ބޭންކް އޮފް މޯލްޑިވްސްއަށް މިހާތަނަށް ހޯދުނު އެންމެ ރަނގަޅު ނަތީޖާ ހޯއްދަވައި ދެއްވުމަށްފަހު ބޭންކުގެ ސީއީއޯ ޓިމް ސޯޔަރ ބޭންކާ ވަކިވެވަޑައިގެންނެވުމަށް ނިންމަވައިފިއެވެ.
މިއަދު ހެނދުނު ބޭންކުގެ މުވައްޒަފުންނަށް ފޮނުއްވި މެސެޖެއްގައި އޭނާ ވިދާޅުވީ ބޭންކާއެކު އޮތް 3 އަހަރުގެ އެއްބަސް ނިމުމަކަށް އަންނަކަމަށާއި އެއަށްފަހު ކޮންޓްރެކްޓްގެ މުއްދަތު އިތުރު ނުކުރުމަށް ބޭންކުގެ ބޯޑާއެކު އެއްބަސްވެފައިވާކަމަށެވެ. އެހެންކަމުން ދެން ބޭންކުގައި ޓިމް ހިދުމަތްކުރައްވާނީ މަހެއް ނުވަތަ ދެމަހެއްހާ ދުވަހުކަމަށްވެސް އޭނާ ވިދާޅުވިއެވެ.
މުވައްޒަފުންނަށް ފޮނުއްވި މެސެޖެއްގައި ޓިމް ވިދާޅުވީ ވޭތުވެދިޔަ އަހަރުތަކަކީ ބޭންކަށް ވަރަށް ދަތި އުނދަގޫ އަހަރުތަކެއްކަމަށާއި، ވަކިން ހާއްސަކޮށް ކޮވިޑްއާ އެކު ދިމާވި ބޮޑު ގޮންޖެހުންތަކެއްކަމަށެވެ. އެހެންނަމަވެސް އެ ދަތިތަކުން އަރައިގަނެ މިއަދު ބޭންކު މިއޮތީ ކުރިމަގުގައިވެސް ކާމިޔާބު ހޯދޭނެ ވަރަށް ވެސް ރަނގަޅު ހާލަތެއްގައިކަމަށް ޓިމް ވިދާޅުވިއެވެ.
"އަޅުގަނޑާއެކު މިވޭތުވެ ދިޔަ މުއްދަތުގައި މުވައްޒަފުން ހޯދި ކާމިޔާބީ އަށް އަޅުގަނޑު ފަހުރުވެރިވަން. އަދި ބޭންކާއެކު އަޅުގަނޑު ހޭދަކުރި މުއްދަތަކީ އަޅުގަނޑަށްވެސް ވަރަށް އުފާވެރި ދުވަސްތަކެއް" ޓިމް ވިދާޅުވިއެވެ.
މިދިޔަ އަހަރު ބޭންކުންވަނީ 1.9 ބިލިއަން ރުފިޔާ ސާފު ފައިދާ ހޯދާފައެވެ. ބޭންކް އޮފް މޯލްޑިވްސްގެ އެންމެ ބޮޑު ހިއްސާދާރަކީ ދިވެހި ސަރުކާރެވެ. ބޭންކުން ވަނީ ޕްރޮފިޓް ޓެކްސްގެ ގޮތުގައި 543 މިލިއަން ރުފިޔާ ސަރުކާރަށްދީފައެވެ. އަދި ޑިވިޑެންޑގެ ގޮތުގައި 131 މިލިއަން ރުފިޔާއެވެ.
ނިމިގެންދިޔަ ބޭންކުގެ އަހަރީ ޖަލްސާގައި ޓިމްވަނި ދުނިޔޭގެ އިގުތިސޯދީ ހާލަތު ނާޒުކު ފައްތަރެއްގައި އޮތް އިރު، އެކަމުގެ ދަތިތައް ރާއްޖެއަށް ވެސް ކުރިމަތިވެދާނޭ ކަމުގެ އިންޒާރު ދެއްވައި، އެކަމަށް ދުރާލައި ތައްޔާރުވާންޖެހޭކަމަށް ވިދާޅުވެފައެވެ.
ރާއްޖެއަށް ކުރިމަތިވެފައިވާ އެފަދަ ނުރައްކާތައް ސިފަކޮށްދެއްވަން ސޯޔާ ވަނީ މަޝްހޫރު ޓީވީ ސީރީޒް "ގޭމް އޮފް ތްރޯންސް" ބުނާ "ވިންޓާ އިޒް ކަމިންގެ" އިންޒާރު ބޭނުންކުރައްވައިފައެވެ. އެގޮތުން ފިނި މޫސުމް ރާއްޖެއަށް ވެސް އައިސްދާނެކަމަށާއި އެކަމަށް ބީއެމްއެލްއިން ދަނީ ތައްޔާރުވަމުންކަމަށް އޭނާ ވިދާޅުވިއެވެ. އަދި މުޅި ރާއްޖެވެސް އެކަމަށް ތައްޔާރުވާންޖެހޭކަމަށް އޭނާ ވިދާޅުވިއެވެ.
3 އަހަރަށްފަހު ޓިމް ސޯޔާ ބީއެމްއެލްއާ ވަކިވުމަށް ނިންމާފައިވާއިރު، އޭނާ ބޭންކް އޮފް މޯލްޑިވްސްއާ ގުޅިވަޑައިގަތީ 2019 ވަނަ އަހަރުގެ ޖުލައިމަހުއެވެ.
ޓިމްއަކީ މާލީ ދާއިރާއަށް ބައިނަލްއަޤްވާމީ ފެންވަރުގައި 30 އަހަރު ޚިދުމަތް ކުރައްވާފައިވާ ބޭފުޅެކެވެ. އެގޮތުން 20 އަހަރު އެގްޒެކެޓިވް އަދި ބޯޑު ފެންވަރުގައި މަސައްކަތްކުރެއްވިއިރު ޓިމް ވަނީ ޔޫކޭގެ ސްޓާޓް އަޕް ލޯންގެ ސިއީއޯގެ މަޤާމްވެސް ފުރުއްވާފައެވެ.