މީޑިއާ ކައުންސިލްގެ ރައީސް ޝަހުބާން ފަހްމީ މަޤާމުން އިސްތިއުފާދެއްވުމަށް ގޮވާލާ އެކައުންސިލުގެ 9 މެމްބަރެއް ސޮއިކޮށް ޤަރާރެއް ނެރެފިއެވެ.
މީޑިއާ ކައުންސިލުގެ 9 މެމްބަރުން ސޮއިކޮށް ނެރުނު ޤަރާރުގައި ބުނެފައި ވަނީ ޝަހުބާންގެ ހިއްސާ އޮންނަ ކުންފުންޏެއްގެ މައްޗަށް ކުރެވޭ މަނީ ލޯންޑަރިންގެ ތުހުމަތުތަކަކީ ރާއްޖޭގެ ބޮޑެތި މީޑިއާތަކާއި ނޫސްވެރިންގެ އިތުރުން މީޑިއާ ކައުންސިލްގެ ގިނަ މެމްބަރުންގެ ކަންބޮޑުވުން އޮތް މައްސަލައެއް ކަމަށެވެ. އެހެންކަމުން ދިވެހި މީޑިއާގެ އަހުލާގީ ހަމަަތައް ކަނޑައަޅައި މީޑިއާގެ ބެލެނިވެރި މުއައްސަސާއެއްގެ އެންމެ އިސްމަގާމުގައި ހުންނެވި ބޭފުޅަކަށް އެ ފަދަ ތުހުމަތުތަކެއް ކުރެވުމުން މުއައްސަސާގެ އަގު ހިފެހެއްޓުމަށްވެސް ޝަހުބާން އިސްތިއުފާ ދެއްވަން ޖެހޭކަމަށް ކައުންސިލްގެ އަޣުލަބިއްޔަތުން ގަބޫލުކުރާކަމަށް ގަރާރުގައިވެއެވެ.
މި ޤަރާރުގައި ބުނެފައިވަނީ ޝަހުބާނާއެކު، ކުރި މަޝްވަރާތަކުގައި މަގާމުން އިސްތިއުފާ ދިނުމާމެދު ގޮތެއް ނިންމުމަށް ދިން މުއްދަތު މިއަދަށް ހަމަވެފައިވާކަމަށެވެ. އެހެންކަމުން މީޑިއާ ކައުންސިލްގެ ރައީސްކަމުގެ މަޤާމުން ވަގުތުން އިސްތިއުފާ ދެއްވުމަށް އެ ގަރާރުގައި ގޮވާލާފައިވެއެވެ.
މީޑިއާ ކައުންސިލުން މީގެކުރިން ޝަހުބާން މަގާމުގައި ބަހައްޓަން އިތުބާރު އޮތްތޯ ބެލުމަށް ވޯޓެއްވެސް ނަގާފައެވެ. އޭނާ މަޤާމުން ވަކިކުރަން 10 މެމްބަރުންގެ ވޯޓް ބޭނުންވާއިރު، އޭނާ މަގާމުން ދުރުކުރުމަށް ވޯޓްދެއްވީ 8 މެމްބަރަކެވެ. 4 މެމްބަރަކު ވަނީ އޭނާ މަގާމުގައި ބެހެއްޓުމަށް ވޯޓުދެއްވާފައެވެ.
ޝަހުބާންގެ މައްޗަށް މަނީ ލޯންޑްރިންގެ ތުހުމަތުކުރެވޭއިރު، އޭނާ ވަނީ އެ ތުހުމަތުތައް ދޮގުކުރައްވާފައެވެ.