ހަފުތާތަކެއްގެ މެދުކެނޑުމަކަށް ފަހު ޔޫކްރެއިންގެ ވެރިރަށް ކިއޭވްގެ ސަރަހައްދުތަކަށް ރަޝިޔާގެ ފައުޖުތަކުން އަނެއްކާ ވެސް މި ވަނީ ހަމަލާދޭން ފަށާފައެވެ. މިއަދު ރަޝިޔާއިން ވަނީ ކިއޭވްގެ ދެ ސަރަޙައްދަކަށް "ކްރޫޒް މިސައިލް" ހަމަލާތަކެއް އަމާޒުކޮށްފައެވެ.
މިއަދަކީ އަނެއްކާ ވެސް ޔޫކްރެއިންގެ ވެރިރަށް ކިއޭވްގެ ރައްޔިތުންނަށް ނާމާން އަދި ބިރުވެރި ދުވަހެކެވެ. ރަށުތެރެއިން އިވެމުން ދަނީ ބަރު ހަތިޔާރުގެ އަޑެވެ. ގޮވުންތަކާއި މިސައިލްތަކުގެ އަޑާއި، އެމްބިއުލާންސްތަކުގެ އަޑެވެ. ހަފުތާތަކެއްގެ މެދުކެނޑުމަކަށް ފަހު ރަޝިޔާގެ ފައުޖުތަކުން އަލުން މި ވަނީ ކިއޭވްގެ އަމާޒުތަކަށް ހަމަލާ ދޭން ފަށާފައެވެ. ފެބުރުއަރީ 24 ގައި ރަޝިޔާގެ ފައުޖުތަކުން ޔޫކްރެއިންގެ ސަރަޙައްދުތަކަށް އަރައި ފެށި ހަނގުރާމައިގެ އެންމެ މުހިންމު އަމާޒަކަށްވީ، އެ ރަށް ހިފައި، ޔޫކްރެއިންގެ ސަރުކާރު ވައްޓައިލުމެވެ. ނަމަވެސް، ޔޫކްރެއިންގެ ފައުޖުތަކުން ވަނީ އެ އުދުވާންތައް ދިފާޢުކޮށް، ރަޝިޔާގެ ފައުޖުތައް ފަހަށް ޖައްސާފައެވެ.
ރަޝިޔާއިން ބުނީ މިއަދުގެ ހަމަލާތައް އަމާޒުކޮށްފައި ވަނީ ވިލާތުގެ ޤައުމުތަކުން ޔޫކްރެއިންއަށް ފޮނުވާފައިވާ ޓޭންކުތަކަކާއި އެހެނިހެން ބަރު ހަތިޔާރު ރައްކާކޮށްފައިވާ އިމާރާތަކަށް ކަމުގައެވެ. ނަމަވެސް، ޔޫކްރެއިންއިން މި ކަން ދޮގު ކުރެއެވެ. އެ ޤައުމުން ބުނީ، ރަޝިޔާއިން ހަމަލާތައް އަމާޒުކޮށްފައި ވަނީ ރޭލު މަރާމާތުކުރާ އިމާރާތަކަށް ކަމުގައެވެ. އަދި، މި ހަމަލާތަކުގައި ބައެއް މީހުންނަށް އަނިޔާވި ކަމަށް ވެސް އެ ޤައުމުން ބުނެއެވެ.
ހުސްވި ހަފުތާތަކުގެ ތެރޭގައި ކިއޭވް އޮތީ އަމާންކޮށެވެ. ފިހާރަތަކާއި ކެފޭތަކާއި ރެސްޓޯރެންޓުތަކުން ކަސްޓަމަރުން ފެންނަމުން ދިޔައެވެ. މަގުތަކުގައި މީހުން ހެލިފެލިވެ އުޅޭ މަންޒަރު ފެންނަމުން ދިޔައެވެ. ނަމަވެސް، ރަޝިޔާގެ އެންމެ ފަހުގެ ހަމަލާތަކާ އެކު އެ މަންޒަރު މުޅީން ބަދަލުވެއްޖެއެވެ. މިއަދު ރަޝިޔާއިން ކިއޭވްގެ ދެ ސަރަޙައްދަކަށް "ކްރޫޒް މިސައިލް" ހަމަލާތަކެއް ފޮނުވާލިއެވެ.
ސޯޝަލް މީޑިއާގައި ޢާންމުކޮށްފައިވާ ބައެއް ވީޑިއޯތަކުން ފެންނަނީ އެ ސަރަޙައްދުތަކުން ބޯކޮށް ކަޅު ދުން އަރަމުންދާ މަންޒަރެވެ.
ރަޝިޔާއިން ކިއޭވްއަށް ހަމަލާތައް އަމާޒުކުރަން ފަށާފައި މި ވަނީ، އެ ޤައުމުން ހިފާފައިވާ ޑޮންބެސް ސަރަޙައްދުގައި ހިންގަމުންދާ ހަނގުރާމަ ކޮންމެ ވެސް ވަރަކަށް މަޑުޖެހެން ފެށުމާ އެކުއެވެ. ކިއޭވްއަށް ދިން ހަމަލާތަކަކީ، އެ ކަމާ ގުޅިގެން ބަދަލު ހިފުމުގެ ގޮތުން ދިން ހަމަލާތަކެއްގެ ގޮތުގައި ޔޫކްރެއިނުން ސިފަކުރެއެވެ.
ދެ ޤައުމުގެ ފައުޖުތަކުގެ މެދުގައި މިހާރު އެންމެ ވަރުގަދަކޮށް ހަމަލާ ބަދަލު ކުރަމުން ދަނީ ލުގާންސްގެ ސަރަޙައްދެއް ކަމުގައިވާ ސެވެރެޑޮނެޓްސްކްގައެވެ. ލުގާންސްގެ ބޮޑު ސަރަޙައްދުތަކެއް ރަޝިޔާ ސިފައިންގެ އަތްދަށަށް ގެންގޮސްފައިވާ އިރު، ޔޫކްރެއިންގެ ފައުޖުތަކުން އަދިވެސް ދަނީ އެ ސަރަޙައްދު ދިފާޢު ކުރުމަށް މަސައްކަތް ކުރަމުންނެވެ.
ދެން މިއަދު ލިބިގެންދިޔަ އަނެއް ޚަބަރަކީ، ރަޝިޔާ ސިފައިންގެ އިސް ޖެނެރަލަކު މަރާލާފައިވާ ކަމުގެ ޚަބަރެވެ. މޭޖަރ ޖެނެރަލް ރޯމަން ޒުޓުޒޯވް މަރާލާފައި ވަނީ، ޑޮންބެސް ސަރަޙައްދުގައި ރަޝިޔާގެ ފައުޖުތަކުން ކުރަމުންދާ ހަނގުރާމައިގެ ތެރެއިން، ޔޫކްރެއިން ފައުޖުތަކުން ދިން ހަމަލާތަކެއްގައެވެ. އޭނާ މަރުވެފައިވާ ކަން ރަޝިޔާގެ ޤައުމީ ޓީވީން ވަނީ ކަށަވަރުކޮށްދީފައެވެ.
އޭނާ މަރުވެފައިވާ ކަމުގެ ޚަބަރު ޢާންމުވެފައި މި ވަނީ، ރަޝިޔާގެ އަސްކަރިއްޔާގެ އެހެން އިސް އޮފިސަރެއް ކަމުގައިވާ ލެފްޓިނެންޓް ޖެނެރަލް ރޯމަން ބަރޑްނިކޯފް ވެސް މަރުވެފައިވާ ކަމުގެ މަޢުލޫމާތު ފެތުރެމުންދާ ދަނޑިވަޅެއްގައެވެ. ނަމަވެސް، މި ކަން އަދި އެއްވެސް ޤައުމަކުން ކަށަވަރުކޮށްދީފައެއް ނުވެއެވެ.