ހިޔާ ހައުސިން ޔުނިޓްތަކުން ކުލި ނެގުން ފަސްކޮށްދިނުމަށް އެދި "ހިޔާ ޔުނިއަން"އިން ސިވިލް ކޯޓަށް ހުށައެޅި މައްސަލަ ނުބަލަން ނިންމައިފިއެވެ.
ސިވިލް ކޯޓުގެ ޤާޟީ ރިޒްމީނާ އިދްރީސް ނެރުއްވި ހުކުމުގައި ބުނެފައިވަނީ ހިޔާ ޔޫނިއަންއަކީ ހައުސިން ޑިވެލޮޕްމަންޓް ކޯޕަރޭޝަނާއި ހިޔާ ފްލެޓްތައް ލިބުނު ފަރާތްތަކާއެކު ހެދިފައިވާ އެއްބަސްވުންތަކުގެ ބައިވެރިއެއް ނޫންކަމަށެވެ. އެހެންކަމުން ހިޔާ ޔޫނިއަންއަކީ މި އެއްބަސްވުންތަކާއި ގުޅިގެން ހައުސިން ޑިވެލޮޕްމަންޓް ކޯޕަރޭޝަންގެ މައްޗަށް ދަޢުވާކުރުމުގެ ޤާނޫނީ ހައިޞިއްޔަތު ލިބިގެންވާ ފަރާތެއް ނޫންކަމަށެވެ. ކޯޓުންވަނީ މި މައްސަލަ ކުރިއަށް ގެންދެވޭނެ ސަބަބެއް ނެތްކަމަށް ކަނޑައަޅައި ހުކުމްކޮށްފައެވެ.
ހިޔާ ޔުނިއަނުން ސިވިލް ކޯޓަށް ހުށައެޅި ދަޢުވާގައި ބުނެފައިވަނީ ފްލެޓްތައް ދީފައިވަނީ ފިނިޝިން މަސައްކަތް ނުނިންމާ ކަމަށްވާތީ ފިނިޝިންއަށް ހޭދަވި ރުފިޔާ ކުލިން ކަނޑައިދިނުމަށް އެޗްޑީސީއަށް އަމުރުކޮށްދިނުމަށެވެ. ނުވަތަ ފިނިޝިންއަށް ހޭދަވި ފައިސާ، ހަމަވަންދެން ކުލި ނަގަމުން ނުދިއުމަށެވެ.
ހިޔާ ޔުނިއަންއިން ހުށައެޅި މައްސަލައިގައި ބުނެފައިވަނީ ފްލެޓެއްގެ ފިނިޝިން މަސައްކަތަށް ގާތްގަނޑަލަކަށް 250000 ރުފިޔާ ކޮންމެ ފްލެޓަކަށް ހޭދަވިކަމަށެވެ.
ހިޔާ ހައުސިން ޕްރޮޖެކްޓްގައި ހިމެނެނީ 6720 ހައުސިން ޔުނިޓެވެ. ނަމަވެސް މައްސަލަ ކޯޓަށް ވެއްދުމަށް ޕެޓިޝަންގައި ސޮއިކޮށްފައިވަނީ 2039 ފަރާތުންކަން މި ހުކުމުގައި ބުނެފައިވެއެވެ.
މިދިޔަ އަހަރުގެ ޖުލައި މަހު، ހިޔާ ފްލެޓްތަކުގެ އެއްބަސްވުމުގައި ސޮއިކުރަން ފެށީ، ކުލި ނުނަގާގޮތަށް 3 މަސް ދުވަހުގެ މުއްދަތެއް ފިނިޝިންއަށް ދިނުމަށެވެ. ނަމަވެސް ގިނަ ފްލެޓްތައް ނިމިފައި ނުވާތީ ސަރުކާރުން އިތުރު 2 ފަހަރު މަތިން މި މުއްދަތު އިތުރުކޮށްދިނުމަށްފަހު، ކުލި ނަގަން ނިންމީ މިއަހަރުގެ އޭޕްރީލް މަހުން ފެށިގެންނެވެ. އެއީ ފްލެޓްތައް ހަވާލުކުރިތާ 8 މަސް ދުވަސް ފަހުންނެވެ.
ހިޔާގެ ކުލީގެ ގޮތުގައި ދައްކަން ޖެހެނީ ފްލެޓްގެ ކުއްޔަށް ނަގާ 7500 ރުފިޔާއާއި މެއިންޓަނަންސް ފީގެ ގޮތުގައި ނަގާ 1000 ރުފިޔާއާއެކު ޖުމްލަ 8500 ރުފިޔާއެވެ.
ހިޔާގެ ގިނަ ފްލެޓްތަކަށް މިހާރުވަނީ އާއިލާތަކުން ދިރިއުޅުން ބަދަލުކޮށްފައެވެ.