ފިއުލް ސަޕްލައި މޯލްޑިވްސް، އެފްއެސްއެމުން އަތޮޅުތަކަށް ތެޔޮ އުފުލާ ފްލީޓަށް އިތުރު ބާޖެއް ގެނެސްފިއެވެ.
އެފްއެސްއެމުން އަލަށް ގެނެސްފައިވާ ބާޖަކީ އެއްފަހަރާ 360000 ލީޓަރުގެ ތެޔޮ އުފުލުމުގެ ޤާބިލްކަން ހުރި ބާޖެކެވެ. މިއާއެކު މިބާޖަކީ އެކުންފުނީގައި އޮތް އެންމެ ބޮޑު ތެޔޮ އުފުލާ ބާޖެވެ.
ޕީއެސްއެމް ނިއުސްއާ ވާހަކަދައްކަވަމުން އެފްއެސްއެމްގެ މެނޭޖިންގ ޑިރެކްޓަރ މުޙައްމަދު ޤަސަމް ވިދާޅުވީ، ފްލީޓަށް އިތުރުވި ބާޖާއެކު އެކުންފުނިން ރަށްރަށަށް ތެޔޮ އުފުލުމުގައި ގިނަ ފަސޭހަތަކެއް ލިބިގެންދާނެ ކަމަށެވެ.
އެގޮތުން މިހާރުވެސް ތެޔޮ ވިއްކާ އަމިއްލަ ފަރާތްތަކަށް ތެޔޮ ލިބުމުގައި ދަތިތަކެއް ހުރިކަން އެފަރާތްތަކުން ފާހަގަކުރާ ކަމަށާއި، މި ތެޔޮ ބާޖާއެކު ދުވަހުން ދުވަހަށް ތެޔޮ ފޯރުކޮށްދިނުމުގައި ކުރިން ދިމާވި ދަތިތަކަށް ހައްލު ލިބިގެންދާނެ ކަމަށްވެސް ގަސަމް ވިދާޅުވިއެވެ.
2019 ވަނަ އަހަރު އެފްއެސްއެމުން ވަނީ 4 ބާޖެއް ބަނުމުގެ މަސައްކަތް ފަށާފައެވެ. މިސްރުގެ ކުންފުންޏަކާއި ހަވާލުކޮށްގެން ބަންނަމުން ދިޔަ މި ބާޖުތަކުން 2 ބާޖެއް ވަނީ މިދިޔަ ރޯދަމަހުގެ ފަހުކޮޅު ރާއްޖެ ގެނެސްފައެވެ. އަލަށް ބަންނަ ބާޖުތަކުގެ ތެރެއިން ބާކީ އޮތް 2 ބާޖު ރާއްޖެއަށް ގެނައުމަށް ކުރަންޖެހޭ މަސައްކަތް ކުރަމުން އަންނަކަމަށާއި ކުރިޔަށް އޮތް މަސްދުވަސްތެރޭ މި ދެ ބާޖުވެސް ރާއްޖެ އަންނާނެކަމަށެވެ.
ރާއްޖޭގެ އެކި ރަށްރަށަށް ތެޔޮ ގެންގޮސްދެމުން އަންނަ އެފްއެސްއެމްގެ ފްލީޓްގައި 20 ބާޖު އޮވެއެވެ. އެފްއެސްއެމުން ވަނީ މިދިޔަ އަހަރުގެ ކުރީކޮޅު އެކުންފުނީގެ ފްލީޓަށް ތެޔޮ ބޯޓެއްވެސް އިތުރުކޮށްފައެވެ. މި ބޯޓު ނުވަތަ ތެޔޮ ޓޭންކަރަކީ 8.5 މިލިއަން ލީޓަރުގެ ތެޔޮ އުފުލުމުގެ ޤާބިލްކަން ހުރި ބޯޓެކެވެ.