ދެ ދާއިރާއަކުން ވަޒީފާގެ ފުރުސަތަށް ހުޅުވާލުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން ތައްޔާރުވެއްޖެއެވެ.
ކޯވިޑް-19އަށްފަހު ކުރިމަތިވެފައިވާ މާލީ ޙާލަތުން އަރައިގަތުމަށް އަމިއްލަ ފަރާތްތަކަށް އެހީވުމަށްޓަކާ "ކޯވިޑް-10 އިމަރޖެންސީ އިންކަމް ސަޕޯޓް ޕްރޮޖެކްޓް"ގެ ނަމުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓުން އަންނަނީ ހިންގަމުންނެވެ. މީގެދަށުން ވަޒީފާގެ ފުރުސަތުތައް ފަހިކޮށްދިނުމާއި އެކިދާއިރާތަކުން މީހުން ތަމްރީންކުރުމުގެ މަސައްކަތްތައްވެސް އަންނަނީ ކުރަމުންނެވެ.
އިކޮނޮމިކް މިނިސްޓްރީއިން ވިދާޅުވީ ޑައިވިންގ ދާއިރާއާއި އެކައުންޓިންގ ދާއިރާއިން އެތައް ފުރުސަތުތަކެއް މިހާރު ހުޅުވާލާފައިވާއިރު އިތުރު ފުރުސަތުތަކެއް ފަހި ކޮށްދިނުމުގެ މަސައްކަތް މިހާރު ކުރަމުން އަންނަކަމަށެވެ. މިނިސްޓްރީން ވިދާޅުވީ އަންނަ ހަފްތާގެ ތެރޭގައި އިންފޮރމޭޝަން ކޮމިއުނިކޭޝަން ޓެކްނޮލޮޖީގެ ދާއިރާއާއި ޑައިވިންގެ ދާއިރާއާއި ގުޅޭ ކޯސްތަކަށް ކުރިމަތިލުމުގެ ފުރުސަތު ޖޮބް ސެންޓަރު މެދުވެރިކޮށް ހުޅުވާލާނެކަމަށެވެ.
މިޕްރޮޖެކްޓްގެ ދަށުން އިކޮނޮމިކް މިނިސްޓްރީންވަނީ ޓްރެއިނިންގ ހިންގުމަށް 11 ފަރާތަކާއެކު ސޮއިކޮށްފައެވެ. އެގޮތުން މޫދު ބުޅާ ޑައިވް ސެންޓަރާއި، ވޯޓަރ ޕްރޫފް ސްޕޯޓްސް މޯލްޑިވްސްއާއި، އޯޝަން ޖަންކީސްއާއި، ޑައިވް ކްލަބް މޯލްޑިވްސްއާއި، ޑައިވަރސް ލޮޖް މޯލްޑިވްސްއާއި، ޑައިވް ޑެސްކާއި، ނައިފަރު ސްކޫބަރ ސެންޓަރާއި، ޕެޝަންސް ޕެރަޑައިވްސްއާއި، އޯޝަން ވޮރިއަރސް ޑައިވް އިންސްޓިޓިއުޓްގެ އިތުރުން ވިލާ ކޮލެޖާއެކު ވަނީ ސޮއިކޮށްފައެވެ.
މިފަރާތްތަކާއެކު ސޮއިކޮށްފައިވަނީ ޑައިވިންގ އާއި ގުޅޭ 7 ކޯހެއް ކުރިއަށް ގެންދިޔުމަށެވެ. އެގޮތުން އޯޕަން ވޯޓަރ ޑައިވް ކޯހާއި، އެޑްވާންސް އޯޕަން ވޯޓަރ ޑައިވް ކޯހާއި، އިމަރޖެންސީ ފަސްޓް ރެސްޕޮންޑަރ ކޯހާއި ރެސްކިއު ޑައިވަރ ކޯހާއި، ޑައިވް މާސްޓަރ ކޯހާއި، އެސިސްޓަންޓް އިންސްޓްރަކްޓަރ ކޯހާއި، އޯޕަން ވޯޓަރ އިންސްޓްރަކްޓަރ ކޯސް ހިންގުމަށްވަނީ ހަމަޖެހިފައެވެ.
ކޯވިޑާއެކު ވިޔަފާރިތަކަށް ކުރިމަތިވެފައިވާ މާލީ ގެއްލުމުން އަރައިގަތުމަށް އެހީވެދީ ރާއްޖޭގެ އިޤްތިޞާދު އާރާސްތުކުރުމަށް އިކޮނޮމިކް މިނިސްޓްރީން އަންނަނީ ކަމާ ގުޅޭ އިދާރާތަކާއި ގުޅިގެން މަސައްކަތް ކުރަމުންނެވެ. އެގޮތުން ވިޔަފާރިތަކަށް އިންކަމް ސަޕޯޓް އެލަވަންސް ފޯރުކޮށްދީ ޓެކްސްތައްވަނީ ލުއިކޮށްދީފައެވެ. ހަމައެއާއެކު އިންޓްރަސްޓް ރޭޓުކުޑަ ލޯންތައްވެސްވަނީ ފޯރުކޮށްދީފައެވެ.