ރީސައިކަލް ކުރެވޭ ކުނިތައް ވަކިކޮށް އަޅާނެ ޑަސްބިން ހުޅުމާލޭގެ އެކި ސަރަހައްދުތަކުގައި ބެހެއްޓުމުގެ މަޝްރޫޢެއް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އިން ފަށައިފިއެވެ.
އެޗްޑީސީން ވިދާޅުވީ މިއީ ހުޅުމާލޭގައި ސާފުތާހިރު ވެއްޓެއް ޤާއިމްކޮށް، ޕްލާސްޓިކް މަދުކުރުމުގެ މަޤްސަދުގައި ކުރިއަށްގެންދާ މަޝްރޫޢެއް ކަމަށެވެ.
މި މަޝްރޫޢުގެ ދަށުން ހުޅުމާލޭގެ ސާފުތާހިރުކަމަށާއި ތިމާވެށީގެ ރައްކާތެރިކަން ދެމެހެއްޓުމަށް 3 ފިޔަވައްސަކަށް ބަހާލައިގެން 345 ޑަސްބިން ބަހައްޓާނެކަމަށް އެޗްޑީސީން ވިދާޅުވެއެވެ. އެގޮތުން ފުރަތަމަ ފިޔަވަހީގައި 41 ޑަސްބިން، ދެވަނަ ފިޔަވަހީގައި 108 ޑަސްބިން އަދި ތިންވަނަ ފިޔަވަހީގައި 196 ޑަސްބިން ބަހައްޓާނެއެވެ.
އެޗްޑީސީން ވިދާޅުވީ ހުޅުމާލޭގެ އެކި ސަރަހައްދުތަކުގައި ބަހައްޓާ ޑަސްބިންތައް ފަރުމާކޮށްފައިވަނީ ރީސައިކަލް ކުރެވޭނެ ކުނިތައް ވަކިން އެޅޭނެ ގޮތަކަށް ކަމަށެވެ.
ހުޅުމާލޭގެ ސާފުތާހިރުކަމަށާއި ތިމާވެށީގެ ރައްކާތެރިކަން ދެމެހެއްޓުމަށް، 3 ފިޔަވައްސަކަށް ބަހާލައިގެން 345 ޑަސްބިން ބެހެއްޓުމުގެ މަޝްރޫއުގެ އަމަލީ މަސައްކަތް ފެށުން.
— HDC (@hdcmaldives) May 28, 2022
މި ޑަސްބިންތައް ފަރުމާ ކުރެވިފައިވަނީ ރީސައިކަލް ކުރެވޭނެ ކުނިތަށް ވަކިން އެޅޭނެ ގޮތަށް! #SaafuHulhumalé pic.twitter.com/r98QKBmRhv
ކުރިއަށްއޮތް ޖޫން މަހުން ފެށިގެން މާލެ ސަރަޙައްދުގެ ގޭބީސީތަކުން އުފައްދާ ކުނި ވަކިކުރުމަށްފަހު ނެރުމަށް ވަނީ އެންވަޔަރަމަންޓް މިނިސްޓްރީން ކަނޑައަޅާފައެވެ. އަދި ކުނި ވަކިކޮށް ޕެކްނުކޮށް ހުންނަނަމަ ކުނި މެނޭޖްކުރުމުގެ ގަވާއިދުގެ ދަށުން އެފަރާތެއް ޖޫރިމަނާކުރާނެއެވެ.
މީގެ ކުރިން ކުނިތައް ވަކިކުރަމުން އަންނަނީ ވެމްކޯގެ މުވައްޒަފުން އެތަކެތި ތިލަފުއްޓަށް ގެންގޮސްގެންނެވެ. އެހެންނަމަވެސް ގޭބީސީތަކުން ކުނި ވަކިކޮށްގެން ނެރުމަކީ މިމަސައްކަތަށް ލުޔެއް ލިބިގެންދާނެ ކަމެކެވެ. އަދި މިގޮތަށް ކުނި ވަކިކޮށް ނެރުމުގައި ފީއަށް އެއްވެސް ބަދަލެއް ނާންނާނެއެވެ. ވެމްކޯގައި ރަޖިސްޓްރީ ކޮށްގެން ޚިދުމަތް ހޯދާ ގޭބީސީތަކުން މަހެއްގެ މައްޗަށް ނަގަނީ 150 ރުފިޔާއެވެ.