫލަކުން ފަހަށް ފައިސާ ރައްކާކުރުމުގެ އާދަ ދިވެހިންގެ މެދުގައި އަށަގެންނެވުމުގެ މަގްސަދުގައި މޯލްޑިވްސް އިސްލާމިކް ބޭންކް (އެމްއައިބީ)އިން ކުރިއަށް ގެންދާ ސޭވް ވިތް އެމްއައިބީ ޕްރޮމޯޝަން މިއަހަރު ވަރަށް ހާއްސަ އިނާމުތަކަކާއިއެކު ފަށައިފިއެވެ.
ރާއްޖޭގައި އޮޕަރޭޓްކުރާ ފުރަތަމަ އަދި ހަމައެކަނި ފުލްފްލެޖް އިސްލާމިކް ބޭންކުން ފެށި މި ޕްރޮމޯޝަންގެ ދަށުން 30،000 ރުފިޔާއަށްވުރެ މަދު ނޫން އަދަދެއް ޑިސެމްބަރުމަހުގެ ކުރިން އެމްއައިބީ ކާމިޔާބު ކިޑްސް ނުވަތަ ކިޑްސް އެކައުންޓެއްގައި ރައްކާކުރާ ފަރާތްތަކުގެ ތެރެއިން ހޮވޭ ފަރާތަކަށް އާއިލާއާއިއެކު މެލޭޝިއާގެ ލެގޯ ލޭންޑަށް ދިއުމުގެ 3 ދުވަހުގެ ދަތުރެއް ލިބެއެވެ. މި ޕްރޮމޯޝަން ކުރިޔަށްދާނީ 8 ޖޫން 2022 އިން 31 ޑިސެމްބަރ 2022 ގެ ނިޔަލަށެވެ.
އެމްއައިބީގެ ކާމިޔާބު ކިޑްސް އެކައުންޓަކީ މިވަގުތު ރާއްޖޭގައި އެންމެ ރަނގަޅު ރޭޓެއްގައި ފައިދާ ހިއްސާކުރާ އެއް ކިޑްސް ސޭވިން އެކައުންޓުކަމަށް އެމްއައިބީން ވިދާޅުވެއެވެ. މި އެކައުންޓަކީ އެހެން ކިޑްސް ސޭވިންއެކައުންޓަކާ ޚިލާފަށް ކުއްޖާއަށް 18 އަހަރު ފުރުމާހަމަޔަށް ވަކި އަދަދެއްގެ ފައިސާ ރައްކާކުރުމުގެ އަމާޒުގައި ހުޅުވާ އެކައުންޓެކެވެ. ކާމިޔާބު ކިޑްސް އެކައުންޓެއް ޑޮލަރުންވެސް ހުޅުވިދާނެއެވެ. އަދި ކޮންމެ 6 މަހަކުން ފައިދާލިބޭއިރު ބެލެނިވެރިޔާ ބޭނުންނަމަ ހިލޭ ސްޓޭންޑީން އޯޑާ ހެދުމުގެ ފުރުސަތުވެސް ބޭންކުން ދެއެވެ.
އިސްލާމިކް ބޭންކުގައި ހުޅުވޭ ހުރިހާ ސޭވިން އެކައުންޓްތަކަކީވެސް މުޟާރަބާގެ އުސޫލުން ހުޅުވޭ އެކައުންޓުތަކެކެވެ. މިއެކައުންޓުތަކަށް ފައިދާގެ ގޮތުގައި އިތުރުވާ ބަޔަކީ ކޮންވެންޝަނަލް ބޭންކުތަކާ ޚިލާފަށް، ކަނޑައެޅި ނިމިފައިވާ ވަކިރޭޓެއް ނޫނެވެ. އެއާ ޚިލާފަށް އެކައުންޓު ހުޅުވާއިރު އެއްބަސްވާ ޕްރޮފިޓް ޝެއަރިންގ ރޭޝިއޯ ނުވަތަ ފައިދާ ހިއްސާކުރާ ނިސްބަތުންނެވެ. މީގެ ސަބަބުން ބޭންކަށް ގިނައިން ފައިދާވާނަމަ ކަސްޓަމަރުންނަށްވެސް ގިނައިން ފައިދާ ލިބެއެވެ. ދެފަރާތަށްވެސް އިންސާފުވެރިކޮށް މި ލިބޭ ފައިސާއަކީ ޝަރިއާ ހުއްދަކުރާ އިންވެސްޓްމަންޓުތަކުން ބޭންކަށް ލިބޭ ފައިދާއިން ކަމަށް އެމްއައިބީން ވިދާޅުވެއެވެ.