ރާއްޖެއިން ދައްކަންޖެހޭ ދަރަނި ދެއްކުމުގައި ބޮޑު ގޮންޖެހުމެއް ނެތްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައެވެ.
ރާއްޖޭގެ ދަރަނި ބޮޑުވެފައިވާ ކަމަށާ، ދަރަނި ދެއްކުމަށް ސަރުކާރަށް ދަތިވެފައިވާކަމަށް ދެކެވޭ ވާހަކަތަކަށް ރައްދު ދެއްވައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހު ވިދާޅުވީ މިދިޔަ ސަރުކާރުގައި 39 ބިލިއަން ރުފިޔާގެ ދަރަންޏެއް އޮތްކަމަށެވެ. އެހެން ނަމަވެސް މި ސަރުކާރުން މިހާތަަނަށް ނަގާފައިވަނީ 37.4 ބިލިއަން ރުފިޔާކަމަށް ރައީސް ވިދާޅުވިއެވެ.
"މިއީ އެއް ދުވަހުން ވީކަމެއް ނޫން، ތަފްސީލަށް ދާކަމަށްވަންޏާ، 2012އިން ފެށިގެން 2022އަށް ދަރަނި ހުރި ގޮތަކީ، 2012ވަނަ އަހަރު ހުރީ 17 ބިލިއަންގައި، ޑރ.ވަހީދުގެ އެއް އަހަރު ނިމުނުއިރު 23 ބިލިއަނަށް ދަރަނި އަރާފައި.، 2013-2018އާ ދޭތެރޭގައި 62 ބިލިއަނަށް ދަރަނިވަނީ އަރާފައި.، %169 އިތުރުވެފައި އެވަނީ،" ރައީސް ވިދާޅުވިއެވެ.
އަހަރުން އަހަރަށް ދަރަނި އިތުރުވެފައި ވާގޮތާގުޅޭ ތަފްސީލް ދެއްވަމުން ރައީސް ސާލިހް ވިދާޅުވީ 2013އިން 2018އަށް އަހަރުންއަހަރަށް ދަރަނި ބޮޑުވެފައި ހުރީ %16.72ގައި ކަމަށެވެ. އަދި 2018އިން 2022އަށް މި ދޭތެރޭއިން ބޮޑުވެފައި ހުރީ. %12.19ގައި ކަަމަށާ، ނިސްބަތުން ދަރަނި ބޮޑުވާ ވަރު ދަށްކުރެވިފައިވާކަން ރައީސް ފާހަގަކުރެއްވިއެވެ.
ދަރަނި ދެއްކުމުގައި އެއްވެސް ދަތިކަމެއް ނެތްކަމުގެ ޔަޤީންކަން ރައީސްވަނީ ތަކުރާރުކޮށް ދެއްވާފައެވެ. އެގޮތުން ސަނީ ސައިޑު ބޮންޑުގެ އެކީ މިހާރު ދައްކާ ނިމިފައިވާކަަންވެސް ރައީސް ފާހަގަކުރެއްވިއެވެ.
"ދެން އެންމެބޮޑު ޢަދަދެއް ދައްކަން ޖެހެނީ 2026ވަނަ އަަހަރު.، އެއީ 600 މިލިއަން ޑޮލަރު އެބައުޅޭ.، އެއީ ކުރިން ނަގާފައި އިން 100 މިލިއަން ޑޮލަރަކާއި، 700 މިލިއަން ޑޮލަރުގެ ސުކޫކެއް،" ރައީސް ވިދާޅުވިއެވެ.
ރައީސް ވަނީ ސޮވްރެން ޑިވެލޮޕްމަންޑު ފަންޑާ ގުޅޭގޮތުންވެސް މައުލޫމާތުދެއްވާފައެވެ. އެގޮތުން ކުރިއަށްވުރެ ރަނގަޅަށް މިހާރު ފައިސާ ޖަމާކުރަމުން ދާކަމަށާ، މިހާރު 4 ބިލިއަން ރުފިޔާ ސޮވްރިން ޑިވެލޮޕްމަންޓު ފަންޑުގައި އެބަހުރިކަމަށް ރައީސް ވިދާޅުވިއެވެ. ރައީސް ވިދާޅުވީ ސަރުކާރުގެ އަމާޒަކީ 2026ވަނަ އަހަރު އަންނަންވާއިރަށް، 600 މިލިއަން ޑޮލަރު ދައްކާވަރަށް ސޮވްރިން ޑިވެލޮޕްމަންޓު ފަންޑަށް ފައިސާ ޖަމާކުރުން ކަމަށެވެ.
ރާއްޖޭގެ ރިޒާވް ހުސްވެދާނެކަަމަށް ދެކެވޭ ވާހަކަތަކަށް ރައްދުދެއްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވީ އޮފިޝަލް ރިޒާވުގައި 807 މިލިއަން ޑޮލަރު އެބަހުރި ކަމަށެވެ. އަދި 2009ވަނަ އަހަރު ރިޒާވްގައި ހުރީ 753 މިލިއަން ޑޮލަރު ކަމަށާ، އެހެންވީމާ ރިޒާވު އެއްވަރެއްގައި ހިފެއްޓިފައިވާކަން ރައީސް ފާހަގަކުރެއްވިއެވެ.
ރައީސް ވިދާޅުވީ ރާއްޖޭގެ ޔޫސަބަލް ރިޒާވުވެސް ހުރީ ރަނގަޅު މިންވަރެއްގައިކަމަށާ، މިހާތަނަށް ޔޫސަބަލް ރިޒާވު އެންމެ ގިނައިންހުރި އަހަރަށް މިއަހަރު ވާނެކަމަށެވެ. އަދި ދައުލަތަށް ބޭނުންވާ އަސާސީ ތަކެތި ގަތުމުގައި އެއްވެސް ދައްޗެއް ނެތްކަންވެސް ރައީސް ފާހަގަކުރެއްވިއެވެ.
”ކާޑުގެ ބާވަތްތަކާއި ތެލާއި ބޭސް ދަތި ނުވެ، މަހުންމަހަށް، އެއީ ޖޫން މަސް ކަމުގައި ވިޔަސް، ޖުލައިމަސް ކަމަށްވިޔަސް، އޮގަސްޓު، ސެޕްޓެމްބަރ، އޮކްޓޯބަރ، ނޮވެމްބަރ، ޑިސެމްބަރ ކަމުގައިވިޔަސް އެ ފައިސާ ހުންނާނެ،" ރައީސް ވިދާޅުވިއެވެ.
ރައީސް ވިދާޅުވީ ދައުލަތަށް ބޭނުންވާ ތަކެތި ގަތުމަށް އެސްޓީއޯއަށް ބޭނުންވާ ފައިނޭންޝިއަލް ފެސިލިޓީއެއް ހޯދާފައިވާކަމަށެވެ. އެހެންކަމުން ތަކެތި ގެނައުމުގައި ދަތިކަމެއް ކުރިމަތި ނުވާނެކަމުގެ ޔަޤީންކަން ރައީސް ވަނީ ދެއްވާފައެވެ.