"ވިއަވަތި ކޮންފަރެންސް" : ފެނިގެންދަނީ ރައީސުލްޖުމްހޫރިއްޔާ ލާމަރުކަޒީ ނިޒާމަށް ދެއްވާ އަހަމިއްޔަތު

"ވިއަވަތި ކޮންފަރެންސް"އަކީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ އިސްނެންގެވުމަށް، ފަށާ ކޮންފަރެންސްއެކެވެ. "ވިއަވަތި ރާއްޖެ" ކޮންފަރެންސްގެ މައިގަނޑު މަޤްޞަދަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދިވެހިރާއްޖޭގެ ލާމަރުކަޒީ ނިޒާމު ފުރިހަމަކުރައްވައި ކައުންސިލުތައް ބާރުވެރިކުރުމަށް ފަށްޓަވާފައިވާ މަސައްކަތް އިތުރަށް ހަރުދަނާކުރެއްވުމެވެ. އަދި ރާއްޖޭގެ ލާމަރުކަޒީ ނިޒާމުގެ ހަޤީޤީ މަންފާ ކައުންސިލުތަކަށް ލިބިދިނުމަށް، ޤާނޫނަށް ގެނައި އިސްލާހުތަކަށް ކައުންސިލްތައް އަހުލުވެރިކުރުމެވެ.

އިދާރީ ގޮތުންނާއި މާލީ ގޮތުން ކައުންސިލްތަކަށް ލިބިފައިވާ ބާރުތައް، ތަންފީޒުކުރުމުގެ ކަންކަން ކުރިޔަށްދާގޮތް ގާތުން ބެއްލެވުމާއި އެކަމުގައި ކުރިމަތިވާ ގޮންޖެހުންތައް ޙައްލުކޮށްދިނުމުގެ ގޮތުން ރައީސުލްޖުމްހޫރިއްޔާއާއި ކަމާބެހޭ ވަޒީރުންނާއި މަޝްވަރާކޮށް ގޮތްތަކެއް ހޯދުމަށް މަގުފަހިކޮށްދިނުމަކީވެސް ކޮންފަރެންސްގެ މުހިންމު ބޭނުމެކެވެ.

2022 ވަނަ އަހަރު ވިޔަވަތި ކޮންފަރެންސް ކުރިޔަށްގެންދިއުމަށް ހަމަޖެހިފައި ވަނީ 3 ސަރަޙައްދަކަށް ބަހާލައިގެން ކޮންމެ ސިޓީ ކައުންސިލަކާއި އަތޮޅު ކައުންސިލަކާއި ރަށު ކައުންސިލަކާއި އ.ތ.މ ކޮމެޓީއެއްގެ ބައިވެރިވާގޮތަށެވެ. މީގެ ފުރަތަމަ ކޮންފަރެންސް ފަށަނީ މެދު ރާއްޖެ ތެރެއިންނެވެ.

އ.އ އުކުޅަހުގައި ބާއްވާ މި ކޮންފަރެންސްގައި 174 ފަރާތަކުން ބައިވެރިވާގޮތަށް ވަނީ ހަމަޖެހިފައެވެ. ކޮންފަރެންސް ކުރިއަށްދާނީ ހޮނިހިރު އަދި އާދިއްތަދުވަހުއެވެ.

ކޮންފަރެންސްގެ ތެރެއިން މަސްއޫލިއްތުތައް ކައުންސިލްތަކަށް ބަދަލުކުރުމުގެ ގޮތުން މިހާތަނަށް ކުރެވިފައިވާ މަސައްކަތްތަކާއި ގުޅޭގޮތުން، އަލަށް ކައުންސިލްތަކަށް އިންތިޚާބުވި ކައުންސިލް އ.ތ.މ ކޮމެޓީތަކުގެ ރައީސުން، ރައީސުލްޖުމްހޫރިއްޔާއާ ބައްދަލުކުރައްވައި މަޝްވަރާ ކުރެއްވުމަށް ފުރުޞަތު ލިބޭނެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރަކީ ރައްޔިތުންނާއި ގާތުން ރައްޔިތުންގެ އަޑު އައްސަވައިގެން ރައްޔިތުންގެ ކަންކަން ނިންމެވުމަށް އިސްކަންދެއްވާ ސަރުކާރެކެވެ. އެގޮތުން ރައީސުލްޖުމްހޫރިއްޔާ އެންމެ އިސްކަންދެއްވާ އެއްކަމަކީ އެރަށެއްގެ ތަރައްޤީގެ ކަންކަމުގައި ގޮތް ނިންމުމުގައި އެރަށެއްގެ ރައްޔިތުންނާއި ކައުންސިލުން އެންމެ އެދޭގޮތަށް ނިންމުމަށް ފުރުޞަތު ދެއްވުމެވެ. އަދި ކުޑަ ރަށެއް ބޮޑު ރަށެއް ތަފާތުކުރުމެއް ނެތި ރައްޔިތުންގެ އަސާސީ ކަންކަމާއި ބޭނުންވާ ތަރައްޤީ ގެނެސްދެއްވުމެވެ.

މި ގޮތުން ރައީސުލްޖުމްހޫރިއްޔާ ސިލްސިލާގޮތެއްގައި އެކިރަށްރަށަށް ދަތުރުފުޅު ކުރައްވައި ތަރައްޤީގެ މަސައްކަތްތައް ގާތުން ބައްލަވައި އެކަންކަމުގައި ކައުންސިލާ ރައްޔިތުންގެ ޚިޔާލު ހޯއްދަވަމުންގެންދަވައެވެ. އަދި އޭގެއިތުރުން ސިޓީ، އަދި އަތޮޅާއި ރަށްރަށުގައި ނިންމުންތައް ނިންމުމުގައި އަންހެނުންގެ ދަޢުރު ފުޅާކޮށް އަންހެނުން ބާރުވެރިކުރުމަށް ވެސް ސަރުކާރުން ވަނީ މުހިންމު މަސައްކަތްތަކެއްކޮށް ކާމިޔާބީ ހާޞިލްކޮށްފައެވެ.

ހަަމަ އެހެންމެ، މީގެ ކުރިން މައި ސަރުކާރުގައި ހިފެހެއްޓިފައި ހުރި އެތައް ބާރުތަކެއް ކައުންސިލްތަކަށް ދޫކޮށްލެއްވުމަށްފަހު ކައުންސިލުތަކުން އެމަސައްކަތް ކުރިޔަށް ގެންދިއުމުގައި ދޭންޖެހޭ އެއްބާރުލުމާއި ފުރިހަމަ އެހީތެރިކަން މައިސަރުކާރުން ލިބޭނެކަމުގެ ޔަޤީންކަން ރައީސުލްޖުމްހޫރިއްޔާ ތަކުރާރުކޮށް ވަނީ ދެއްވާފައެވެ.

ދެ ދުވަހުގެ މުއްދަތަކަށް ކުރިޔަށްދާނެ މި ކޮންފަރެންސްގައި ޖުމްލަ 4 ސެޝަނެއް ބާއްވާނެއެވެ. އަދި މި ސެޝަންތަކުގައި މިހާރު ޤައުމުގައި ހުރި އެންމެ މުހިންމު މައްސަލަތަކާމެދު މަޝްވަރާކޮށް ހިޔާލުބަދަލުކުރުމާއި ޕްރެޒެންޓޭޝަން ހުށަހެޅުމާއި ކައުންސިލަރުން ހުށަހަޅުއްވަން ބޭނުންވާ ކަންކަން ރައީސުލްޖުމްހޫރިއްޔާއާ ވަޒީރުންނަށް ހުށަހެޅުމުގެ ފުރުޞަތު ލިބިގެންދާނެއެވެ.