ޢިލްމު އުނގެނިގެން ޤައުމަށް ޚިދުމަތް ކޮށްދިނުމަކީ ކޮންމެހެންވެސް ކުރަންޖެހޭ ކަމެއް: އުއްތަމަ ފަނޑިޔާރު
ޢިލްމް އުނގެނިގެން މުޖުތަމައުއަށް ނިކުންނައިރު ޤައުމަށް ޚިދުމަތް ކޮށްދިނުމަކީ ކޮންމެހެންވެސް ކުރަންޖެހޭނެ ކަމެއްކަމަށް ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަހްމަދު މުޢުތަސިމް ވިދާޅުވެއްޖެއެވެ.
އުއްތަމަ ފަނޑިޔާރު މިހެން ވިދާޅުވީ ދިވެހިރާއްޖޭގެ އިސްލާމިކް ޔުނިވަރސިޓީގެ 2022 ވަނަ އަހަރުގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅު ދައްކަވަމުންނެވެ.
މިރަސްމިއްޔާތުގައި ދަސްވެނިވި ދަރިވަރުންނާ މުޙާތަބުކުރައްވާމުން، ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛު އަހްމަދު މުޢުތަސިމް ވިދާޅުވީ އިލްމު އުނގެނި މުޖުތަމައުއަށް ޙިދުމަތް ކުރުމަށް ނުކުންނައިރު އެކަން ކުރުމަށްޓަކައި ރިވެތި އަޙްލާގް އަބަދުވެސް ހަނދާންކޮށް، އެމަގުން ހިނގަންޖެހޭކަމަށެވެ. އަދި ބެލެނިވެރިންގެ މަސައްކަތްތައް ފާހަގަކުރައްވާ، އެ ފަރާތްތަކުންވާ ޤުރުބާނީއަށްޓަކައިވެސް އުއްތަމަ ފަނޑިޔާރު ޝުކުރު ދެންނެވިއެވެ.
"އާދެ މަސައްކަތެއް ކުރައްވާ ކަމަށް ވަންޏާ ފިސާރި ކެރިގެން މުރާލި ކަމާއިއެކު އެ މަސައްކަތެއް ކުރަންޖެހޭނެ. އަދި މިމަސައްކަތް ކުރުމުގައި ތިމަންނައަށް ޤައުމަށް ކޮތްދެވޭނީ ކޮން މަސައްކަތެއްތޯ ބަލައި މި ލޮބުވެތި ވަތަނަށް ޙިދުމަތެއް ކޮތްދޭން ޖެހޭނެ. އެއީ ކޮންމެހެންވެސް ކުރަންޖެހޭނެ ކަމެއް" އުއްތަމަ ފަނޑިޔާރު ވިދާޅުވިއެވެ.
2022 ވަނަ އަހަރު އައިޔޫއެމްއިން ޖުމްލަ ދަސްވެނިވީ 1322 ދަރިވަރުންނެވެ. އެގޮތުން ސެޓްފިކެޓް ލެވެލް، ޑިޕްލޮމާ ލެވެލް، އެސޯސިއޭޓް ޑިގްރީ، ޑިގްރީ، ޕޯސްޓްގްރެޖުއޭޓް ޑިޕްލޮމާ ލެވެލް އަދި މާސްޓަރސް ލެވެލްގެ އިތުރުން ޕީއެޗްޑީ ލެވެލްގެ ކޯސްތަކުން ދަރިވަރުން ވަނީ ދަސްވެނިވެފައެވެ. މީގެ ތެރޭގައި 65.02 އިންސައްތަ ދަރިވަރުންނަކީ އަންހެން ދަރިވަރުންނެވެ. އަދި 34.98 އިންސައްތަ ދަރިވަރުންނަކީ ފިރިހެން ދަރިވަރުންނެވެ.
އެކި އެކި ކުއްލިއްޔާތަކުގެ ދަސްވެނިވި ދަސްވެނިންނަށް ސަނަދު ހަވާލުކޮށްދެއްވީ މުއައްޞަސާގެ ވެރިންނާއި އެކި ފެކަލްޓީސްތަކުގެ ޑީން އިންނެވެ. މި ރަސްމިއްޔާތަކީ މި ޔުނިވަރސިޓީގެ 6 ވަނަ ދަސްވެނިވުމުގެ ރަސްމިއްޔާތެވެ. ދެ ދަންފަޅިއަކަށް ބަހާލައިގެން ކުރިއަށްގެންދާ މި ރަސްމިއްޔާތުގެ 2 ވަނަ ދަންފަޅި މިރޭ އޮންނާނެއެވެ.
މިރަސްމިއްޔާތުގައި އިސްލާމިކް ޔުނިވަރސިޓީގެ ޗަންސެލަރ، ވައިސް ޗާންސެލަރ، ޔުނިވަރސިޓީގެ އެކި ކުއްލިއްޔާތަކުގެ ޑީން އަދި ސަރުކާރާއި އެހެނިހެން މުއައްޞަސާތަކުގެ ވެރިން ވަނީ ބައިވެރިވެފައެވެ.
މައުހަދުގެ ނަމުގައި ފެށިގެން އައި މިމުއައްޞަސާއަކީ، 40 އަހަރުގެ ދިގު މާޒީއެއް އޮތް ތަޢުލީމީ މުއައްޞަސާއެކެވެ. އިސްލާމީ ޔުނިވަރސިޓީން އަންނަނީ މާލޭގެ އިތުރުން ރާއްޖޭގެ ދެކުނުން ފުވައްމުލައް ސިޓީއާއި ލ.ފޮނަދޫގައިވެސް އެ ޔުނިވަރސިޓީގެ ލަރނިންގ ސެންޓަރުތައް ޤާއިމުކޮށް، އެތަންތަނުގައިވެސް ކިޔަވައިދެމުންނެވެ.