ހުޅަނގުގެ އަސްކަރީ އިއްތިޙާދު، ނޭޓޯއިން ބޭނުންވަނީ ޔޫކްރެއިނު ދެބައިކުރަންކަމަށް ބެލަރޫސްގެ ރައީސް އެލެކްސަންދަރު ލުކަޝެންކޯ ތުޙުމަތުކުރައްވައިފިއެވެ.
ރަޝިޔާގެ ރައީސް ވުލަޑުމީރް ޕުޓިންނާ ބައްދަލުކުރައްވައި ވާހަކަފުޅުދައްކަވަމުން ލުކަޝެންކޯ ވިދާޅުވީ ޔޫކްރެއިނުގައި ކުރަމުންދާ ހަނގުރާމައިގެ ބޭނުން ހިފައި ނޭޓޯއިން ބޭނުންވަނީ އެ ޤައުމުގެ ހުޅަނގު ފަޅި ޕޯލެންޑުގެ ބައެއްގެ ގޮތުގައި ހަމަޖައްސަންކަމަށެވެ. އެއީ ވަރަށް ކަންބޮޑުވާކަމެއްކަމަށް ލުކަޝެންކޯ ވިދާޅުވި ނަމަވެސް އެ ތުޙުމަތުތަކުގެ އެއްވެސް ހެއްކެއް ދައްކައިފައެއް ނުވެއެވެ. އޭނާ ވިދާޅުވި ގޮތުގައި ޕޯލެންޑުގެ ބައެއްގެ ގޮތުގައި ޔޫކްރެއިނުގެ ހުޅަނގު ފަޅި ހަމަޖައްސަން ކުރަމުންދާ މަސައްކަތް ހުއްޓުވުމަށް ރަޝިޔާއަށް އެހެން ޤައުމުތަކުގެ އެހީތެރިކަން ބޭނުންވާނެއެވެ.
ރަޝިޔާއިން މީގެ ކުރިންވެސްވަނީ ޔޫކްރެއިނުގެ ހުޅަނގު ފަޅި ޕޯލެންޑުން ބޭނުންވާކަމަށް ތުޙުމަތުކޮށްފައެވެ. ނަމަވެސް ޕޯލެންޑުންވަނީ އެ ތުޙުމަތުތައް ދޮގުކޮށްފައެވެ. ރަޝިޔާގެ ޙަމަލާތަކުން ޔޫކްރެއިނު ދިފާޢުކުރުމަށް އެންމެ ބޮޑު އެހީތެރިކަމެއް ފޯރުކޮށްދޭ އެއް ޤައުމަކީ ޕޯލެންޑެވެ. އަދި ހަނގުރާމައިގެ ސަބަބުން ތިން މިލިޔަން މީހުންވަނީ ޔޫކްރެއިނުން ޕޯލެންޑަށް ހިޖުރަކޮށްފައެވެ.
ފެބްރުއަރީ މަހުގެ 24ވަނަ ދުވަހު ޔޫކްރެއިނަށް ޙަމަލާދިނުމަށް ރަޝިޔާގެ ފައުޖުތަކުންވަނީ ބެލަރޫސްގެ ސަރަޙައްދީ ރޮނގު ބޭނުންކޮށްފައެވެ. އަދި ހަނގުރާމައިގެ ކުރިން ރަޝިޔާއާއި ބެލަރޫސުން ގުޅިގެންވަނީ ވަރުގަދަ އަސްކަރީ ތަމުރީނުތަކެއް ބާއްވައިފައެވެ. ނަމަވެސް ބެލަރޫސުން ބުނެފައިވަނީ ހަނގުރާމާގައި ޢަމަލީގޮތުން އެ ޤައުމުން ބައިވެރިނުވާނެކަމަށެވެ.
ދެވަނަ ބޮޑު ހަނގުރާމައިގެ ދުވަސްވަރު ރޫސީވިލާތާއި ނާޒީ ޖަރުމަންވިލާތުން ސޮއިކޮށްފައިވާ އެއްބަސްވުމެއްގެ ދަށުންވަނީ ޕޯލޭންޑަށް ޙަމަލާދިނުމަށްފަހު އެ ޤައުމު ބައިކޮށްފައެވެ. އޭރު ޕޯލެންޑު ބައިކޮށްގެން ރޫސީވިލާތަށް ލިބުނު ސަރަޙައްދުތައް މިހާރު އޮތީީ ޔޫކްރެއިނާއި ބެލަރޫސްގައެވެ.