ޒުވާނުންނަކީ އަމިއްލައަށް އިސްނަގައިގެން ކަންކުރާ ބަޔަކަށްވުމަށް ހޯމް މިނިސްޓަރ ޢިމްރާން ޢަބްދުالله އިލްތިމާސްކުރައްވައިފިއެވެ. އެމަނިކުފާން މިކަމަށް އިލްތިމާސްކުރެއްވީ ހޯމް މިނިސްޓްރީގެ ޔޫތް ލީޑާރސް ނެޓްވޯކުން ށ.އަތޮޅުގައި ބޭއްވި ޔޫތް ލީޑާރސް ފޯރަމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ށ.އަތޮޅުގެ 13 ރަށަކުން ބައިވެރިވި ސަތޭކައަށްވުރެ ގިނަ ޒުވާނުންނާ މުހާތަބުކުރައްވާ މިނިސްޓަރ ވިދާޅުވީ ކުރިއަށް ދިއުމުގައި އެންމެ މުހިއްމުކަމަކީ އެހެން މީހަކު ކުރޭތޯ ބަލަން ނުތިބެ، އަމިއްލައަށް އިސްނަގައިގެން ކަންކަން ކުރުންކަމަށެވެ. ކަންކަން ކުރި މީހުންނަށް ޝުކުރު އަދާކޮށް، ނުކޮށް ދޫކޮށްލެވިފައި ހުރި ކަންކަން ކުރުމަށް އިސްނެގުމަކީ ލީޑަރުންގެ ސިފައެއްކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ އެހެން މީހަކު ކަނޑައެޅިގެން ގޯސްކޮށް ކަމެއް ކުރާނަމަ ވެވުނު ގޮތަކުން އޭނަ ދުރުކޮށް، އެކަން ތިމާ އަމިއްލައަށް ރަނގަޅު ކުރަންވާނެކަމަށެވެ. އެއީވެސް ލީޑަރުންގެ ސިފައެއްކަމަށް މިނިސްޓަރ ވިދާޅުވިއެވެ.
މިނިސްޓަރ އިމްރާން ޢަބްދުالله ވިދާޅުވީ އެންމެ ބުއްދިވެރި މީހަކީ ލިބޭ ގިނަ މައުލޫމާތުތަކުގެ ތެރެއިން އެންމެ މުހިއްމު ވާހަކަތަކަށް ވިސްނާ، ސަމާލުކަން ދީގެން އަމަލުކުރާ މީހާކަމަށެވެ. މިދިޔަ ތިން ދުވަހު ފޯރަމްގެ ބައިވެރިންނަށް ގިނަ މައުލޫމާތުތަކެއް ލިބުނުކަން ފާހަގަކުރައްވާ މިނިސްޓަރ ވިދާޅުވީ ރަނގަޅު ފެސިލިޓޭޓަރުންނާއެކު ފޯރުކޮށްދެވުނު މައުލޫމާތުގެ ފައިދާ ކުރާނެކަމަށް އުއްމީދުކުރައްވާކަމަށެވެ.
" ތިޔަކުދިން އަޅުގަނޑުމެންގެ އަތުން މިލިބުނު އެއްޗެއް ހިފައިގެން ގޮސް ތިޔަކުދިންގެ އަމިއްލަ ކޮމިއުނިޓީގައި ފުރިހަމައަށް ތަންފީޒުކޮށްފިއްޔާ މާދަމާ އިރާދަކުރެއްވިއްޔާ މިއަތޮޅު ފެންނާނީ މުޅިން އެހެން އަތޮޅެއްގެ ގޮތުގައި. އެޔަޤީންކަން އަޅުގަނޑަށް އެބައޮތް." މިނިސްޓަރ ވިދާޅުވިއެވެ.
ފޯރަމް ބައިވެރިންވެސް ފާހަގަކޮށްފައިވަނީ މިއީ ވަރަށް ކާމިޔާބު ފޯރަމެއްކަމެވެ. އަދި ލިބުނު މައުލޫމާތުގެ އަލީގައި އެނބުރި ރަށަށްގޮސް އަމަލީ ގޮތުން މަސައްކަތްކުރާނެކަމުގެ ޔަޤީންކަން ދީފައިވެއެވެ. ފޯރަމްގެ ބައިވެރިން މަސައްކަތްކުރާނީ ލީޑަރުންގެ ގޮތުގައި އިސްނަގައިގެން މަސައްކަތްކޮށް، ރަށުގެ ހާލަތު ރަނގަޅުކޮށް ކުރިއެރުވުމަށްކަން ބައިވެރިން ފާހަގަކުރިއެވެ.
ށ.އަތޮޅަށް އަމާޒުކުރި ފޯރަމް މިމަހުގެ 19-21 އަށް ކުރިއަށްގެންދިޔައީ މިލަންދޫގައެވެ. ފޯރަމްގައި އަތޮޅުގެ 13 ރަށަކުން ޒުވާނުން ބައިވެރިވިއެވެ.