ރައްޔިތުންގެ މަޖިލީހުގެ ރައީސް، މުޙައްމަދު ނަޝީދު އަވަހާރަކޮށްލަން މިދިޔަ އަހަރުގެ މޭމަހުގެ 6ވަނަ ދުވަހު ދިން ހަމަލާއާ ގުޅިގެން ކްރިމިނަލްކޯޓުގައި ކުރިއަށްދާ މައްސަލަ ބަލާ ބެންޗްގައި ހިމެނިވަޑައިގަންނަވާ ޤާޟީންގެ ފޮޓޯ މީޑިއާތަކުން ހާމަނުކުރުމަށް އެކޯޓުން އެދިއްޖެއެވެ.
ކޯޓުން މިގޮތަށް އެދިފައިވަނީ މެއި 6ގެ ބޮމުގެ މައްސަލައިގެ ޒާތާއި ބާވަތުންނާއި މައްސަލައިގެ ކަންކަމުގައި ކަން ހިނގާފައިވާ ގޮތުގެ މައްޗަށްބަލައި ޤާޟީންގެ ސަލާމަތާއި ރައްކާތެރިކަމަށްޓަކައި ކަމަށް ކްރިމިނަލްކޯޓުން ވިދާޅުވެއެވެ. އެކޯޓުން މިގޮތައް އެދިފައި މިވަނީ އިއްޔެ އޮތް މިމައްސަލައިގެ އަޑުއެހުމުގެކުރިން މައްސަލަ ބަލާ ބެންޗުގެ ރިޔާސަތު ބަލަހައްޓަވާ ޤާޟީ އާދަމް މުޙައްމަދު މައްސަލައިން ތަނާޒުލުވެވަޑައިގެންފައިވާ ދަނޑިވަޅެއްގައެވެ.
މިމައްސަލަ ބަލާ ބެންޗުގެ ޤާޟީ އާދަމް މުޙައްމަދު ތަނާޒުލުވެވަޑައިގަތީ މިމައްސަލާގައި ދަޢުވާ ލިބޭ މ.ކުދެހިގެ، އިސްހާގުގެ ދަރިއަކު އޭނާގެ ޢާއިލާއަށް ބިރުދައްކައި އިންޒާރުދީފައިވާތީއެވެ. އިންޒާރު ދިން މައްސަލަވެސް ދަނީ ބަލަމުންނެވެ. އެމައްސަލަ ބަލަމުން ދަނިކޮށް އިސްހާޤު ހިމެނޭ މައްސަލައެއް ބަލާ ބެންޗުގައި އިނުމުން ޤާޞީވަނީ ތަނާޒުލުވެވަޑައިގެންފައެވެ.
މެއި 6ގެ މައްސަލަ ބައްލަވަނީ ކްރިމިނަލް ކޯޓުގެ 3 ޤާޟީންގެ ބެންޗަކުންނެވެ. މި ބެންޗްގައި ޤާޟީ އާދަމް މުޙައްމަދުގެ އިތުރުން ދެން ހިމެނެނީ ޤާޟީ މުޙައްމަދު މިސްބާހާއި ޤާޟީ ޞަފްވަތު ހަބީބެވެ.