ރިކޯޑު އަދަދެއްގެ ކުދިންނާއެކު މި އަހަރުގެ ނެސްލޭ ކިޑްސް ފުޓްބޯލް ފިއެސްޓާ ފަށައިފިއެވެ.
ކޮވިޑް-19 ގެ ހާލަތާއެކު މި ފިއެސްޓާ މިދިޔަ ދެ އަހަރު ބޭއްވިފައިނުވާއިރު، މި އަހަރުގެ ފިއެސްޓާ ބުދަ ދުވަހުގެ ހަވީރު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ. މި ފަހަރުގެ ފިއެސްޓާ އަކީ މާލެ ސަރަހައްދުގެ ސްކޫލުތަކުގެ ގްރޭޑް އެކެއް، އަދި ދޭއްގެ ދަރިވަރުންނަށް އަމާޒުކޮށްގެން ބާއްވާ ފިއެސްޓާއެކެވެ.
ހެންވޭރު ދަނޑުގައި ކުރިއަށްދާ މި ފިއެސްޓާ ހުޅުވައިދެއްވުމަށްފަހު ވާހަކަފުޅުދައްކަވަމުން ނައިބު ރައީސް ފައިސަލް ނަސީމް ވިދާޅުވީ، ފުޓްބޯޅައަކީ ދިވެހީން އެންމެ ގަޔާވާ ކުޅިވަރުކަމަށާއި، މިފަދަ މުބާރާތެއްގެ ސަބަބުން ހުނަރުވެރި ކުޅުންތެރިންތަކެއް އުފެދުމުގެ އިތުރުން ކުޑަކުދިންގެ ހުނަރު ފައްކާވެގެންދާނެ ކަމުގައެވެ. އަދި މި މުބާރާތުގެ ސަބަބުން ކުޑަކުދިންނަށް އެކުވެރިކަމާއި ބަދަހިކަމާއެކު ކުޅިވަރުގެ ރޫހު ދަސްވެގެންދާނެ ކަމަށް ނައިބު ރައީސް ވިދާޅުވިއެވެ.
މީގެ އިތުރުން މުބާރާތުގެ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން މި މުބާރާތް އިންތިޒާމުކުރާ ސޮކަ ވެޓްރަންސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ އަޙްމަދު ނިޔާޒް ވިދާޅުވީ މިއީ ހަމައެކަނި މާލޭގެ ސްކޫލްތަކަށް އަމާޒުކޮށްގެން ބާއްވަން ރާވައިފައިވާ މުބާރާތެއް ނޫން ކަމަށާއި، ކޮވިޑްގެ ހާލަތާއި، އަދި ދިމާވި ބައެއް ކަހަލަ ދަތިތަކުގެ ސަބަބުން މިއަހަރު އަތޮޅު ތެރޭގައި މި މުބާރާތް ނުބޭއްވުނު ކަމުގައިވީ ނަމަވެސް، އަންނަ އަހަރު މި މުބާރާތް އަތޮޅުތެރޭގައި ބޭއްވުން އެއީ އަމާޒެއް ކަމުގައެވެ. މީގެ އިތުރުން ނިޔާޒް ވިދާޅުވީ، މިއަހަރުވެސް މާލޭގައި އިތުރު ދެ ފިއެސްޓާ ބާއްވަން މަސައްކަތް ކުރަމުން އަންނަ ކަމުގައެވެ.
މިއަހަރުގެ ފިއެސްޓާގައި މާލެ ސަރަހައްދުގެ 20 ސްކޫލަކުން 40 ޓީމު ވަނީ ބައިވެރިވެފައެވެ. އަދި މި ފިއެސްޓާގައި ޖުމްލަ 720 ދަރިވަރުން ވާދަކުރާނެއެވެ. މިއީ މާލޭގެ ހުރިހާ ސްކޫލަކުން މިހާ ގިނަ ދަރިވަރުން މި ފިއެސްޓާގައި ބައިވެރިވި ފުރަތަމަ ފަހަރެވެ.