ޕޮލިހާއި ވެމްކޯއިން ފެށުން ރަނގަޅުކޮށްފި

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ އެސޯސިއޭޝަން ކަޕުގެ ފިރިހެން ޑިވިޝަނުގައި ކުޅުނު ފުރަތަމަ މެޗު ކާމިޔާބުކޮށް، މުބާރާތުގެ ފެށުން ޕޮލިސް ކުލަބާއި ކުލަބު ވެމްކޯއިން ރަނގަޅުކޮށްފިއެވެ.

މި އަހަރުގެ ވޮލީބޯޅަ ސީޒަންގެ ފިރިހެން ފުރަތަމަ މުބާރާތް ކުލަގަދަ ރަސްމިއްޔާތަކާއެކު ހޮނިހިރު ދުވަހުގެރޭ ފަށާފައިވާއިރު، މި އަހަރުގެ މުބާރާތަށް ވީއޭއެމުން ވަނީ ބޮޑު ބަދަލެއް ގެނެސްފައެވެ. އެގޮތުން މި މުބާރާތުގެ ފިރިހެން ޑިވިޝަނަށް ވީއޭއެމުން ވަނީ ބިދޭސީ 18 ކުޅުންތެރިންގެ ޕޫލެއް އެކުލަވާލައި، ޑްރާފްޓްކޮށް ކުޅުންތެރިން ކުލަބުތަކަށް ބަހާލާފައެވެ.

މުބާރާތުގައި ހޮނިހިރު ދުވަހުގެރޭ ކުޅުނު ދެ މެޗުގައިވެސް ތަފާތަކަށް ފެނިގެންދިޔައީ ބިދޭސީ ކުޅުންތެރިންނެވެ. އެގޮތުން ފުރަތަމަ މެޗު ޕޮލިސް ކުލަބުން ކާމިޔާބުކުރީ ގުޑީސް ސްޕޯޓްސް ކުލަބާއި ވާދަކޮށް 3-2 ސެޓުންނެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މި މެޗުގެ ފުރަތަމަ ސެޓުގެ ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ސެޓު ޕޮލިހުން ގެންދިޔައީ ފޯރިގަދަ ކުޅުމަކަށްފަހު 30-28 އިންނެވެ. އެކަމަކު މެޗުގެ ދެވަނަ ސެޓާއި ތިންވަނަ ސެޓުގައި ޕޮލިހުން ފެނިގެންދިޔައީ އާދައިގެ ގޮތަކަށެވެ. މި ސެޓުތައް ގުޑީސްއިން ގެންދިޔައީ 25-23 އަދި 25-20 އިންނެވެ. ނަމަވެސް ޖެހިގެން އައި ދެ ސެޓު ތަފާތު ރޫހެއްގައި ކުޅެ ޕޮލިހުން ވަނީ 25-23 އަދި 15-12 އިން ކާމިޔާބުކޮށްފައެވެ.

މީގެ އިތުރުން މި މުބާރާތުގައި ހޮނިހިރު ދުވަހުގެރޭ ކުޅުނު ދެވަނަ މެޗު ވެމްކޯއިން ކާމިޔާބުކުރީ އޮފު އެފްސީ އަތުން 3-1 ސެޓުންނެވެ.

މި މެޗުގެ ފުރަތަމަ ދެ ސެޓު ވެމްކޯއިން ވަނީ ފަސޭހަކަމާއެކު، 25-15 އަދި 25-17 އިން ކާމިޔާބުކޮށްފައެވެ. އެކަމަކު އޮފު އެފްސީގެ ބިދޭސީ ކުޅުންތެރިން މޮޅު ކުޅުމާއެކު އެ ޓީމުން ވަނީ ތިންވަނަ ސެޓު 25-21 އިން ގެންގޮސްފައެވެ.

މި މެޗުގައި އެންމެ ވާދަވެރިކޮށް ފެނިގެންދިޔައީ މެޗުގެ ފަހު ސެޓެވެ. މި ސެޓުގެ ކުރީކޮޅު އޮފު އެފްސީން ވަނީ ހަތް ޕޮއިންޓުގެ ލީޑެއްގައި ކުޅެފައެވެ. ނަމަވެސް ސެޓުގެ ފަހުކޮޅު ވެމްކޯގެ ބިދޭސީ ދެ ކުޅުންތެރިންގެ އިތުރުން އާދަމް ފައިރޫޒާއި އިސްމާއީލް ސާޖިދު (ކުޑަކާއްޓޭ) ގެ މޮޅު ކުޅުމާއެކު އެ ޓީމުން މި ސެޓު ކާމިޔާބުކުރީ 28-26 އިންނެވެ.

މި ފަހަރުގެ އެސޯސިއޭޝަން ކަޕުގެ ފިރިހެން ޑިވިޝަނުގެ މެޗުތައް ކުޅެވިގެންދާނީ ލީގު އުސޫލުންނެވެ. މި ޑިވިޝަނުގައި ވާދަކުރާ ޓީމުތަކަކީ ޕޮލިހާއި، ވެމްކޯ އާއި، އޮފު އެފްސީ އާއި، ގުޑީސް އާއި، ދިވެހި ސިފައިންގެ ކުލަބު އަދި ސްޕޯޓްސް ކުލަބު ސިޓީއެވެ.