އެޓާރނީ ޖެނެރަލް އިބްރާހީމް ރިފްއަތާއި ޖުޑީޝަލް ސަރވިސް ކޮމިޝަން(ޖޭއެސްސީ)ގެ ރައީސް ހިސާން ހުސައިނާއި ޤާޟީ އަޙުމަދު ޝަކީލު ބައްދަލުކުރެއްވިކަމަށް ބުނެ ރާއްޖޭގެ ބައެއް މީޑިއާތަކުން ފަތުރަމުންދާ ޚަބަރުތައް ޖޭއެސްސީން ދޮގުކުރައްވައިފިއެވެ.
މިވާހަކަތައް ދޮގުކުރައްވައި ޖޭއެސްސީން ކުރެއްވި ޓުވީޓެއްގައި ވިދާޅުވީ ކްރިމިނަލް ކޯޓުގައި މިހާރު ކުރިޔަށްދާ، ކުރީގެ ރައީސް ޔާމީނުގެ މައްސަލަ ބައްލަވާ އިސް ޤާޒީއާއި އެކޮމިޝަނުގެ ރައީސް ޙިސާން ހުސައިނާއި އެޓާރނީ ޖެނެރަލް އިބްރާހީމް ރިފްއަތު ބައްދަލުކުރެއްވިކަމަށްބުނެ ބައެއް މީޑިއާއަކުން ފަތުރަމުންދާ ވާހަކަތަކަކީ ހަގީގަތާ ޚިލާފު ދޮގެއްކަމަށެވެ. އަދި މިފަދަ ހަގީގަތެއް ނެތް ވާހަކައެއް ފެތުރި މައްސަލަ ކަމާބެހޭ ފަރާތްތަކަށް ހުށައަޅާނެކަމަށްވެސް ޖޭއެސްސީން ވިދާޅުވެއެވެ.
"މި ކޮމިޝަނުގެ އަގުވައްޓާލުމަށް އިތުބާރު ނުހިފޭ ދޮގު ޚަބަރު ފަތުރާތީ މިކަން ކުށްވެރިކޮށް މިކަން ކަމާބެހޭ ފަރާތްތަކަށް ހުށަހަޅާނެކަމުގައިވެސް ދަންނަވަން" ޖޭއެސްސީން ވިދާޅުވިއެވެ.
އެޓާރނީ ޖެނެރަލް އިބްރާހީމް ރިފްއަތާއި ޖުޑީޝަލް ސަރވިސް ކޮމިޝަން(ޖޭއެސްސީ)ގެ ރައީސް ހިސާން ހުސައިނާއި ކްރިމިނަލްކޯޓުގެ ޤާޟީ އަޙުމަދު ޝަކީލު ބައްދަލުކުރެއްވިކަމަށް ބުނެ ބައެއް މިޑިއާތަކުން ޚަބަރު ފަތުރާފައި ވީނަމަވެސް އެފަދަ މަޢުލޫމާތެއް ލިބުނުކަމުގެ އެއްވެސް ހެއްކެއް ދައްކާފައެއް ނުވެއެވެ. އިތުބާރުހުރި މަސްދަރަކުން ލިބުނު މައުލޫމާތެއްކަމަށްބުނެ ފަތުރާފައިވާ މިޚަބަރު ޖޭއެސްސީން މިވަނީ ދޮގުކޮށްފައެވެ.
ކުރީގެ ރައީސް ޢަބްދުﷲ ޔާމީންގެ މައްޗަސް ކްރިމިނަލް ކޯޓުގައި މިހާރު ހިނގަމުންދަނީ ވ.އާރަށުގެ މައްސަލައިގައި އުފުލާފައިވާ ދަޢުވާއެއްގެ ޝަރީޢަތެވެ. އެއީ ރިޝްވަތު ގަބޫލުކުރުމުގެ ކުށުގެ ދައުވާއާއި މަނީ ލޯންޑަރިންގެ ކުށުގެ ދައުވާއެކެވެ.