ބެންކޮކް އެއަރވޭސްގެ ދަތުރުތައް އަލުން ރާއްޖެއަށް ފަށަން ނިންމައިފިއެވެ. މި އެއަރލައިންގެ ދަތުރުތައް ރާއްޖެއަށް ހުއްޓާލާފައިވަނީ ކޯވިޑް19 އާއި ގުޅިގެންނެވެ.
މި ދަތުރުތައް ކުރާނީ ބެންކޮކްގެ ސުވަނަބަމީ އިންޓަރނޭޝަނަލް އެއަރޕޯޓުން ވެލާނާ އިންޓަރނޭޝަނަލް އެއަރޕޯޓަށެވެ. މިހާރު ޝެޑިއުލްކޮށްފައިވާ ގޮތުން ބެންކޮކް އެއަރލައިންގެ ދަތުރުތައް ރާއްޖެއަށް އަލުން ފަށާނީ އަންނަ މަހުގެ 22 ވަނަ ދުވަހުއެވެ.
ބެންކޮށް އެއަރވޭސްއިން ރާއްޖެއަށް ހަފްތާގެ 4 ދުވަހު ދަތުރުކުރުމަށް ވަނީ ހަމަޖެހިފައެވެ. އެއީ އާދިއްތަ، ހޯމަ، ބުދަ އަދި ހުކުރު ދުވަހު އެވެ.
ކޯވިޑް-19 އަށް ފަހު ތައިލެންޑް އަލުން ހުޅުވާލާފައިވާއިރު ކޯވިޑް ވެކްސިން ފުރިހަމަކޮށްފައިވާ ފަރާތްތަކުން ތައިލެންޑްގައި ކަރަންޓީން ވާކަށް ނުޖެހެއެވެ. ތައިލެންޑަކީ ވިޔަފާރިއާއި އަދި ޗުއްޓީ ހޭދަކުރުމަށްވެސް ގިނަ އަދަދެއްގެ ދިވެހިން ދަތުރުކުރާ މަންޒިލެކެވެ. އެހެންކަމުން ބެންކޮކް އެއަރލައިންގެ ދަތުރުތައް އަލުން ރާއްޖެއަށް ފެށުމަކީ އެޤައުމުން ރާއްޖެއަށް އަންނަ ފަތުރުވެރިންނާއި އަދި އެކި ބޭނުންތަކަށް ތައިލެންޑަށް ދަތުރުކުރާ ދިވެހިންނަށް ފަސޭހަވެގެންދާނެކަމެކެވެ.