ޕާކިސްތާނުގެ ދެކުނުގެ ސަރަޙައްދެއް ކަމުގައިވާ ބަލޮކިސްތާނުގެ ކިއްލާ ސައިފުالله ގައި ހިނގި ނުރައްކާތެރި ބަސް އެކްސިޑެންޓެއްގައި 22 މީހުން މަރުވެއްޖެއެވެ. ހައިވޭއެއްގައި ދަތުރުކުރަމުން ދަނިކޮށް މި ބަސް އެކްސިޑެންޓްވެފައި ވަނީ ބާރު ސްޕީޑުގައި ދުއްވުގެ ސަބަބުން ކަމަށް ބެލެވެއެވެ. މި ހާދިސާގައި އެއް ޢާއިލާއަކަށް ނިސްބަތްވާ ނުވަ މީހަކު ވެސް މަރުވިއެވެ.
ފަރުބަދަމަތީ ސަރަޙައްދަކުން ދަތުރުކުރަމުން ދަނިކޮށް ހިނގި މި އެކްސިޑެންޓަށް ފަހު ބަސް ވަނީ ހައިވޭއިން ބޭރަށް ވެއްޓިފައެވެ. މި ހާދިސާގައި މަރުވި މީހުންގެ ތެރޭގައި އަންހެނުންނާއި ކުޑަކުދިން ވެސް ހިމެނޭ ކަމަށް ކިއްލާ ސައިފުالله ގެ އޮފިޝަލުން ބުނެއެވެ.
ޕާކިސްތާނުގެ ރަށްފުށު ހިސާބުތަކުގެ މަގުތަކަކީ އެންމެ ރަނގަޅު ފެންވަރަކަށް ހަދާފައިވާ މަގުތަކެއް ނޫނެވެ. އަދި، މަގުމަތީގެ ޤަވާޢިދުތަކަށް ހުރުމަތްތެރިކޮށް ނުހިތުމުގެ ސަބަބުން އެ ޤައުމުގެ މިފަދަ ހިތާމަވެރި ހާދިސާތައް ހިނގާ އަދަދު އިތުރެވެ.
މި ހާދިސާގެ ޚަބަރު ލިބިވަޑައިގަތުމާ އެކު ޕާކިސްތާނުގެ ރައީސް އާރިފް އަލްވީ ވަނީ އެ ކަމާ ހިތާމަ ފާޅު ކުރައްވާފައެވެ. އަދި، މި ހާދިސާގައި މަރުވި މީހުންގެ ހަށިގަނޑުތައް، އެ މީހުންގެ ޢާއިލާތަކަށް ރައްދުކޮށްދެއްވާނެ ކަމުގައި އޭނާ ވިދާޅުވިއެވެ. މިދިޔަ އަހަރުގެ ޖުލައި މަހު ހިނގި މި ފަދަ ނުރައްކާތެރި އެހެން ހާދިސާއެއްގައި 33 މީހުން މަރުވިއެވެ. ޕާކިސްތާނުގެ މެދުތެރޭ ސަރަޙައްދެއްގައި ހިނގި މި ހާދިސާގައި މަރުވެފައި ވަނީ ޢީދެއް ފާހަގަކުރަން އެ މީހުންގެ އުފަން ރަށަށް ދަތުރުކުރި ބަޔެކެވެ.